କଡ଼ା ସୁରକ୍ଷା ସତ୍ତ୍ୱେ ବି ଶୋଭାଯାତ୍ରାରେ ହିଂସା, ଜଣେ ମୃତ

Updated: Saturday, April 15, 2023, 15:15 [IST]

ସମ୍ବଲପୁର : ହନୁମାନ ଜୟନ୍ତୀ ଶୋଭାଯାତ୍ରା ସମୟରେ ସମ୍ବଲପୁରରେ ହିଂସା । ପୋଲିସର କଡ଼ା ସୁରକ୍ଷା ସତ୍ତ୍ୱେ ବି ଅଶାନ୍ତ ହେଲା ସହର । ହିଂସାରେ ଜଣେ ଯୁବକଙ୍କର ମୃତ୍ୟୁ ହୋଇଛି ।

ଶୁକ୍ରବାର ରାତିରେ ସହର ଭିତରେ ହନୁମାନ ଜୟନ୍ତୀ ଶୋଭାଯାତ୍ରା ଚାଲିଥିବା ବେଳେ ପୋଲିସ୍ ପ୍ରଶାସନ କଡ଼ା ସୁରକ୍ଷା ବ୍ୟବସ୍ଥା କରିଥିଲା । ଏହାର ସୁଯୋଗ ନେଇ ଅସାମାଜିକ ଉପାଦାନ ସହରର ଭିନ୍ନଭିନ୍ନ ସ୍ଥାନରେ ହିଂସା ଭିଆଇଛନ୍ତି । ରାତି ପ୍ରାୟ 8 ଟାବେଳେ ଟାଉନ୍ ଥାନା ଅନ୍ତର୍ଗତ ଦଲେଇପଡ଼ା ସଂଲଗ୍ନ ରିଂ ରୋଡରେ ଯୁବକଙ୍କୁ ଆକ୍ରମଣ କରାଯାଇଛି । ଏଥିରେ ଚିନ୍ତାମଣି ମିର୍ଦ୍ଦା ନାମକ ଜଣେ ଯୁବକଙ୍କ ମୃତ୍ୟୁ ହୋଇଛି । ଆକ୍ରମଣକାରୀମାନେ ଏହି ଘଟଣା ପରେ ଫେରାର ହୋଇଯାଇଛନ୍ତି ।

ଏହା ବାଦ୍ ସହରର ଜିଲ୍ଲା ସ୍କୁଲ ଛକ, ପେନ୍‌ସନ୍‌ ପଡ଼ା, ଲକ୍ଷ୍ମୀଟକିଜ୍‌ ଛକ, ଗୋଲବଜାର ଆଦି ସ୍ଥାନରେ ଶୋଭାଯାତ୍ରା ଚାଲିଥିବା ସମୟରେ ପଥର ମାଡ଼ ହୋଇଥିବା ଖବର ରହିଛି । ବିଏସ୍‌ଏଫ୍‌ ମାର୍ଗ, ଗୋଲବଜାର, ଜେଇଟି ଟକିଜ୍‌, ଦଳେଇପଡ଼ା, ଫାଟକ, ଚାରଭାଟି, ଗୋବିନ୍ଦକୋଲା ଆଦି ଅଞ୍ଚଳରେ ଦୋକାନ ଜଳାପୋଡ଼ା ଓ ଭଙ୍ଗାରୁଜା ହୋଇଛି । ନାନା ପ୍ରକାର ଗୁଜବ ପୁଲିସ ପାଇଁ ସମସ୍ୟା ସୃଷ୍ଟି କରିଛି ।

ଏହା ପୂର୍ବରୁ ବୁଧବାର ହନୁମାନ ଜୟନ୍ତୀ ସମନ୍ୱୟ ସମିତିର ବାଇକ ରାଲି ଉପରେ ହୋଇଥିଲା ପଥରମାଡ଼ । ଏହାପରଠାରୁ କିଛି କିଛି ସ୍ଥାନରେ ଭଙ୍ଗାରୁଜା, ପୋଡ଼ାଜଳା ଆରମ୍ଭ ହୋଇଥିଲା । ପରିସ୍ଥିତିରେ ସୁଧାର ଆଣିବା ପାଇଁ ଡିଆଇଜି, ଏସ୍‌ପି, ବଛା ବଛା ‌ପୁଲିସ ଅଧିକାରୀ ଏବଂ 42 ପ୍ଲାଟୁନ୍‌ ପୁଲିସ ଫୋର୍ସ ନିୟୋଜିତ ହୋଇ ଶାନ୍ତି ପ୍ରତିଷ୍ଠା ପାଇଁ ଉଦ୍ୟମ କରୁଥିଲେ ।