Dengue in Odisha: ରାଜ୍ୟରେ ଡେଙ୍ଗୁ ସ୍ଥିତି ଭୟଙ୍କର, ୨୬ଟି ଜିଲ୍ଲାରେ ୪୬୩ ଡେଙ୍ଗୁ ରୋଗୀ, ଖୋର୍ଦ୍ଧା ଜିଲ୍ଲାରେ ସର୍ବାଧିକ

Updated: Thursday, July 11, 2024, 11:48 [IST]

ରାଜ୍ୟରେ ଡେଙ୍ଗୁ ସ୍ଥିତି ଏବେ ପୁରା ଭୟଙ୍କର । ରିପୋର୍ଟ ଅନୁଯାୟୀ, ଜୁନ ଶେଷ ସୁଦ୍ଧା ୨୬ଟି ଜିଲ୍ଲାରେ ୪୬୩ ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି । କେବଳ ଖୋର୍ଦ୍ଧା ଜିଲ୍ଲାରେ ୧୨୫ ଡେଙ୍ଗୁ ରୋଗୀ ଥିବା ବେଳେ ଭୁବନେଶ୍ୱରରେ ୭୪ ରୋଗୀ ରହିଛନ୍ତି । କିନ୍ତୁ ୨୬ଟି ଜିଲ୍ଲାରେ ଡେଙ୍ଗୁ ରୋଗୀ ରହିଥିବା ବେଳେ ଅନୁଗୁଳ, ଦେବଗଡ଼, ନୂଆପଡ଼ା ଓ ସୁବର୍ଣ୍ଣପୁରରେ କୌଣସି ରୋଗୀ ଚିହ୍ନଟ ହୋଇନଥିବା ସ୍ୱାସ୍ଥ୍ୟ ବିଭାଗ କହିଛି ।

ରାଜ୍ୟର ବିଭିନ୍ନ ଜିଲ୍ଲା, ମହାନଗର ନିଗମ ଏବଂ ଗ୍ରାମାଂଚଳରେ ଡେଙ୍ଗୁ ରୋଗର ସ୍ଥିତି ସଂପର୍କରେ ସମୀକ୍ଷା କରାଯାଇଛି । ଏହି ରୋଗକୁ ରୋକିବା ପାଇଁ କି କି ପଦକ୍ଷେପ ନିଆଯାଇଛି ସେ ସଂପର୍କରେ ବୈଠକରେ ଆଲୋଚନା ହୋଇଛି । ଡେଙ୍ଗୁ ମୁକାବିଲା ପାଇଁ ରାଜ୍ୟସ୍ତରୀୟ ଆକ୍ସନ ପ୍ଲାନ୍ ଓ ଏସଓପି ରହିଛି । ଆକ୍ସନ ପ୍ଲାନ୍ ଅନୁସାରେ କାର୍ଯ୍ୟ କରିବା ସହ ଏସଓପି ଅନୁପାଳନକୁ ଗୁରୁତ୍ୱ ଦେବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି । ବୈଠକରେ ସ୍ୱାସ୍ଥ୍ୟ ବିଭାଗ ତରଫରୁ ରାଜ୍ୟରେ ଡେଙ୍ଗୁ ସ୍ଥିତି ଉପରେ ରିପୋର୍ଟ ଦିଆଯାଇଥିଲା।

ବୁଧବାର ଲୋକସେବା ଭବନରେ ମୁଖ୍ୟ ଶାସନ ସଚିବ ମନୋଜ ଆହୁଜାଙ୍କ ଅଧ୍ୟକ୍ଷତାରେ ଆୟୋଜିତ ଡେଙ୍ଗୁ ସମୀକ୍ଷା ବୈଠକରେ ଡେଙ୍ଗୁ ତଥ୍ୟ ଉପସ୍ଥାପନ କରାଯାଇଥିଲା । ତଥ୍ୟ ଅନୁସାରେ ମାସକ ମଧ୍ୟରେ ୩୪ ହଜାର ୪୭୬ ନମୁନା ସଂଗୃହିତ ହୋଇଛି । ଏହାପରେ ଡେଙ୍ଗୁର ନିରାକରଣ ଉପରେ ଆଲୋଚନା ହୋଇଥିଲା । ଡେଙ୍ଗୁ ଭୂତାଣୁ ଏଡିସ୍ ମଶା ଦ୍ୱାରା ବ୍ୟାପୁଥିବାରୁ ଏଥିପ୍ରତି ବ୍ୟାପକ ଜନସଚେତନତା ଆବଶ୍ୟକ ରହିଛି । ଡେଙ୍ଗୁ ମୁକାବିଲା ପାଇଁ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ତରଫରୁ ସମସ୍ତ ବିଜ୍ଞାପିତ ଅଞ୍ଚଳ, ପୌରାଞ୍ଚଳରେ ସହରାଞ୍ଚଳ ଟାକ୍ସଫୋର୍ସ ଗଠନ କରିବା, କଠିନ ବର୍ଜ୍ୟବସ୍ତୁ ପରିଚାଳନା ସହ ପଡ଼ି ରହୁଥିବା ପ୍ଲାଷ୍ଟିକ ବ୍ୟାଗ, କପ, ନଡିଆ କତାକୁ ହଟାଇବାକୁ ନିର୍ଦ୍ଦେଶ ଦିଆଯାଇଥିଲା ।

ବିଦ୍ୟାଳୟରେ ପ୍ରାର୍ଥନା ସଭାରେ ଛାତ୍ରଛାତ୍ରୀଙ୍କୁ ଡେଙ୍ଗୁ ସଂପର୍କରେ ସଚେତନତାର ବାର୍ତ୍ତା ବାଣ୍ଟିବେ ଶିକ୍ଷକ, ଶିକ୍ଷୟିତ୍ରୀ । ଏନେଇ ଡେଙ୍ଗୁ ସଚେତନତା ବୈଠକରେ ନିଷ୍ପତ୍ତି ନିଆଯାଇଥିଲା । ଏହାବାଦ୍ ଅଙ୍ଗନବାଡ଼ି କର୍ମୀଙ୍କ ଦ୍ୱାରା ଗ୍ରାମାଞ୍ଚଳ ଓ ବସ୍ତି ଅଞ୍ଚଳରେ ମହିଳା, ପିଲାଙ୍କୁ ସଚେତନ କରିବାକୁ କୁହାଯାଇଥିଲା । 'ଆମ କୃଷି' କାର୍ଯ୍ୟକ୍ରମ ଜରିଆରେ ଲୋକଙ୍କୁ ସତେତନ କରାଯିବା ସହ ଜଳାଶୟରେ ମଶା ଲାର୍ଭା ନଷ୍ଟ କରୁଥିବା ମାଛ ଛାଡିବା ଉପରେ ଆଲୋଚନା ହୋଇଥିଲା ।