ଭୁଶୁଡିଲା ସ୍କୁଲ ପାଚେରୀ, ଅଳ୍ପକେ ବର୍ତ୍ତିଗଲେ ଛାତ୍ରଛାତ୍ରୀ
ଅସରାଏ ବର୍ଷାରେ ଭୁଶୁଡ଼ି ପଡ଼ିଲା ସ୍କୁଲ କାନ୍ଥ । ଅକଳ୍ପକେ ବର୍ତ୍ତିଗଲା ଅନେକ ଜୀବନ । ରାଜଧାନୀ ଭୁବନେଶ୍ୱରରେ ଦେଖିବାକୁ ମିଳିଛି ଏଭଳି ଅଭାବନୀୟ ଘଟଣା ।
ୟୁନିଟ-୯ ମହାରାଜା ହଲ ପଛ ପଟେ ଥିବା ଏକ ଘରୋଇ ସ୍କୁଲର ପାଚେରି ଭୁଶୁଡ଼ି ଗୋଟିଏ ଘର ଓ ଦୁଇଟି ବାଇକ୍ କ୍ଷତିଗ୍ରସ୍ତ ହୋଇଛି । ତେବେ ଘରେ ଥିବା ଲୋକେ ମଧ୍ୟ ଦୁର୍ଘଟଣାରୁ ବର୍ତ୍ତି ଯାଇଛନ୍ତି ।
ଦୀର୍ଘ ଦିନରୁ ଏହି ବିପଦଶଙ୍କୁଳ ଅବସ୍ଥାରେ ଥିବା ଘରେ ଚାଲିଥିଲା ପିଲାଙ୍କ ଶିକ୍ଷାଦାନ । ବାରମ୍ବାର ଅଭିଯୋଗ ପରେ ମଧ୍ୟ ପାଚେରୀର ମରାମତି କରାଯାଉ ନଥିଲା । ଏବେ ଅସରାଏ ବର୍ଷାରେ ଏହା ଭାଙ୍ଗି ପଡ଼ିଛି । ସ୍କୁଲ ବନ୍ଦ ଥିବା ସମୟରେ ଦୁର୍ଘଟଣା ଘଟିଥିବାରୁ ନିଶ୍ଚିତ ମୃତ୍ୟୁ ମୁଖରୁ ବର୍ତ୍ତି ଯାଇଛି ଅନେକ କଅଁଳ ଶିଶୁଙ୍କ ଜୀବନ ।
ଏଠି ପ୍ରଶ୍ନ ଉଠୁଛି କାହିଁକି ଶିଶୁଙ୍କ ଜୀବନ ସହ ଖେଳ ଖେଳାଯାଉଛି ? ବାରମ୍ବାର ଅଭିଯୋଗ ପରେ ବି କାହିଁକି ବିପଦଶଙ୍କୁଳ ଅବସ୍ଥାରେ ପିଲାଙ୍କୁ ପାଠପଢ଼ା ଯାଉଥିଲା ? ଏଭଳି ସ୍କୁଲକୁ କିଏ ଦେଇଥିଲା ଅନୁମତି ? କୌଣସି ଜୀବନ ଯାଇଥିଲେ କିଏ ହୋଇଥାନ୍ତି ଉତ୍ତରଦାୟୀ ?
Click it and Unblock the Notifications
Sign in with Google