ଆଜି ଘୋଷଣା ହେବ ଏସିଆ କପ୍ 2023 ଖେଳସୂଚୀ, ଆଗରୁ ଲିକ୍ ହେଲା ଭାରତ-ପାକ୍ ମ୍ୟାଚ ତାରିଖ: ଦେଖନ୍ତୁ, କେବେ ଅଛି ମ୍ୟାଚ ?

Asia cup 2023 schedule: ଏସିଆ କପ୍ 2023 ପାଇଁ ଆଉ ହାତରେ ମାତ୍ର କେଇଟା ଦିନ । ଫ୍ୟାନ୍ସଙ୍କ ମଧ୍ୟରେ ଦେଖବାକୁ ମିଳିଲାଣି ଉତ୍ସାହ । ଅଗଷ୍ଟ-ସେପ୍ଟେମ୍ବରରେ ଖେଳା ଯିବାକୁ ଥିବା ଏହି ଟୁର୍ଣ୍ଣାମେଣ୍ଟର ଖେଳସୂଚୀ ଆଜି (ବୁଧବାର) ପ୍ରକାଶ ପାଇବ ।

ପାକିସ୍ତାନ କ୍ରିକେଟ୍ ବୋର୍ଡ (ପିସିବି)ର ସଭାପତି ଜାକା ଆଶ୍ରାଫ୍ ଆଜି ସନ୍ଧ୍ୟା 7:15 (ପାକିସ୍ତାନ ସମୟ)ରେ ଏସିଆ କପ୍ 2023 ଖେଳସୂଚୀ ଘୋଷଣା କରିବେ । ତେବେ ଭାରତୀୟ ସମୟ ଅନୁଯାୟୀ, ଏହା ସନ୍ଧ୍ୟା 7.45 ରେ ପ୍ରକାଶ ପାଇବ ।

ଏହା ପୂର୍ବରୁ ଲିକ୍ ହୋଇଛି ବହୁ ପ୍ରତୀକ୍ଷିତ ଭାରତ ବନାମ ପାକିସ୍ତାନ ମହାମୁକାବିଲାର ତାରିଖ । ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁଯାଇ, ସେପ୍ଟେମ୍ବର 3ରେ ଭାରତ-ପାକ୍ ମୁକାବିଲା ଅନୁଷ୍ଠିତ ହେବ । ଏହି ମ୍ୟାଚ ଶ୍ରୀଲଙ୍କାର କାଣ୍ଡିରେ ଖେଳାଯିବ ବୋଲି ଜାତୀୟ କ୍ରୀଡ଼ା ୱେବସାଇଟ୍ ESPNcricinfo ରିପୋର୍ଟ ପ୍ରକାଶ କରିଛି । ତେବେ ଏହି ଆନ୍ତଃ ମହାଦେଶ ଟୁର୍ଣ୍ଣାମେଣ୍ଟ ଅଗଷ୍ଟ 30 ରୁ ଆରମ୍ଭ ହେବ ବୋଲି ରିପୋର୍ଟରୁ ଜଣାପଡ଼ିଛି ।

ତେବେ ଶ୍ରୀଲଙ୍କା ଓ ପାକିସ୍ତାନରେ ଅନୁଷ୍ଠିତ ହେବାକୁ ଥିବା ଏହି ଟୁର୍ଣ୍ଣାମେଣ୍ଟରେ ଆୟୋଜକ ଥିବା ପାକିସ୍ତାନ ତାର ଯାତ୍ରା ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚରୁ ଆରମ୍ଭ କରିବ । ସେପ୍ଟେମ୍ବର 17 ରେ କଲମ୍ବୋରେ ମେଗା ଫାଇନାଲ୍ ଖେଳାଯିବ । ତଥାପି ଏସିଆନ କ୍ରିକେଟ୍ ପରିଷଦ ଖେଳସୂଚୀ ପ୍ରକାଶ କରିବା ପରେ ଅନେକ ପରିବର୍ତ୍ତନ ହେବ ବୋଲି ଆଶା କରାଯାଉଛି ।

ଏସିଆ କପ୍ ମ୍ୟାଚ୍ ସମୟ

ଏସିଆ କପ୍ 2023 ମ୍ୟାଚ୍ କେଉଁ ସମୟ ଆରମ୍ଭ ହେବ ? ଏସିଆ କପ୍ 2023 ରେ ମୋଟ 13ଟି ମ୍ୟାଚ୍ ଖେଳାଯିବ । ଏହି ସମସ୍ତ ମ୍ୟାଚ୍ ଅପରାହ୍ନ 1:30 ରୁ ଆରମ୍ଭ ହେବ । ଏସିଆ କପ୍ 2023ରେ ଭାରତ, ପାକିସ୍ତାନ ଏବଂ ନେପାଳ ଗ୍ରୁପ୍ ଏରେ ଗ୍ରୁପ୍ ସ୍ଥାନ ପାଇଥିବା ବେଳେ ଶ୍ରୀଲଙ୍କା, ଆଫଗାନିସ୍ତାନ ଏବଂ ବାଂଲାଦେଶ ଗ୍ରୁପ୍ ବି ରେ ସ୍ଥାନ ପାଇଛନ୍ତି । ପ୍ରତ୍ୟେକ ଗ୍ରୁପର ଦୁଇଟି ଦଳ 50 ଓଭର ପ୍ରତିଯୋଗିତାର ସୁପର ଫୋର୍ସ ରାଉଣ୍ଡ ପାଇଁ ଯୋଗ୍ୟତା ଅର୍ଜନ କରିବେ । ଅକ୍ଟୋବର 5 ରୁ ଭାରତରେ ହେବାକୁ ଥିବା ବିଶ୍ୱକପ୍ 2023 ପୂର୍ବରୁ ଦଳଗୁଡିକ ପାଇଁ ଏହା ରିହର୍ସାଲ୍ ସୁଯୋଗ ହେବ ।

ସୂଚନାଯୋଗ୍ୟ, ଟୁର୍ଣ୍ଣାମେଣ୍ଟ ପାଇଁ ଭାରତ ପାକିସ୍ତାନ ଯାତ୍ରା କରିବାକୁ ମନା କରିଦେଇଥିଲା ଏବଂ ଶ୍ରୀଲଙ୍କା ମଧ୍ୟ ଆୟୋଜନ ପାଇଁ ମ୍ୟାଚ୍ ଦିଆଯିବା ପୂର୍ବରୁ ଏସିସି ସହିତ ଅନେକ ଆଲୋଚନା କରିଥିଲା । ଶେଷରେ ଚୁଡାନ୍ତ ହୋଇଥିବା ହାଇବ୍ରିଡ୍ ମଡେଲ୍ ଅନୁଯାୟୀ ଏସିଆ କପ୍ ପାକିସ୍ତାନ ଏବଂ ଶ୍ରୀଲଙ୍କାରେ ଅନୁଷ୍ଠିତ ହେବ । ଅବଶିଷ୍ଟ ମ୍ୟାଚ୍ ଶ୍ରୀଲଙ୍କାରେ ଆୟୋଜିତ ହେବାକୁ ଥିବାବେଳେ ପାକିସ୍ତାନ କେବଳ ଚାରିଟି ମ୍ୟାଚ୍ ଆୟୋଜନ କରିବାକୁ ସକ୍ଷମ ହେବ । ରିପୋର୍ଟରେ କୁହାଯାଇଛି ଯେ ପାକିସ୍ତାନରେ ହେବାକୁ ଥିବା ଚାରୋଟି ମ୍ୟାଚ୍ ଲାହୋର ଏବଂ ମୁଲତାନରେ ଖେଳାଯିବ ।

English summary

Asia Cup 2023 Schedule to Announced Today