ପଞ୍ଚାୟତ ନିର୍ବାଚନ: ସରିଲା ଚତୁର୍ଥ ପର୍ଯ୍ୟାୟ ମତଦାନ, ୨ଟି ସ୍ଥାନରେ ବାଲାଟରେ ତ୍ରୁଟି

ଶାନ୍ତିଶୃଙ୍ଖଳାର ସହ ସରିଲା ଚତୁର୍ଥ ପର୍ଯ୍ୟାୟ ମତଦାନ । ଦିନ ୧୨ଟା ସୁଦ୍ଧା ହୋଇଛି ୪୫ ପ୍ରତିଶତ ଭୋଟଦାନ ।

ଭୁବନେଶ୍ୱର: ଶାନ୍ତିଶୃଙ୍ଖଳାର ସହ ସରିଲା ଚତୁର୍ଥ ପର୍ଯ୍ୟାୟ ମତଦାନ । ଦିନ ୧୨ଟା ସୁଦ୍ଧା ହୋଇଛି ୪୫ ପ୍ରତିଶତ ଭୋଟଦାନ । ଯାଜପୁରରେ ମୁତୟନ ହୋଇଥିଲେ ୪ ପ୍ଲାଟୁନ ଅଧିକ ଫୋର୍ସ । ୨୭ଟି ଜିଲ୍ଲାର ୬୪ଟି ବ୍ଲକର ୧୬୩ଟି ଜିଲ୍ଲା ପରିଷଦ ଆସନ ପାଇଁ ଭୋଟ୍ ଗ୍ରହଣ ହୋଇଛି । ୧୭ ହଜାର ୮୯ଟି ବୁଥରେ ମତଦାନ କରିଛନ୍ତି । ସେଥିରୁ ୨ହଜାର ୫୬୩ଟି ସମ୍ବେଦନଶୀଳ ବୁଥ ଚିହ୍ନଟ ହୋଇଥିଲା । ଏନେଇ ସୂଚନା ଦେଇଛନ୍ତି ନିର୍ବାଚନ କମିଶନଙ୍କ ସଚିବ ରବୀନ୍ଦ୍ର ନାଥ ସାହୁ ।

ଚତୁର୍ଥ ପର୍ଯ୍ୟାୟ ନିର୍ବାଚନରେ କୌଣସି ସ୍ଥାନରେ ହିଂସା ଦେଖା ଦେଇନଥିବା ବେଳେ ୨ଟି ସ୍ଥାନରେ ବାଲାଟ ପେପରରେ ତ୍ରୁଟି କାରଣରୁ ନିର୍ବାଚନ ସ୍ଥଗିତ ରହିଛି । କେନ୍ଦ୍ରାପଡ଼ାରେ ଗୋଟିଏ ସ୍ଥାନରେ ସରପଞ୍ଚ ଓ ଯାଜପୁରରେ ଓ୍ବାର୍ଡ ମେମ୍ବର ଭୋଟ ସ୍ଥଗିତ ରଖାଯାଇଛି।

ଚତୁର୍ଥ ପର୍ଯ୍ୟାୟ ନିର୍ବାଚନରେ ଅନେକ ହେବିୱେଟ୍ ନେତା ମାନେ ସେମାନଙ୍କ ମତଦାନ କରିଛନ୍ତି । ବାଲେଶ୍ୱର ସାଂସଦ ପ୍ରତାପ ଷଡ଼ଙ୍ଗୀ, ସୁନ୍ଦରଗଡ଼ ସାଂସଦ ଜୁଏଲ ଓରାମ, ମନ୍ତ୍ରୀ ସୁଶାନ୍ତ ସିଂ ଏବଂ ପିପିଲି ବିଧାୟକ ରୁଦ୍ର ମହାରଥୀ ସେମାନଙ୍କ ମତଦାନ କରିଛନ୍ତି । ସୁନ୍ଦରଗଡ଼ ସାଂସଦ ଜୁଏଲ ଓରାମ ଲହୁଣିପଡ଼ା ବ୍ଲକର କେନ୍ଦୁଡ଼ିହି ଗାଁରେ ପହଞ୍ଚି ମତଦାନ କରିଛନ୍ତି । ସେହିପରି ନିଳଗିରି ବ୍ଲକ ଧୋବଶିଳା ଗାଁର ୧୦ ନମ୍ବର ୱାର୍ଡ଼ରେ ମତଦାନ କରିଛନ୍ତି ବାଲେଶ୍ୱର ସାଂସଦ ପ୍ରତାପ ଷଡ଼ଙ୍ଗୀ । ସେହିପରି ଶ୍ରମ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ ସୁଶାନ୍ତ ସିଂ ତାଙ୍କ ନିଜ ଗାଁ ବାଉସେନମୁରା ଗାଁର ୭ନମ୍ବର ବୁଥରେ ଭୋଟ୍ ଦେଇଛନ୍ତି । ପିପିଲି ବିଧାୟକ ରୁଦ୍ର ମହାରଥୀ ପାଣିଦୋଳ ପଂଚାୟତର ୫ନମ୍ବର ବୁଥରେ ପହଂଚି ତାଙ୍କର ମତଦାନ କରିଛନ୍ତି ।

ସେପଟେ ଆସନ୍ତାକାଲି ୪୫ଟି ବୁଥରେ ରି-ପୋଲିଂ ହେବ। ଏଥିପାଇଁ ସ୍ୱତନ୍ତ୍ର ଗାଇଡଲାଇନ୍ ଜାରି କରିଛନ୍ତି ନିର୍ବାଚନ କମିଶନ। ରି-ପୋଲିଂ ଭୋଟ୍ ପରେ ବାଲଟ ବାକ୍ସକୁ ରଖିବାକୁ ମୁଖ୍ୟ ଷ୍ଟ୍ରଙ୍ଗରୁମ୍ ଖୋଲାଯିବ ନାହିଁ । ଅନ୍ୟ ଏକ ଷ୍ଟ୍ରଙ୍ଗରୁମ୍ କରି ଏସବୁକୁ ସୁରକ୍ଷିତ ରଖାଯିବ । ଏଥିପାଇଁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ଅନ୍ୟପଟେ ତୃତୀୟ ପର୍ଯ୍ୟାୟରେ ଭୋଟିଂ ହୋଇପାରିନଥିବା ୩୦ଟି ବୁଥରେ ୨୫ ତାରିଖରେ ପୁଣି ଥରେ ନିର୍ବାଚନ ହେବ ।

English summary

Odisha Panchayat Election: 4th Phase Voting Ended