୧ରୁ କଡ଼ାକଡ଼ି ହେବ ପେଟ୍ରୋଲ ପମ୍ପରେ ଗାଡ଼ିର ପ୍ରଦୂଷଣ ଯାଞ୍ଚ ନିୟମ, ବିରୋଧ ପରେ ନିୟମ କୋହଳ

Published: Tuesday, December 23, 2025, 9:51 [IST]

ଗାଡ଼ିରେ ପେଟ୍ରୋଲ, ଡିଜେଲ ଭରିବା ପାଇଁ ପ୍ରଦୂଷଣ ପ୍ରମାଣପତ୍ର ବାଧ୍ୟତାମୂଳକ ନେଇ ପରିବହନ ବିଭାଗର ରାତିଅଧିଆ ନିର୍ଦେଶନାମା ପ୍ରସଙ୍ଗରେ ଜନସାଧାରଣଙ୍କ ମଧ୍ୟରେ ରୋଷ ବଢ଼ିଥିବା ବେଳେ ଏହାକୁ ନେଇ କିଛିଟା କୋହଳ ମନୋଭାବ ପୋଷଣ କରିଛି ବିଭାଗ। ପ୍ରଦୂଷଣ ପ୍ରମାଣପତ୍ର ନ ଥିଲେ ଇନ୍ଧନ ମନା ନିଷ୍ପତ୍ତି କାର୍ଯ୍ୟକାରୀ କରିବା ପୂର୍ବରୁ ଆଗାମୀ ୧୫ ଦିନ ପର୍ଯ୍ୟନ୍ତ ଲୋକଙ୍କୁ ସଚେତନ କରିବା ପାଇଁ ନିଷ୍ପତ୍ତି ହୋଇଛି। ତେବେ ଅଳ୍ପ ଦିନ ମଧ୍ୟରେ ଯେଉଁମାନଙ୍କର ପ୍ରଦୂଷଣ ଜୋରିମାନା ଆସିଥିବ ତାକୁ ଅଣଦେଖା କରାଯିବ ବୋଲି ପରିବହନ ଆୟୁକ୍ତ ସ୍ପଷ୍ଟ କରିଛନ୍ତି।

ସୋମବାର ପରିବହନ ଆୟୁକ୍ତ ଅମିତାଭ ଠାକୁରଙ୍କ ଅଧ୍ୟକ୍ଷତାରେ ଭୁବନେଶ୍ବର ଆରଟିଓ-୧ ପରିସରରେ ତୈଳ ବିତରକ କମ୍ପାନୀ ଓ ପରିବହନ ବିଭାଗ ଅଧିକାରୀଙ୍କୁ ନେଇ ବୈଠକ ହୋଇଥିଲା। ଏହା ପରେ ଗଣମାଧ୍ୟମକୁ ସୂଚନା ଦେଇ ଶ୍ରୀ ଠାକୁର କହିଲେ, ନୈତିକତା ଦୃଷ୍ଟିରୁ ପରିବେଶ ପ୍ରଦୂଷଣ ପାଇଁ ଆମେ ଦାୟିତ୍ବବାନ ହେବା ଆବଶ୍ୟକ। ତାହାକୁ ଆଖି ଆଗରେ ରଖି ପେଟ୍ରୋଲ୍‌, ଡିଜେଲ୍‌ ପାଇଁ ପ୍ରଦୂଷଣ ପ୍ରମାଣପତ୍ର ନିୟମ ଜାରି କରାଯାଇଛି। କିନ୍ତୁ ଏହାକୁ କଡ଼ାକଡ଼ି ଭାବେ ଲାଗୁ କରାଯାଇ ନାହିଁ। ପ୍ରଦୂଷଣ ପ୍ରମାଣପତ୍ର କରାଇ ନେବା ପାଇଁ ୧୫ ଦିନ ସମୟ ଦିଆଯିବ। ଜାନୁଆରୀ ୧ରୁ କଡ଼ାକଡ଼ି ଯାଞ୍ଚ ଆରମ୍ଭ ହେବ। ଏହା ପରେ ବୈଧ ପ୍ରମାଣପତ୍ର ନଥିଲେ ଇନ୍ଧନ ମିଳିବ ନାହିଁ। ପ୍ରଥମ ଥର ଜୋରିମାନା ଆସିଥିବା ଲୋକଙ୍କୁ ଛାଡ଼ କରାଯିବ। ଏଥିସହ ଯାହାର ଚାଲାଣ ବକେୟା ରହିଛି ସେମାନେ ମଧ୍ୟ ୱାନ୍ ଟାଇମ୍ ସ୍କିମ୍‌ (ଓଟିଏସ) ଜରିଆରେ ୫୦% ଛାଡ଼ ପାଇବେ। ଏଥିସହ ପ୍ରଦୂଷଣ ପ୍ରମାଣପତ୍ର ଜାରି କରୁଥିବା ଗାଡ଼ି, ଏଜେନ୍ସି ସ୍ପଷ୍ଟ ଭାବେ ପ୍ରମାଣପତ୍ରର ବୈଧତା ଉଲ୍ଲେଖ କରିବା ଜରୁରୀ। ଯେଉଁ ଏଜେନ୍ସି ବେଆଇନ୍ କାର୍ଯ୍ୟ କରୁଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଉଛି।
ପ୍ରକାଶଯୋଗ୍ୟ, ୨୦ ତାରିଖରେ ପରିବହନ ବିଭାଗ ପକ୍ଷରୁ ଜାରି ନିର୍ଦେଶନାମାରେ ଇନ୍ଧନ ଭରିବା ପାଇଁ ପ୍ରଦୂଷଣ ପ୍ରମାଣପତ୍ର ବାଧ୍ୟତାମୂଳକ କରାଯାଇଥିଲା। ଏହାକୁ ନେଇ ଲୋକଙ୍କ ମଧ୍ୟରେ ଛନକା ପଶିଥିବା ବେଳେ ସକାଳୁ ପେଟ୍ରୋଲ ପକାଇବା କଷ୍ଟକର ଥିଲା। ଏପରିସ୍ଥଳେ ପ୍ରଦୂଷଣ ପରୀକ୍ଷାକେନ୍ଦ୍ରରେ ଲୋକଙ୍କ ଗହଳି ଆରମ୍ଭ ହୋଇଥିଲା। ତେବେ ବଡ଼ କଥା ହେଉଛି, ପ୍ରଦୂଷଣ ଜୋରିମାନା ପାଇବାର ୭ ଦିନ ଭିତରେ ପ୍ରମାଣପତ୍ର କରାଇ ନେଉଥିବା ଲୋକଙ୍କୁ ନିୟମ ଅନୁସାରେ ଜୋରିମାନାରୁ ଛାଡ଼ କରାଯାଉ ନାହିଁ। କାରଣ ୱେବ୍‌ସାଇଟରେ ସମସ୍ୟା ହେତୁ ସେମାନେ ପ୍ରମାଣପତ୍ର ଅପଲୋଡ କରିପାରୁ ନାହାନ୍ତି। ଫଳରେ ୧୦ ହଜାର ଟଙ୍କା ତଣ୍ଡ ଗଣିବାକୁ ବାଧ୍ୟ ହେଉଛନ୍ତି। ଏନେଇ ସୋମବାର 'ସମାଜ'ରେ ରିପୋର୍ଟ ପ୍ରକାଶ ପାଇଥିଲା। ଏହି ବୈଠକରେ ପରିବହନ ବିଭାଗର ଅନ୍ୟ ବରିଷ୍ଠ ଅଧିକାରୀଙ୍କ ସହ ଇଣ୍ଡିଆନ୍ ଅଏଲ ସିଜିଏମ୍ କମଲ୍ ଶିଲ୍, ଏଚପିସିଏଲ୍‌ରୁ ସି.ଆର୍ ବିଜୟ କୁମାର, ଉତ୍କଳ ପେଟ୍ରୋଲିୟମ ଡିଲର୍ ଆସୋସିଏସନ୍ ସଞ୍ଜୟ ଲାଠ୍ ପ୍ରମୁଖ ଯୋଗ ଦେଇଥିଲେ।

Published On December 23, 2025