ରାଜ୍ୟରେ ଘନ କୁହୁଡିର ଆସ୍ତରଣ, ଆଗକୁ ପୁଣି ବଢିବ ଶୀତ

ଆସନ୍ତା 21 ତାରିଖରୁ ପୁଣି ରାଜ୍ୟରେ ତାପମାତ୍ରା କମିବା ନେଇ ଆକଳନ କରିଛି ପାଣିପାଗ ବିଭାଗ।

Published: Monday, January 18, 2021, 12:29 [IST]

ଭୁବନେଶ୍ବର: ସାରା ରାଜ୍ୟରେ ଦେଖା ଦେଇଛି ଘନ କୁହୁଡିର ଆସ୍ତରଣ । ସକାଳ 9 କିମ୍ବା 10 ଯାଏଁ କୁହୁଡି କମ ହେଉ ନଥିବା ବେଳେ ଆସନ୍ତା 21 ତାରିଖରୁ ପୁଣି ରାଜ୍ୟରେ ତାପମାତ୍ରା କମିବା ନେଇ ଆକଳନ କରିଛି ପାଣିପାଗ ବିଭାଗ।

ଆସନ୍ତା ୨ଦିନ ପର୍ଯ୍ୟନ୍ତ ରାଜ୍ୟରେ ତାପମାତ୍ରା ବଢିବା ନେଇ କୁହାଯାଇଛି । ତେବେ ଆଭ୍ୟନ୍ତରୀଣ ଓଡ଼ିଶାରେ ସ୍ୱାଭାବିକ ଠାରୁ ୩ ରୁ ୪ ଡିଗ୍ରୀ ତାପମାତ୍ରା ବଢିବ । ଉପକୂଳ ଓଡ଼ିଶାର ଜିଲ୍ଲାଗୁଡିକରେ ସ୍ୱାଭାବିକ ଠାରୁ ୨ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବଢିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର।

ପୁଣି ୨୧ ତାରିଖରୁ ଶୀତ ଲେଉଟିବ । ସ୍ୱାଭାବିକ ଠାରୁ ୩ ରୁ ୪ଡିଗ୍ରୀ ପର୍ଯ୍ୟନ୍ତ ତାପମାତ୍ରା କମିବା ସହ ଆଭ୍ୟନ୍ତରୀଣ ଓଡ଼ିଶାର କିଛି ଅଞ୍ଚଳରେ ଶୀତ ଅନୁଭୂତ ହେବ । ଶୀତ ଏବଂ ତାପମାତ୍ରା ବୃଦ୍ଧି ଲୁଚକାଳି ଖେଳ ମଧ୍ୟରେ ଘନ କୁହୁଡି ଅସ୍ତବ୍ୟସ୍ତ କରିବ ।

ସେପଟେ ଆଜି ରାଜ୍ୟର ୭ଟି ଜିଲ୍ଲାରେ ପାରଦ ୧୦ ଡିଗ୍ରୀ ତଳେ ରେକର୍ଡ କରାଯାଇଛି । ବୌଦ୍ଧ, ନୟାଗଡ, କନ୍ଧମାଳ, ପୁରୀ ଏବଂ କଳାହାଣ୍ଡିର କିଛି ସ୍ଥାନରେ ଘନ କୁହୁଡି ପାଇଁ ୟେଲୋ ଓ୍ବାର୍ଣ୍ଣିଂ ଜାରି କରାଯାଇଛି । ଘନ କୁହୁଡ଼ି ଯୋଗୁ ଯାନବାହନ ଚଳାଚଳ ପ୍ରଭାବିତ ହେବା ଆଶଙ୍କା ରହିଛି ।

Published On January 18, 2021