Border Gavaskar Trophy: ଗାବା ଟେଷ୍ଟ ମଧ୍ୟରେ ୩ ଖେଳାଳିଙ୍କୁ ମିଳିଲା ଛୁଟି, ହେଲେ କାହିଁକି ?

ବର୍ଡା-ଗାଭାସ୍କର ଟ୍ରଫିରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୫ଟି ଟେଷ୍ଟ ମ୍ୟାଚ ସିରିଜ ଖେଳାଯାଉଛି । ସିରିଜର ତୃତୀୟ ଟେଷ୍ଟ ମ୍ୟାଚ ୧୪ ଡିସେମ୍ବରରୁ ଗାବାରେ ଖେଳାଯାଉଛି । ଆଉ ଟିମ ଇଣ୍ଡିଆ ଏବେ ବ୍ୟାକଫୁଟରେ । ଏହି ମ୍ୟାଚ ହାରିଲେ ଭାରତ ବିଶ୍ବ ଟେଷ୍ଟ ଚମ୍ପିୟାନସିପ ଖେଳି ନପାରେ । ସେପଟେ ବିସିସିଆଇ ଏକ ବଡ ନିଷ୍ପତ୍ତି ନେଇଛି ।

ସୂଚନାଯୋଗ୍ୟ, ବିସିସିଆଇ ଭାରତୀୟ ଦଳର ୩ ଖେଳାଳିଙ୍କୁ ଭାରତକୁ ପଠାଇଛି। ଏହି ଖେଳାଳିଙ୍କ ମଧ୍ୟରେ ଦ୍ରୁତ ବୋଲର ୟଶ ଦୟାଲ, ମୁକେଶ କୁମାର ଏବଂ ନବଦୀପ ସାଇନିଙ୍କ ନାମ ଅନ୍ତର୍ଭୁକ୍ତ । ଏହି ଖେଳାଳିମାନଙ୍କୁ ରିଜର୍ଭ ଭାବରେ ଦଳରେ ଅନ୍ତର୍ଭୁକ୍ତ କରାଯାଇଥିଲା ।

ଏହି ୩ଖେଳାଳିଙ୍କୁ ଭାରତକୁ ପଠାଯାଇଛି କାରଣ ବିଜୟ ହଜାରେ ଟ୍ରଫି ଡିସେମ୍ବର ୨୧ରୁ ଆରମ୍ଭ ହେଉଛି ଏବଂ ସମସ୍ତେ ନିଜ ନିଜ ଦଳ ପାଇଁ ଖେଳୁଥିବା ଦେଖିବାକୁ ମିଳିବ । ଭାରତୀୟ ଦ୍ରୁତ ବୋଲର ଖାଲିଲ ଅହମ୍ମଦଙ୍କ ସ୍ଥାନରେ ଅଷ୍ଟ୍ରେଲିଆ ଗସ୍ତ ପାଇଁ ୟଶ ଦୟାଲଙ୍କୁ ଦଳରେ ସାମିଲ କରାଯାଇଥିଲା । ନେଟ ଶେସନରେ ଖଲିଲ ସମ୍ପୂର୍ଣ୍ଣ ଫିଟ ହୋଇନଥିଲେ, ଯେଉଁଥିପାଇଁ ୟଶଙ୍କୁ ଭାରତୀୟ ଦଳ ସହିତ ପଠାଯାଇଥିଲା। ବର୍ତ୍ତମାନ ଯଶଙ୍କୁ ଉତ୍ତରପ୍ରଦେଶ ପାଇଁ ବିଜୟ ହଜାରେ ଟ୍ରଫିରେ ଖେଳୁଥିବା ଦେଖିବାକୁ ମିଳିବ ।

ଦ୍ରୁତ ବୋଲର ମୁକେଶ କୁମାରଙ୍କ ପାଇଁ ଏହି ଯାତ୍ରା ବହୁତ ଲମ୍ବା ହୋଇଛି । ବର୍ଡର-ଗାଭାସ୍କର ଟ୍ରଫି ପୂର୍ବରୁ ସେ ଇଣ୍ଡିଆ ଏ ଦଳ ସହିତ ଅଷ୍ଟ୍ରେଲିଆ ଗସ୍ତରେ ଯାଇଥିଲେ । ଏବେ ତାଙ୍କୁ ବିଜୟ ହଜାରେ ଟ୍ରଫିରେ ତାଙ୍କ ଦଳ ବେଙ୍ଗଲ ପାଇଁ ଖେଳୁଥିବା ଦେଖିବାକୁ ମିଳିବ ।
ଅଷ୍ଟ୍ରେଲିଆ ଗସ୍ତ ସମୟରେ ନବଦୀପ ସାଇନି ଇଣ୍ଡିଆ ଏ ପାଇଁ କେବଳ ଗୋଟିଏ ମ୍ୟାଚ ଖେଳିଥିଲେ । ଏହା ପରେ ସେ ରୋହିତ ଶର୍ମାଙ୍କ ନେତୃତ୍ୱରେ ଭାରତୀୟ ଦଳରେ ଯୋଗ ଦେଇ ନେଟ୍‌ରେ ବୋଲିଂ କରୁଛନ୍ତି । ବ୍ରିସବେନ ଟେଷ୍ଟର ପ୍ରଥମ ଦିନରେ ସେ ଷ୍ଟାଣ୍ଡରୁ ଖେଳ ଦେଖିଥିଲେ, କିନ୍ତୁ ବର୍ତ୍ତମାନ ସେ ଭାରତ ଆସି ନିଜ ଦଳ ଦିଲ୍ଲୀରେ ଖେଳିବେ ।