ହୋସ୍ ଉଡାଇ ଦେବ ଝୁମ୍ପୁଡି ଘରର ବିଦ୍ୟୁତ୍ ବିଲ୍ : ଗ୍ରାହକ କହିଲେ କରୋନା କାଳରେ ହୃଦଘାତ କରିଦେବ

ଗୋଟିଏ ମାସର ଇଲେକ୍ଟ୍ରି ବିଲ୍ ରହିଛି 29 ହଜାର 5 ଶହ 22 ଟଙ୍କା ।

Published: Thursday, June 17, 2021, 18:53 [IST]

ଭୁବନେଶ୍ୱର : ରାଜଧାନୀ ଭୁବନେଶ୍ୱରର ଇଷାନେଶ୍ୱର ବସ୍ତି । ଏହି ବସ୍ତିରେ ରହିଛି ଆଜବେଷ୍ଟସସ୍ ଓ ଜରିରେ ନିର୍ମାଣ ହୋଇଥିବା ଝୁମ୍ପୁଡି ଘର । ଏହି ଘରେ ଲାଗିଛି ଦୁଇଟି ବଲ୍ବ ଗୋଟିଏ ଫ୍ୟାନ ଓ ଗୋଟିଏ ଇନଣ୍ଡକ୍ସନ କୁକର । ଆପଣ ଭାବୁଥିବେ ଏହି ଘରର ଦୁର୍ଦ୍ଦଶା ବିଷୟରେ କହିବା ପାଇଁ ଚାହୁଁଛୁ ଅଥବା ଏହି ଘରେ ରହୁଥିବା ଲୋକଙ୍କ ବିଷୟରେ । ଏବେ ଏହି ଘରକୁ ନେଇ ଯେଉଁ ଖବର ସାମ୍ନାକୁ ଆସିଛି ତାହା ଆପଣଙ୍କୁ ଆଶ୍ଚର୍ଯ୍ୟଚକିତ କରିଦେବ । ଏହି ଘରର ଇଲେକ୍ଟ୍ରି ବିଲ୍ । ଗୋଟିଏ ମାସର ଇଲେକ୍ଟ୍ରି ବିଲ୍ ରହିଛି 29 ହଜାର ଟଙ୍କାରୁ ଅଧିକ ।

ଚନ୍ଦ୍ରଶେଖରପୁର ଇଷାନେଶ୍ୱର ବସ୍ତିରେ ରୁହନ୍ତି ଜଗନ୍ନାଥ ଦାସ । ଜଗନ୍ନାଥଙ୍କ ବିଦ୍ୟୁତ ଦେୟ ବାବଦରେ ପ୍ରତିମାସରେ ଦେଢ ଶହରୁ ଦୁଇ ଶହ ଟଙ୍କା ଆସେ । ତେବେ ଏବେ ତାଙ୍କ ପାଖକୁ ଯେଉଁ ବିଦ୍ୟୁତ୍ ବିଲ୍ ଆସିଛି ତାହା ତାଙ୍କ କଳ୍ପନା ବାହାରେ । ତାଙ୍କର 29 ହଜାର 5 ଶହ 22 ଟଙ୍କା ଆସିଛି ବିଦ୍ୟୁତ୍ ବିଲ୍ । ଏକ ଝୁମ୍ପୁଡି ଘରୁ ବ୍ୟବହୃତ ହେଉଥିବା ଉକ୍ତ ବିଦ୍ୟୁତ୍ ସରଞ୍ଜାମରୁ ତାଙ୍କ ପାଖକୁ ଏହି ମୋଟା ଅଙ୍କର ବିଲ୍ ଆସିଛି । ଜଗନ୍ନାଥ ଏସମ୍ପର୍କରେ ବିଦ୍ୟୁତ ବିତରଣ କମ୍ପାନୀ କାର୍ଯ୍ୟାଳୟକୁ ଯାଇ ସମ୍ପୃକ୍ତ ଅଧିକାରୀଙ୍କ ସହ କଥା ହୋଇଛନ୍ତି । ମାତ୍ର କୌଣସି ସନ୍ତୋଷ ଜନକ ଉତ୍ତର ସେ ତାଙ୍କ ଠାରୁ ପାଇ ପାରି ନାହାନ୍ତି । ତାଙ୍କୁ ମିଟରରେ କୌଣସି ତ୍ରୁଟି କିମ୍ବା ଅନ୍ୟ କିଛି ସମସ୍ୟା ରହିଥାଇ ପାରେ ଦର୍ଶାଇ ମୁଖ୍ୟ କାର୍ଯ୍ୟାଳୟ ଅଧିକାରୀଙ୍କୁ ଭେଟି ଏସମ୍ପର୍କରେ ଜଣାଇବାକୁ ପରାମର୍ଶ ଦିଆଯାଇଛି । ଅପରପକ୍ଷରେ କରୋନା କାଳରେ ଏପରି ଭୁଲ୍ ତାଙ୍କର ହୃଦଘାତ କରିଦେବ ବୋଲି ମିଡିଆ ରିପୋର୍ଟରେ ପ୍ରକାଶ ପାଇଛି । ଆହୁରି ମଧ୍ୟ ସେ ଏନେଇ ଖାଉଟି ଅଦାଲତଙ୍କ ଦ୍ୱାରସ୍ଥ ହେବେ ବୋଲି କହିଛନ୍ତି ।

Published On June 17, 2021