ଆଜି ଖୋଲିବ ରତ୍ନଭଣ୍ଡାର; ଦିନ ୧ଟାରୁ ସାଢ଼େ ୧ଟା ଭିତରେ ରତ୍ନଭଣ୍ଡାର ଖୋଲିବାକୁ ଯୋଜନା
ଆଜି ଖୋଲିବ ରତ୍ନଭଣ୍ଡାର । ରାଜ୍ୟ ସରକାର ଏଥିପାଇଁ ଚୂଡ଼ାନ୍ତ ଏସ୍ଓପି ଜାରି କରିଛନ୍ତି । ଏସମ୍ପର୍କରେ ଗତକାଲି ସନ୍ଧ୍ୟାରେ ରାଜ୍ୟ ସରକାର ଶ୍ରୀମନ୍ଦିର ପ୍ରଶାସନକୁ ଚିଠି ମାଧ୍ୟମରେ ଅବଗତ କରିଥିଲେ ।
ଏହି ଏସ୍ଓପି ଆଧାରରେ ଶୁଭ ବେଳା ଦେଖି ରବିବାର ରତ୍ନଭଣ୍ଡାର ତାଲା ଖୋଲାଯିବ । ତେବେ ଦିନ ୧ଟାରୁ ସାଢ଼େ ୧ଟା ଭିତରେ ରତ୍ନଭଣ୍ଡାର ଖୋଲିବାକୁ ଯୋଜନା କରାଯାଇଛି । ଶନିବାର ବିଳମ୍ବିତ ରାତିରେ ରତ୍ନଭଣ୍ଡାର ଯାଞ୍ଚ କମିଟିର ଅଧ୍ୟକ୍ଷ ଜଷ୍ଟିସ ବିଶ୍ବନାଥ ରଥଙ୍କ ସହ କମିଟିର ଅନ୍ୟ ସଦସ୍ୟମାନେ ଓ ମୁଖ୍ୟ ଶାସନ ସଚିବ ମନୋଜ ଆହୁଜା, ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ ପ୍ରମୁଖ ଶ୍ରୀମନ୍ଦିର ଯାଇ ସ୍ଥିତି ଅନୁଧ୍ୟାନ କରିଛନ୍ତି।
ରତ୍ନଭଣ୍ଡାର ଯାଞ୍ଚ କମିଟି ସହିତ ସ୍ବତନ୍ତ୍ର ବିଶେଷଜ୍ଞ ଦଳ ବି ଯିବେ। ରତ୍ନଭଣ୍ଡାର ଖୋଲାଯିବା ନେଇ ସମସ୍ତ ବ୍ୟବସ୍ଥା ଶ୍ରୀମନ୍ଦିର ମୁଖ୍ୟ ପ୍ରଶାସକ ତଦାରଖ କରିବେ ବୋଲି କହିଛନ୍ତି ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ। ୨୪ ବର୍ଷର ସରକାର ରତ୍ନଭଣ୍ଡାର ଖୋଲିପାରିନଥିଲେ। ନୂଆ ସରକାର ଆସିବାର ମାସେ ପରେ ରତ୍ନଭଣ୍ଡାର ଖୋଲିବା ଭଳି ଏକ ବଡ଼ ନିଷ୍ପତ୍ତି ନେଇଛି। ଏଥିପାଇଁ ମହାପ୍ରଭୁଙ୍କ ପାଖରେ ନିଜକୁ ସମର୍ପି ଦେଉଛୁ । ମହାପ୍ରଭୁ ନିଶ୍ଚିତ ଆମକୁ ସହାୟ ହେବେ ବୋଲି ଶ୍ରୀ ହରିଚନ୍ଦନ କହିଛନ୍ତି। ରତ୍ନଭଣ୍ଡାର ଖୋଲିବା ପୂର୍ବରୁ ଆଜି ମୁଖ୍ୟ ଶାସନ ସଚିବ ମନୋଜ ଆହୁଜା, ରତ୍ନଭଣ୍ଡାର ଯାଞ୍ଚ କମିଟିର ଅଧ୍ୟକ୍ଷ ଜଷ୍ଟିସ ବିଶ୍ବନାଥ ରଥ, ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ, ଗୃହ ସଚିବ, ଜିଲ୍ଲାପାଳ, ଶ୍ରୀମନ୍ଦିର ପରିଚାଳନା କମିଟିର ସେବାୟତ ପ୍ରତିନିଧି ପ୍ରମୁଖଙ୍କୁ ନେଇ ଏକ ଉଚ୍ଚସ୍ତରୀୟ ବୈଠକ ନୀଳାଦ୍ରି ଭକ୍ତନିବାସରେ ଅନୁଷ୍ଠିତ ହୋଇଯାଇଛି।
ରତ୍ନଭଣ୍ଡାର ଖୋଲିବାର ରୂପରେଖ ଉପରେ ବିସ୍ତୃତ ଆଲୋଚନା ହୋଇଛି। ରବିବାର ମଧ୍ୟ ରତ୍ନଭଣ୍ଡାର ଖୋଲିବା ପୂର୍ବରୁ ଆଉ ଏକ ବୈଠକ ହେବ। ପୂର୍ଣ୍ଣାଙ୍ଗ ଆଲୋଚନା ପରେ ରତ୍ନଭଣ୍ଡାର ଯାଞ୍ଚ କମିଟି ଓ ବିଶେଷଜ୍ଞ ଦଳ ରତ୍ନଭଣ୍ଡାର ଭିତରକୁ ଯିବେ। ମହାପ୍ରଭୁ, ମହାଲକ୍ଷ୍ମୀ, ବାବା ଲୋକନାଥ ଓ ମା' ବିମଳା ଆଶୀର୍ବାଦଙ୍କ ନେଇ ରତ୍ନଭଣ୍ଡାର ଖୋଲାଯିବ ବୋଲି ଜଷ୍ଟିସ୍ ରଥ କହିଛନ୍ତି। ରତ୍ନଭଣ୍ଡାର ଖୋଲିବା ସମୟରେ ଭଣ୍ଡାର ମେକାପ, ଦେଉଳକରଣ, ତଢ଼ଉକରଣ, ପ୍ରତିହାରୀ ପ୍ରମୁଖ ଉପସ୍ଥିତ ରହିବେ ବୋଲି ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ମାଧବ ମହାପାତ୍ର କହିଛନ୍ତି। ଠାକୁରଙ୍କ ଖଟଶେଜ ଘରକୁ ଷ୍ଟ୍ରଙ୍ଗରୁମ୍ କରାଯାଇଛି। ଏଠାରେ ରତ୍ନଭଣ୍ଡାରର ଅଳଙ୍କାର ଗଣତି ଓ ମଣତି ପର୍ଯ୍ୟନ୍ତ ଗଚ୍ଛିତ ରଖାଯିବ ବୋଲି ଜଣାପଡ଼ିଛି।
ଯାଞ୍ଚ କମିଟିର ଅଧ୍ୟକ୍ଷ ଜଷ୍ଟିସ ରଥ କହିଛନ୍ତି ଯେ ରତ୍ନଭଣ୍ଡାର ଖୋଲିବା ବେଳେ ଯାଞ୍ଚ କମିଟିର ଦୁଇଜଣ ସଦସ୍ୟ ରହିବେ। ସ୍ନେକ ହେଲ୍ପ ଲାଇନ୍ର ବି ବ୍ୟବସ୍ଥା କରାଯାଇଛି। ସେମାନେ ଷ୍ଟାଣ୍ଡ୍ ବାଏ ରହିବେ। ଆବଶ୍ୟକ ପଡ଼ିଲେ, ଭିତରକୁ ଯିବେ। ଆମେ ନିଶ୍ଚିତ ମହାପ୍ରଭୁଙ୍କ ଆଶୀର୍ବାଦ ନେବୁ ରତ୍ନଭଣ୍ଡାର ଖୋଲିବା ପୂର୍ବରୁ। ମା' ଲକ୍ଷ୍ମୀ, ପ୍ରଭୁ ଲୋକନାଥ ଓ ମା' ବିମଳାଙ୍କ ଆଶୀର୍ବାଦ ନେଇ ରତ୍ନଭଣ୍ଡାର ଖୋଲିବାକୁ ଯିବୁ। ଦିନ ୧ଟାରୁ ସାଢ଼େ ୧ଟା ଭିତରେ ରତ୍ନଭଣ୍ଡାର ଖୋଲିବାକୁ ଯୋଜନା କରାଯାଇଛି। ଯେହତୁ ରତ୍ନଭଣ୍ଡାରର ଅଳଙ୍କାର ବାକ୍ସ ବହୁଦିନରୁ ଖୋଲାଯାଇନି। ସ୍ଥିତି ଦେଖି ସିନ୍ଧୁକ ସବୁ ସିଲ୍ କରି ବାହାରକୁ ଅଣାଯିବ।
Click it and Unblock the Notifications
Sign in with Google