ରାଜସ୍ଥାନରେ ସରକାରୀ ସ୍କୁଲ କୋଠା ଭୁଶୁଡ଼ି ୬ ଛାତ୍ରଛାତ୍ରୀଙ୍କ ମୃତ୍ୟୁ: ଗଭୀର ଦୁଃଖ ପ୍ରକାଶ କଲେ ମୋଦି

ରାଜସ୍ଥାନରେ ସରକାରୀ ସ୍କୁଲ କୋଠା ଭୁଶୁଡ଼ି ୬ ଛାତ୍ରଛାତ୍ରୀଙ୍କ ମୃତ୍ୟୁ । ଝଲୱାର ଜିଲ୍ଲା ପିପଲୋଡ୍‌ ଗାଁରେ ଭୁଶୁଡ଼ିଲା ଉଚ୍ଚ ପ୍ରାଥମିକ ବିଦ୍ୟାଳୟ। ସକାଳ ପ୍ରାର୍ଥନା ପାଇଁ ପିଲାମାନେ ଏକାଠି ହୋଇଥିବା ବେଳେ ଅଘଟଣ। ଆଉ ୨୯ ଛାତ୍ରଛାତ୍ରୀ ଗୁରୁତର; ୨ ଜଣଙ୍କ ଅବସ୍ଥା ସଙ୍କଟାପନ୍ନ ।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ରାଜସ୍ଥାନର ଝଲୱାର ସ୍କୁଲ ଦୁର୍ଘଟଣାରେ ଗଭୀର ଦୁଃଖ ପ୍ରକାଶ କରିଛନ୍ତି । "ଏଭଳି ଦୁଃଖର ଘଡ଼ସନ୍ଧି ମୁହୂର୍ତ୍ତରେ ପୀଡ଼ିତ ଛାତ୍ରଛାତ୍ରୀ ଓ ସେମାନଙ୍କ ପରିବାର ସହ ମୋର ସମବେଦନା" ଶ୍ରୀ ମୋଦୀ କହିଛନ୍ତି ।

ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏକ୍ସ ରେ ପୋଷ୍ଟ କରାଯାଇଛି :

"ରାଜସ୍ଥାନର ଝଲୱାରୀ ସ୍କୁଲରେ ଦୁର୍ଘଟଣା ଅତ୍ୟନ୍ତ ଦୁଃଖଦ ଘଟଣା । ଏଭଳି ଦୁଃଖର ଘଡ଼ସନ୍ଧି ମୁହୂର୍ତ୍ତରେ ପୀଡ଼ିତ ଛାତ୍ରଛାତ୍ରୀ ଓ ସେମାନଙ୍କ ପରିବାର ସହ ମୋର ସମବେଦନା । ଆହତମାନଙ୍କ ଆଶୁ ଆରୋଗ୍ୟ କାମନା କରୁଛି । ପ୍ରଭାବିତଙ୍କୁ କର୍ତ୍ତୃପକ୍ଷ ଯଥାସମ୍ଭବ ସହାୟତା ଯୋଗାଇ ଦେଉଛନ୍ତି:

ଅଚାନକ ଛାତ ଖସିବାରୁ କ୍ଲାସ୍‌ରେ ଥିବା ପିଲାମାନେ ଦବି ରହିଥିବା ଜଣାପଡ଼ିଛି । ସୂଚନା ମୁତାବକ କ୍ଲାସ ଭିତରେ ୬୦ ପିଲା ଥିଲେ ସେମାନଙ୍କ ମଧ୍ୟରୁ ୨୫ ଜଣ ଦବି ରହିଥିବା ଆଶଙ୍କା କରାଯାଉଛି । ଘଟଣାସ୍ଥଳରେ ସ୍ଥାନୀୟ ବାସିନ୍ଦା ଏବଂ ଜେସିବି ସାହାର୍ଯ୍ୟର ଭଗ୍ନାବଶେଷ ଗୁଡିକୁ ହଟାଯାଉଛି । ଆହତ ପିଲାଙ୍କୁ କମୁନିଟି ହେଲ୍ଥ ସେଣ୍ଟରେ ଭତ୍ତି କରାଯାଇଛି ।

ଆଜି(ଶୁକ୍ରବାର) ସକାଳ ୮.୩୦ ମିନିଟ୍‌ରେ ଏହି ଅଘଟଣ ଘଟିଥିଲା । ସ୍କୁଲ୍‌ ଛାତ ଭୁଶୁଡ଼ିବା ବେଳେ କ୍ଲାସ୍‌ରୁମ୍‌ରେ ୬୦ ଜଣ ଛାତ୍ରଛାତ୍ରୀ ରହିଥିଲେ । ଏହି ସ୍କୁଲ୍‌ରେ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ୁଛନ୍ତି ଛାତ୍ରଛାତ୍ରୀ । ସ୍କୁଲ୍‌ କ୍ଲାସ୍‌ରୁମ୍‌ର ଛାତ ବିପଜ୍ଜନକ ଅବସ୍ଥାରେ ରହିଥିବା ନେଇ ପୂର୍ବରୁ ଅନେକ ଥର ଅଭିଯୋଗ ହୋଇଥିଲା । ହେଲେ ଏଥିପ୍ରତି ସ୍କୁଲ୍‌ କର୍ତ୍ତୃପକ୍ଷ ଧ୍ୟାନ ଦେଇନଥିଲେ । ଯାହାଫଳରେ ଆଜି ଏତେ ବଡ଼ ଅଘଟଣ ଘଟିଯାଇଥିବା ଅଭିଯୋଗ ହୋଇଛି ।

ଏହି ଅଘଟଣକୁ ନେଇ ପ୍ରତିକ୍ରିୟା ରଖିଛନ୍ତି ରାଜସ୍ଥାନ ଶିକ୍ଷା ବିଭାଗ ସଚିବ । ସେ କହିଛନ୍ତି ଏବେ ବି ଉଦ୍ଧାର କାର୍ଯ୍ୟ ଜାରି ରହିଛି । ଫସି ରହିଥିବା ଛାତ୍ରଛାତ୍ରୀ ଓ ଶିକ୍ଷକଙ୍କୁ ଖୁବଶୀଘ୍ର ଉଦ୍ଧାର କରାଯାଇଛି । ଉଦ୍ଧାର କାର୍ଯ୍ୟରେ ୪ଟି ଜେସିବି ମେସିନ୍‌ ନିୟୋଜିତ ହୋଇଛି ।