୫୦ ନୁହେଁ, ୨୫ଙ୍କୁ ଅନୁମତି: ଘରକୁ ପାର୍ସଲ ନେଇକି ଯିବେ ବାହାଘର ଭୋଜି

ବିବାହ, ବ୍ରତଘର ଭଳି ଅନ୍ୟନ୍ୟ ଘରୋଇ କାର୍ଯ୍ୟକ୍ରମରେ କଡା କଟକଣା ଲଗାଯାଇଛି । ଏଣିକି ବିବାହ କିମ୍ବା ବ୍ରତଘରରେ 50 ଜଣଙ୍କ ବଦଳରେ 25 ଜଣଙ୍କୁ ଅନୁମତି ମିଳିବ ।

Published: Tuesday, May 18, 2021, 21:06 [IST]

ଭୁବନେଶ୍ୱର: ରାଜ୍ୟରେ ଦୈନିକ ସଂକ୍ରମଣ ଚେନକୁ ଭାଙ୍ଗିବାକୁ ଚଳିତ ବର୍ଷର ଲକଡାଉନ 2.0 ଘୋଷଣା କରିଛନ୍ତି ରାଜ୍ୟ ସରକାର । ମେ 20 ତାରିଖରୁ ଜୁନ 1 ତାରିଖ ପର୍ଯ୍ୟନ୍ତ ରାଜ୍ୟରେ ଜାରି ରହିବ ତାଲବନ୍ଦ । ତେବେ ଏହାରି ମଧ୍ୟରେ ଚଳିତ ଲକଡାଉନରେ ଥିବା କିଛି ନିୟମରେ ପରିବର୍ତ୍ତନ କରାଯାଇଛି ।

ଯାହା ମଧ୍ୟରୁ ବିବାହ, ବ୍ରତଘର ଭଳି ଅନ୍ୟନ୍ୟ ଘରୋଇ କାର୍ଯ୍ୟକ୍ରମରେ କଡା କଟକଣା ଲଗାଯାଇଛି । ଏଣିକି ବିବାହ କିମ୍ବା ବ୍ରତଘରରେ 50 ଜଣଙ୍କ ବଦଳରେ 25 ଜଣଙ୍କୁ ଅନୁମତି ମିଳିବ । ସେହିପରି କର୍ତ୍ତାର ଘରେ ବସି ଆପଣଙ୍କୁ ଭୋଜି ଭାତ ଖାଇବାକୁ ଅନୁମତି ମିଳିବ ନାହିଁ । ବରଂ ଆପଣଙ୍କୁ ବାହାଘର ଭୋଜିକୁ ପାର୍ସଲ ନେଇ ଯିବାକୁ ହେବ । ସେହିପରି ବିବାହ କାର୍ଯ୍ୟକ୍ରମରେ କୌଣସି ବାଜା କିମ୍ବା ରୋସଣି ହେବ ନାହିଁ ବୋଲି ମୁଖ୍ୟ ଶାସନ ସଚିବ କହିଛନ୍ତି।

ସେହିପରି ଅନ୍ୟଏକ ଗୁରୁତ୍ବପୂର୍ଣ୍ଣ ବିଷୟ ବସ୍ତୁ ହେଲା- ଲକଡାଉନ୍‌ ସହ ରାଜ୍ୟରେ ମଧ୍ୟ ଜାରି ରହିବ ସପ୍ତାହନ୍ତ ସଟଡାଉନ୍ । ମାତ୍ର ସୋମବାରରୁ ଶୁକ୍ରବାର ଦୈନିକ ସକାଳେ ମିଳୁଥିବା ମହଲତକୁ କମାଇ ଦିଆଯାଇଛି। ଏଣିକି ଦୈନିକ ୬ ଘଣ୍ଟା ବଦଳରେ ୪ ଘଣ୍ଟାକୁ ମଧ୍ୟରେ ଦୈନଦିନ ସାମଗ୍ରୀ କିଣିପାରିବେ ଲୋକେ। ସକାଳ ୭ଟାରୁ ୧୧ଟା ପର୍ଯ୍ୟନ୍ତ ପରିବାପତ୍ର କିଣିବାକୁ ଅନୁମତି ଦିଆଯାଇଛି। ଆବଶ୍ୟକ ଅନୁସାରେ, ଲୋକମାନେ ନିକଟସ୍ଥ ଦୋକାନକୁ ଚାଲି ଚାଲି ଯାଇ ଜିନିଷ କିଣିପାରିବେ।

ଉଲ୍ଲେଖଯୋଗ୍ୟ ଯେ, ରାଜ୍ୟରେ ଲଗାତାର ଭାବରେ ଦୈନିକ କରୋନା ସଂକ୍ରମିତଙ୍କ ସଂଖ୍ୟା ୧୦ ହଜାର ଉପରେ ରହୁଛି। ଲକ୍‌ଡାଉନ ଓ ସପ୍ତାହାନ୍ତ ସଟଡାଉନ ସତ୍ତ୍ୱେ ମଧ୍ୟ ଦୈନିକ ସଂକ୍ରମଣ ୧୦ ହଜାର ତଳକୁ ଖସି ନଥିବା ଦେଖିବାକୁ ମିଳିଛି। ଆଉ ସଂକ୍ରମଣର ଚେନ୍‌ ଭାଙ୍ଗିବାକୁ ରାଜ୍ୟରେ ଲକଡାଉନ ଅବଧିକୁ ବୃଦ୍ଧି କରିଛନ୍ତି ରାଜ୍ୟ ସରକାର।

ତେବେ ଆଜି ବି ଆଉ ୧୦ ହଜାର ୩୨୧ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । କ୍ୱାରେଣ୍ଟାଇନରୁ ୫ ହଜାର ୭୭୯ଟି ମାମଲା ଆସିଥିବା ବେଳେ ୪ ହଜାର ୫୪୨ଟି ମାମଲା ସ୍ଥାନୀୟ ସଂକ୍ରମଣ । ଖୋର୍ଦ୍ଧାରୁ ସର୍ବାଧିକ ୧ ହଜାର ୫୬୬ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ସୁନ୍ଦରଗଡ଼ରୁ ୮୧୯ଟି ମାମଲା ଆସିଛି । ଗତକାଲି ସର୍ବାଧିକ ସଂଖ୍ୟା କଟକରେ ଥିଲା ।

ସେହିପରି ଅନୁଗୁଳରୁ ୪୭୧, ବାଲେଶ୍ୱରରୁ ୨୬୯, ବରଗଡ଼ରୁ ୩୨୦, ଭଦ୍ରକରୁ ୩୫୦, ବଲାଙ୍ଗିରରୁ ୨୯୧, ବୌଦ୍ଧରୁ ୨୫୦, କଟକରୁ ୭୩୧, ଦେବଗଡ଼ରୁ ୧୧୪, ଢେଙ୍କାନାଳରୁ ୭୭, ଗଜପତିରୁ ୫୬, ଗଞ୍ଜାମରୁ ୨୦୩, ଜଗତସିଂହପୁରରୁ ୧୫୯, ଯାଜପୁରରୁ ୩୩୦, ଝାରସୁଗୁଡ଼ାରୁ ୩୧୨, କଳାହାଣ୍ଡିରୁ ୫୯୯, କନ୍ଧମାଳରୁ ୫୪, କେନ୍ଦ୍ରାପଡ଼ାରୁ ୧୬୨ ଜଣ ସଂକ୍ରମିତ ଚିହ୍ନଟ ହୋଇଛନ୍ତି ।

କେନ୍ଦୁଝରରୁ ୨୦୪, ଖୋର୍ଦ୍ଧାରୁ ୧୫୬୬, କୋରାପୁଟରୁ ୩୩୮, ମାଲକାନଗିରିରୁ ୭୭, ମୟୂରଭଞ୍ଜରୁ ୪୫୮, ନବରଙ୍ଗପୁରରୁ ୩୩୪, ନୟାଗଡ଼ରୁ ୨୭୩, ନୂଆପଡ଼ାରୁ ୧୪୫, ପୁରୀରୁ ୪୭୨, ରାୟଗଡ଼ାରୁ ୧୬୩, ସମ୍ବଲପୁରରୁ ୪୦୫, ସୋନପୁରରୁ ୭୩, ସୁନ୍ଦରଗଡ଼ରୁ ୮୧୯ ଏବଂ ଷ୍ଟେଟ ପୁଲରୁ ୨୪୬ ଜଣ ସଂକ୍ରମିତ ଚିହ୍ନଟ ହୋଇଛନ୍ତି ।

Published On May 18, 2021