ସ୍ନାନ ପୂର୍ଣ୍ଣିମା: ୧୦୮ ଗରା ସୁବାସିତ ଜଳରେ ସ୍ନାନ କଲେ ମହାବାହୁ, ବର୍ଷାରେ ଏକାଠି ଭିଜିଲେ ଭକ୍ତ-ଭଗବାନ
୧୦୮ ଗରା ସୁବାସିତ ଜଳରେ ସ୍ନାନ କଲେ ମହାବାହୁ । ଶନିବାର ଦାରୁଦିଅଁ ଶ୍ରୀମନ୍ଦିର ରତ୍ନବେଦି ଛାଡ଼ି ସ୍ନାନବେଦିରେ ବିଜେ କରି ୧୦୮ ଗରା ସୁବାସିତ ଜଳରେ ସ୍ନାନ କରିଛନ୍ତି । ଏହି ଦିବ୍ୟ ଦର୍ଶନ କରିବାକୁ ଶ୍ରୀକ୍ଷେତ୍ରରେ ଲକ୍ଷାଧିକ ଭକ୍ତଙ୍କ ସମାଗମ ହୋଇଛି। ପୁରୀରେ ପ୍ରବଳ ବର୍ଷା ସତ୍ତ୍ୱେ ମହାପ୍ରଭୁଙ୍କୁ ଦର୍ଶନ କରିଛନ୍ତି ଶ୍ରଦ୍ଧାଳୁ। ଭକ୍ତ-ଭଗବାନ ଏକାଠି ବର୍ଷାରେ ଭିଜିଛନ୍ତି।
ଏହି ନୀତି ନିର୍ଘଣ୍ଟ ଅନୁଯାୟୀ, ରାତି ୪.୩୦ରେ ମଙ୍ଗଳାର୍ପଣ ପରେ ଭୋରରେ ଧାଡ଼ି ପହଣ୍ଡିରେ ଚତୁର୍ଦ୍ଧାବିଗ୍ରହଙ୍କୁ ସ୍ନାନବେଦିକୁ ବିଜେ କରାଯାଇଥିଲା। ପ୍ରଥମେ ବଡ଼ଠାକୁର ଶ୍ରୀ ବଳଭଦ୍ର ରତ୍ନବେଦୀ ଛାଡ଼ି ଧାଡି ପହଣ୍ଡିରେ ଆସି ସ୍ନାନ ମଣ୍ଡପରେ ପହଞ୍ଚି ଥିଲେ। ପରେ ମା' ସୁଭଦ୍ରା ପହଣ୍ଡିରେ ଆସି ସ୍ନାନ ମଣ୍ଡପରେ ପହଞ୍ଚି ଥିଲେ।
ଶେଷରେ କାଳିଆସାଆନ୍ତ ରତ୍ନବେଦୀ ଛାଡ଼ି ଧାଡି ପହଣ୍ଡିରେ ହଲି ହଲି ସ୍ନାନବେଦୀରେ ପହଞ୍ଚି ଥିଲେ। ପରେ ସ୍ନାନବେଦିରେ ଭକ୍ତଙ୍କୁ ଦର୍ଶନ ଦେଇଥିଲେ ଦାରୁଦିଅଁ। ଦାରୁ ଦିଅଁଙ୍କ ସ୍ପତନ୍ତ୍ର ନୀତିକାନ୍ତି ସମାପନ ପରେ ଚତୁର୍ଦ୍ଧାବିଗ୍ରହ ୧୦୮ ଗରା ସୁବାସିତ ଜଳରେ ସ୍ନାନବେଦିରେ ସ୍ନାନ କରିଥିଲେ। ଅପରାହ୍ନରେ ଭକ୍ତଙ୍କୁ ଦୁର୍ଲଭ ହାତୀବେଶରେ ଦର୍ଶନ ଦେବେ ଦାରୁଦିଅଁ।
ବାମ କଡ଼େ ମୂରଲିକା, ଶିରେ ଶିଖି ପୁଚ୍ଛ ଶିଖା, କଟୀ ତଟେ ପୀତାମ୍ବର । ବିଶ୍ୱ ପ୍ରାଣ, ବିଶ୍ୱ ଧାର, ବିଶ୍ୱ ଜୀବନ, ବିଶ୍ୱପତି , ବିଶ୍ୱମ୍ଭର କରୁଣା ସାଗର ମହାବାହୁ ବଳିୟାରଭୁଜଙ୍କର ଅଦ୍ୟ ପାବନ ଦିବ୍ୟ ସ୍ନାନଯାତ୍ରା ।
ଭଗବାନଙ୍କୁ ଦେଖିବାକୁ ଧାଇଁ ଆସିଛି ଭକ୍ତ । ଆଃ କି ସୁନ୍ଦର ଦୃଶ୍ୟ । ଲୋକାରଣ୍ୟ ଆଜି ବଡ଼ଦାଣ୍ତ । ଧୂପ, ଦୀପ, ଘଣ୍ଟ, ଘଣ୍ଟାରେ କମ୍ପୁଛି ଚଉଦିଗ । ଦେବତା ବି ଆଜି ନତମସ୍ତକ । ପ୍ରଭୁ ଆସିଛନ୍ତି ବୋଲି ।
ଏହାକୁ ଜ୍ୟେଷ୍ଠ ସ୍ନାନ ଓ ଜଳ ବିଜେ ମଧ୍ୟ କୁହାଯାଏ । ଚର୍ମ ଚକ୍ଷୁରେ ଏହାକୁ ଦର୍ଶନ କଲେ ପୁନର୍ଜନ୍ମ ହୁଏନାହିଁ ବୋଲି ବିଶ୍ୱାସ ରହିଛି ।ପ୍ରଭୁଙ୍କ ନିକଟରେ ୨୧ ଦିନ ରହିବେ ଜଳତତ୍ତ୍ୱ । ସେ ଜଳକୁ ଭଲ ପାଉଥିବା ଠାକୁର । ସେ ଜଳରେ ଶୟନ କରନ୍ତି । ଜଳ ତାଙ୍କର ଅତି ପ୍ରିୟ ।
Click it and Unblock the Notifications
Sign in with Google