ଆଜି ପବିତ୍ର ମହା ବିଷୁବ ସଂକ୍ରାନ୍ତି, ମହାପ୍ରଭୁଙ୍କୁ ଦର୍ଶନ କରିବେ ହଜାର ହଜାର ସଂଖ୍ୟାର ଭକ୍ତ

Published: Tuesday, April 14, 2026, 8:44 [IST]

ଆଜି ପବିତ୍ର ମହା ବିଷୁବ ସଂକ୍ରାନ୍ତି । ଓଡିଆ ନବବର୍ଷ ମହାବୀର ଜୟନ୍ତୀ ଅବସରରେ ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ କରିବେ ହଜାର ହଜାର ସଂଖ୍ୟାରେ ଭକ୍ତ । ଶ୍ରୀମନ୍ଦିରରେ ମହାପ୍ରଭୁଙ୍କ ସକାଳ ଧୂପ ନୀତି ସରିବା ପରେ ଦକ୍ଷିଣ ଘରୁ ଶ୍ରୀହନୁମାନଙ୍କୁ ରତ୍ନ ସିଂହାସନକୁ ଅଣାଯାଇ ଆଜ୍ଞାମାଳ ପ୍ରଦାନ କରାଯାଇଛି । ଏହା ପରେ ବିମାନରେ ଶ୍ରୀ ହନୁମାନଙ୍କୁ ଜଗନ୍ନାଥ ବଲ୍ଲଭ ନିଆଯାଇ ଆଳତୀ ବନ୍ଦାପନା କରାଯିବ। ଓଡିଆ ପରମ୍ପରା ଅନୁଯାୟୀ ଓଡ଼ିଆଙ୍କ ନୂତନ ବର୍ଷ ଆରମ୍ଭ ହୋଇଛି। ଶ୍ରୀମନ୍ଦିର ପ୍ରଚଳନ ହେବ ନୂଆ ପାଞ୍ଜି। ଦୋଳ ପୂର୍ଣ୍ଣିମାରେ ଦୋଳ ଗୋବିନ୍ଦଙ୍କ ନିକଟରେ ସମର୍ପଣ ହୋଇଥିବା ପାଞ୍ଜିକୁ ଶ୍ରୀମନ୍ଦିରରେ ପ୍ରଚଳନ କରାଯିବ।

ପଣା ସଂକ୍ରାନ୍ତି । ଓଡ଼ିଆ ଅସ୍ମିତା ଓ ପରମ୍ପରାର ମହାମିଳନ। ଓଡ଼ିଆ କ୍ୟାଲେଣ୍ଡର ବା ପଞ୍ଜିକା ଅନୁଯାୟୀ, ମହାବିଷୁବ ସଂକ୍ରାନ୍ତି ବା ପଣା ସଂକ୍ରାନ୍ତି ହେଉଛି ବର୍ଷର ପ୍ରଥମ ଦିନ। ଏହା କେବଳ ଏକ ତିଥି ନୁହେଁ, ବରଂ ଓଡ଼ିଆ ଜାତିର ସାଂସ୍କୃତିକ ଚେତନା ଏବଂ ପ୍ରକୃତି ପ୍ରତି ଥିବା ସମ୍ମାନର ଏକ ପ୍ରତିଫଳନ। ଜ୍ୟୋତିଷ ଶାସ୍ତ୍ର ଅନୁସାରେ, ଆଜି ସୂର୍ଯ୍ୟ ମୀନ ରାଶିରୁ ମେଷ ରାଶିକୁ ଗମନ କରନ୍ତି । ସୂର୍ଯ୍ୟ ବିଷୁବ ରେଖା ଉପରେ ଅବସ୍ଥାନ କରୁଥିବାରୁ ଦିନ ଓ ରାତିର ଅବଧି ପ୍ରାୟ ସମାନ ରହେ । ଏହି ସମୟରୁ ହିଁ ଗ୍ରୀଷ୍ମ ଋତୁର ପ୍ରକୋପ ବଢ଼ିଥାଏ। ଓଡ଼ିଶାର ବିଭିନ୍ନ ପ୍ରାନ୍ତରେ ଆଜିର ଦିନକୁ 'ହନୁମାନ ଜୟନ୍ତୀ' ଭାବେ ପାଳନ କରନ୍ତି । ଭକ୍ତମାନେ ହନୁମାନଙ୍କୁ ଶକ୍ତି ଓ ସାହସର ପ୍ରତୀକ ଭାବେ ପୂଜା କରି ନୂତନ ବର୍ଷର ଶୁଭକାମନା କରନ୍ତି । ଆଜିର ଦିନରେ 'ପଣା' ସେବନର ପରମ୍ପାର ରହିଛି । ତେଣୁ ବିଷୁବ ସଂକ୍ରାନ୍ତିକୁ ପଣା ସଂକ୍ରାନ୍ତିର ନାଁ ଦିଆଯାଇଛି । ପଣା ମୁଖ୍ୟତଃ ପଇଡ଼ ପାଣି, ଛେନା, କଦଳୀ, ଗୁଡ଼, ଗୋଲମରିଚ, କର୍ପୂର ଏବଂ ଉତ୍ତମ ଫଳମୂଳର ମିଶ୍ରଣରେ ପ୍ରସ୍ତୁତ ହୁଏ । ଶ୍ରୀଜଗନ୍ନାଥ ମନ୍ଦିରଠାରୁ ଆରମ୍ଭ କରି ଗାଁ ଗାଁର ମନ୍ଦିର ପର୍ଯ୍ୟନ୍ତ ସବୁଠି ପ୍ରଭୁଙ୍କ ପାଖରେ ପଣା ଭୋଗ ଲଗାଯାଏ । ଏହା ଗ୍ରୀଷ୍ମ ପ୍ରବାହରୁ ଶରୀରକୁ ଶୀତଳ ରଖିବାରେ ସାହାଯ୍ୟ କରେ ।

ଆଜିର ପର୍ବର ସବୁଠାରୁ ଆକର୍ଷଣୀୟ ଦିଗ ହେଉଛି 'ବସୁନ୍ଧରା ଠେକି'। ତୁଳସୀ ଚଉରା ଉପରେ ଏକ ଛୋଟ କଣା ଥିବା ମାଟି ପାତ୍ର ବନ୍ଧାଯାଏ । ଏହି ପାତ୍ରରୁ ଟୋପା ଟୋପା ହୋଇ ପାଣି ତୁଳସୀ ମୂଳରେ ପଡ଼ିଥାଏ। ଏହା ସୂଚାଇ ଦିଏ ଯେ, ଯେତେବେଳେ ଧରିତ୍ରୀ ମାତା ଯେତେବେଳେ ଖରାରେ ଶୁଖିଯାଏ, ସେତେବେଳେ ଜଳଦାନ କରି ତାକୁ ଶୀତଳ ରଖିବା ପ୍ରତ୍ୟେକ ମଣିଷର କର୍ତ୍ତବ୍ୟ । ଏହା ପରୋକ୍ଷରେ ଜଳ ସଂରକ୍ଷଣ ଓ ବୃକ୍ଷରୋପଣର ବାର୍ତ୍ତା ଦିଏ । ଓଡ଼ିଆ ଘରର ପରମ୍ପରା ଅନୁସାରେ ଏହି ଦିନ ନୂଆ ପଞ୍ଜିକା କିଣାଯାଏ । ଠାକୁରଙ୍କ ପାଖରେ ପଞ୍ଜିକା ପୂଜା ହେବା ପରେ ପରିବାରର ସଦସ୍ୟମାନେ ପଣ୍ଡିତଙ୍କଠାରୁ ବର୍ଷକର ରାଶିଫଳ ଶୁଣନ୍ତି । ଏହା ସହିତ ନୂତନ ବ୍ୟବସାୟିକ ହିସାବ କିତାବ ମଧ୍ୟ ଅନେକ ସ୍ଥାନରେ ଆରମ୍ଭ ହୋଇଥାଏ । ବିଭିନ୍ନ ସ୍ଥାନରେ ସ୍ୱତନ୍ତ୍ର ପର୍ବ ଆୟୋଜିତ ହୁଏ । ଦକ୍ଷିଣ ଓଡ଼ିଶାରେ ଆଜିର ଦିନରେ ଦିନ 'ଦଣ୍ଡ ନାଚ'ର ସମାପନ ଉତ୍ସବ ପାଳନ କରାଯାଏ, ଯେଉଁଥିରେ ଭକ୍ତମାନେ କଠୋର ତପସ୍ୟା କରି ଶିବ-ପାର୍ବତୀଙ୍କ ଆରାଧନା କରନ୍ତି । ରାଜ୍ୟର ଅନେକ ମନ୍ଦିରରେ ଭକ୍ତମାନେ ଜଳନ୍ତା ନିଆଁ ଉପରେ ଚାଲି ନିଜର ଭକ୍ତି ପ୍ରଦର୍ଶନ କରନ୍ତି । ପଣା ସଂକ୍ରାନ୍ତି ହେଉଛି ସଂଯମ, ସେବା ଏବଂ ସମର୍ପଣର ପର୍ବ । ଏହା ଆମକୁ ଶିଖାଏ କିପରି ପ୍ରକୃତି ସହ ତାଳ ମିଳାଇ ଆମେ ଏକ ସୁନ୍ଦର ଓ ସମୃଦ୍ଧ ଜୀବନ ବିତାଇପାରିବା ।

Published On April 14, 2026