ଆଜି ରଜ ପର୍ବର ତୃତୀୟ ଦିନ ଭୂମି ଦହନ: ଉତ୍ସବ ମୁଖର ଗାଁଠୁ ସହର, ପିଠା ଖାଇ ନାଚ ଗୀତର ଆସର
Raja Parba 2024: ପହିଲି ରଜ, ରଜ ସଂକ୍ରାନ୍ତି ପରେ ଆଜି ହେଉଛି ରଜର ତୃତୀୟ ଦିନ । ଏହାକୁ ଭୂମି ଦହନ ବୋଲି ମଧ୍ୟ କୁହାଯାଏ । ଶେଷ ରଜରେ ଉତ୍ସବ ମୁଖର ଗାଁଠୁ ସହର ।
ପରମ୍ପରା ଅନୁସାରେ ଏହି ଦିନ ଭୂମି ଉପରେ ଖାଲିପାଦରେ ଚାଲିବାକୁ ମନା କରାଯାଇଥାଏ । କୁମାରୀମାନେ ଖାଲି ପାଦରେ ଚାଲନ୍ତି ନାହିଁ, ଅଧିକାଂଶ ସମୟ ଦୋଳିରେ ଝୁଲନ୍ତି ଏବଂ ଗୁଆ ଖୋଳପା କିମ୍ବା ଚପଲ ପିନ୍ଧି ଚଳପ୍ରଚଳ ହୁଅନ୍ତି ।
ପୂର୍ବ ଦୁଇ ଦିନ ପରି ଆଜି ମଧ୍ୟ ରଜ ଦୋଳି ସାଙ୍ଗକୁ ପୁଚି ଖେଳ, ପିଠା ମିଠା ଓ ପାନ ଖିଆ ସହ ଭଳିକି ଭଳି ଖେଳ ନାଚ ଗୀତର ଆସରରେ ଜମୁଛି ରଜ ପର୍ବରେ । ତରୁଣୀ ମାନେ ରଜ ପର୍ବର ମଜା ଉଠାଉଛନ୍ତି ।
ପ୍ରତି ବର୍ଷ ଏହି ପର୍ବ ପାଳନ ପାଇଁ ଚାହିଁ ବସିଥିବା ରାଜ୍ୟବାସୀ । ଆଜି ଶେଷ ରଜର ସକାଳକୁ ସମସ୍ତେ ଉତ୍ସାହ ଓ ଉଦ୍ଦୀପନାରେ ସହ ସ୍ବାଗତ କରିଛନ୍ତି । ପୂର୍ବ ଦୁଇଦିନ ପରି ସମାନ ଭାବରେ ଗାଁ ଗଣ୍ଡା ଚଳଚଞ୍ଚଳ ହୋଇ ଉଠିଛି । ଝିଅ-ବୋହୂମାନେ ଗାଧେଇ, ପାଦରେ ଅଳତା ନାଇ, ନୂଆ ବସ୍ତ୍ରରେ ନୂଆ ନୂଆ ବେଶରେ ସଜବାଜ ହେଇଛନ୍ତି । ଆମ୍ବତୋଟାରୁ ଶୁଣିବାକୁ ମିଳୁଛି ରଜ ଗୀତ ।
ଗାଁର ଗଳି କନ୍ଦିରେ ରଜ ଦୋଳି ଓ ଛକ ଛକରେ ରଜପାନ ପସରା, ଘରେ ଘରେ ପିଠା ମିଠାର ବାସ୍ନାରେ ମହକୁଛି ଚତୁର୍ଦ୍ଦିଗ । ରଜ ଗୀତର ତାଳେ ତାଳେ ଏହି ଦିନିଦିନିଆ ପର୍ବକୁ ସମସ୍ତେ ପାଳନ କରିଛନ୍ତି । ପ୍ରତିବର୍ଷ ଏହି ପର୍ବକୁ ଚାହିଁ ବସିଥାନ୍ତି ରାଜ୍ୟବାସୀ । ଆଜି ଏହି ପର୍ବରେ ଶେଷ ଦିନ । ପୁଣି ଏହି ତିନି ଦିନ ପାଇଁ ପୁଣି ଆର ବର୍ଷକୁ ଅପେକ୍ଷା ।
ରାଜ୍ୟର ଅନେକ ସ୍ଥାନ ବିଶେଷ କରି ଉପକୂଳ ଜିଲ୍ଲା ଗୁଡିକରେ ପିଠା , ମିଠା , ପାନ ଓ ଦୋଳିର ଆସର ସାଙ୍ଗକୁ ପାରମ୍ପରିକ ନାଚଗୀତର ପ୍ରତିଯୋଗୀତା, ଏହାସହିତ ସାଂସ୍କୃତିକ କାର୍ଯ୍ୟକ୍ରମ ରଜ ମାହୋଲକୁ ଆହୁରି ରଙ୍ଗୀନ କରୁଛି। ପ୍ରତିଟି ଘରେ ଜମୁଛି ତାସ ଓ ଲୁଡୁ ଖେଳର ଆସର। ବିଭିନ୍ନ ସ୍ଥାନରେ ପୁଚି ଓ କବାଡି ପ୍ରତିଯୋଗୀତା କରାଯାଉଛି। ରଜ ପାଇଁ ବାହାରେ ରହୁଥିବା ଲୋକ ନିଜ ନିଜ ଘରକୁ ଆସିଛନ୍ତି। ଘରେ ଘରେ କୁଣିଆ ଓ ବନ୍ଧୁ ବାନ୍ଧବ। ପରିବାର ସଦସ୍ୟ ଏକାଠି ହୋଇ ପିଠା ମିଠା ଖାଇ ପବିତ୍ର ରଜପର୍ବକୁ ଅତ୍ୟନ୍ତ ଆନନ୍ଦ ଉଲ୍ଲାସ ସହକାରେ ପାଳନ କରୁଥିବା ଦେଖିବାକୁ ମିଳିଛି।
Click it and Unblock the Notifications
Sign in with Google