ଓଡିଶା ବନ୍ଦ ପରିପ୍ରେକ୍ଷୀରେ କଗ୍ରେସର ଅଭିନବ ପ୍ରତିବାଦ: କେଉଁଠି ମୁଣ୍ଡନ ହେଲେ, କେଉଁଠି ଚକୋଲେଟ ବଣ୍ଟନ କଲେ
ଭୁବନେଶ୍ଵର: ଆଜି କଂଗ୍ରେସ ପକ୍ଷରୁ ଦିଆଯାଇଥିଲା ୬ ଘଣ୍ଟିଆ ଓଡିଶା ବନ୍ଦ ଡକରା। ତେବେ ବନ୍ଦ ପାଳନ କରିବା ବେଆଇନ ବୋଲି ହାଇକୋର୍ଟଙ୍କ ନିର୍ଦେଶ ପରେ ଏହାକୁ ଶାନ୍ତିପୂର୍ଣ ଭାବରେ ପାଳନ କରିବାକୁ ଦଳ ପକ୍ଷରୁ ନିଷ୍ପତ୍ତି ହୋଇଥିଲା। ମମିତାଙ୍କୁ ନ୍ୟାୟ ଓ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବହିଷ୍କାର ଦାବିରେ କଂଗ୍ରେସ ୬ ଘଣିଆ ହରତାଳ ଆହ୍ଵାନ କରିଥିଲା । ବନ୍ଦ ପାଳନ ଅବସରରେ ଦଳ ପକ୍ଷରୁ ରାଜ୍ୟର ବିଭିନ୍ନ ଜିଲ୍ଲାରେ ଅଭିନବ ପ୍ରତିବାଦ ଦେଖିବାକୁ ମିଳିଥିଲା । ଭୁବନେଶ୍ବର ମାଷ୍ଟର କେଣ୍ଟିନ ଛକରେ ଦଳୀୟ କର୍ମୀମାନେ ଲୋକଙ୍କୁ ଚକୋଲେଟ ବଣ୍ଟନ କରୁଥିବା ଦେଖିବାକୁ ମିଳିଥିଲା।
ନବରଙ୍ଗପୁର ଜିଲ୍ଲାରେ ଅଭିନୟ ଢଙ୍ଗରେ ପ୍ରତିବାଦ ପ୍ରଦର୍ଶନ କରିଥିଲେ କଂଗ୍ରେସ କର୍ମୀ । ଚନ୍ଦାହାଣ୍ଡି ବ୍ଲକ୍ କଂଗ୍ରେସ କମିଟି ପକ୍ଷରୁ କର୍ମୀମାନେ ସାମୁହିକ ଭାବେ ମୁଣ୍ଡନ ହୋଇଥିଲେ । ମମିତାଙ୍କ ଆତ୍ମାର ସଦଗତି କାମନା ସହ ତାଙ୍କୁ ନ୍ୟାୟ ଦାବି କରିଛନ୍ତି । ଏହି ସାମୁହିକ ମୁଣ୍ଡନ୍ କାର୍ଯ୍ୟକ୍ରମରେ ନିଜେ ପିସିସି ସମ୍ପାଦକ କ୍ଷେମରାଜ ବାଘଙ୍କ ସମେତ ବହୁ କର୍ମୀ ମୁଣ୍ଡନ ହୋଇଥିଲେ । ଏଥିସହ ବିକ୍ଷୋଭ ଓ ପ୍ରତିବାଦ ସଭା ଅନୁଷ୍ଠିତ ହୋଇଥିଲା । ସେହିପରି ବିଭିନ୍ନ ଜିଲ୍ଲାରେ କର୍ମୀମାନେ ପ୍ଲାକାର୍ଡ ଧରି ପ୍ରତିବାଦ କରିଥିଲେ ।
ବ୍ରହ୍ମପୁର, କଟକ, ରାଉରକେଲା, ସମ୍ବଲପୁର, ଜୟପୁର, ବାଲେଶ୍ଵର ଏବଂ ଭଦ୍ରକ ଜିଲ୍ଲାରେ ଦଳୀୟ କର୍ମୀମାନେ ଶାନ୍ତିପୂର୍ଣ ହରତାଳ କରିଥିବା ସୂଚନା ମିଳିଥିବା ବେଳେ ଏବେ ଯାଏଁ କୌଣସି ଆଇନ ଶୃଙ୍ଖଳା ପରିସ୍ଥିତି ହୋଇଥିବା ସୂଚନା ମିଳିନାହିଁ।
ରାଜଧାନୀରେ କଡା ସୁରକ୍ଷା ବ୍ୟବସ୍ଥା:
ସୁରକ୍ଷା ଦୃଷ୍ଟିରୁ ରାଜଧାନୀରେ ୨୦ ପ୍ଲାଟୁନ ପୋଲିସ ଫୋର୍ସ ନିୟୋଜିତ କରାଯାଇଥିଲା। କଂଗ୍ରେସ ବିଧାୟକ ସୁର ରାଉତରାୟ ,ପୂର୍ବତନ ପିସିସି ସଭାପତି ଜୟଦେବ ଜେନା, ଛାତ୍ର କଂଗ୍ରେସ ସଭାପତି ୟାସିର ନୱାଜ ଓ ମହିଳା ଛାତ୍ର ଓ ଯୁବ କଂଗ୍ରେସର କର୍ମକର୍ତ୍ତା ମାନେ ମାଷ୍ଟର କ୍ୟାଣ୍ଟିନ ଛକରେ ଏକାଠି ହୋଇ ହରତାଳ କରିଛନ୍ତି ।
ଭୁବନେଶ୍ବରର ଏଜି-ଛକ, ମାଷ୍ଟର କ୍ୟାଣ୍ଟିନ, ଜୟଦେବ ବିହାର, ରସୁଲଗଡ, କଲ୍ପନା ଛକ, ବାଣୀବିହାର, ଆଚାର୍ଯ୍ୟ ବିହାର, ରାଜମହଲ, ବିମାନ ବନ୍ଦର, ବରମୁଣ୍ଡା ଏବଂ ଖଣ୍ଡଗିରି ଆଦି ସ୍ଥାନରେ ଅପ୍ରୀତିକର ପରିସ୍ଥିତି ଉପୁଜିବା ଆଶଙ୍କାରେ ପୋଲିସ ନିୟୋଜିତ ଅଛନ୍ତି। ହରତାଳ ବେଳେ କଂଗ୍ରେସ ନେତା ଓ କର୍ମୀ ହାଇକୋର୍ଟଙ୍କ ନିର୍ଦ୍ଦେଶନାମାକୁ କଡ଼ାକଡ଼ି ପାଳନ କରିବା ସହ ଜନଜୀବନକୁ ପ୍ରଭାବିତ ହେବା ଭଳି କୌଣସି କାର୍ଯ୍ୟ କରି ନାହାନ୍ତି ।
Click it and Unblock the Notifications
Sign in with Google