ନବାନ୍ନ ଲାଗି ପାଇଁ ବାହାରିଲା ନୂଆଖାଇ ଲଗ୍ନ; ସେପ୍ଟେମ୍ବର ୮ ସକାଳ ୯ଟା ୩୫ରୁ ୧୦ଟା ୭ ମଧ୍ୟରେ ନବାନ୍ନ ଲାଗି

ବଲାଙ୍ଗିର: ନବାନ୍ନ ଲାଗି ପାଇଁ ବାହାରିଲା ନୂଆଖାଇ ଲଗ୍ନ । ସେପ୍ଟେମ୍ବର ୮ରେ ଇଷ୍ଟଦେବୀଙ୍କ ନିକଟରେ ଲାଗି ହେବ ନବାନ୍ନ । ରବିବାର ସକାଳ ୯ଟା ୩୫ରୁ ୧୦ଟା ୭ ମଧ୍ୟରେ ନବାନ୍ନ ଲାଗି । ଇଷ୍ଟଦେବୀଙ୍କ ନିକଟରେ ନବାନ୍ନ ଲାଗି ପରେ ସମସ୍ତେ ନୂଆ ଖାଇବେ ।

ଚିରା ଚରିତ ପ୍ରଥାନୁଯାୟୀ ସମଗ୍ର ବଲାଙ୍ଗିର ଜିଲ୍ଲାର ଜ୍ୟୋତିଷ ପଣ୍ଡିତ ମହାସଭାର ନବାନ୍ନ ଲଗ୍ନ ନିର୍ଣ୍ଣାୟକ କମିଟିର ସିଦ୍ଧାନ୍ତ କ୍ରମେ ପୂର୍ବ ତନ ପାଟଣାଷ୍ଟେଟ ତଥା ମହାରାଜାଙ୍କ ଇଷ୍ଟଦେବୀ ଶ୍ରୀ ଶ୍ରୀ ପାଟଣେଶ୍ଵରୀ ଓ ସମଲେଶ୍ବରୀ ଙ୍କ ରାଶିନକ୍ଷତ୍ର ଏବଂ ପୂର୍ବ ପରମ୍ପରା ଅନୁଯାୟୀ ଚଳିତ ବର୍ଷ ଭାଦ୍ରବ ଶୁକ୍ଳପକ୍ଷ ପଞ୍ଚମୀ ତା. ୮-୯-୨୦୨୪ ରବିବାର ବିଶୁଦ୍ଧ ତୁଳ ଲଗ୍ନ ଶୁଭ ବେଳାରେ ଦିବା ଘ.୯.୩୫ ମି. ରୁ ଘ.୧୦.୭ ମି. ମଧ୍ଯ ସମଗ୍ର ବଲାଙ୍ଗିର ଜିଲ୍ଲାରେ ନବାନ୍ନ ବିଧ ଅନୁଷ୍ଠିତ ହେବ ।

ନୂଆଖାଇରେ ସମସ୍ତେ ମିଶି ଏକାଠି ନୂଆ ଖାଇଥାନ୍ତି। ପରେ ଆରମ୍ଭ ହୁଏ ଭେଟଘାଟ କାର୍ଯ୍ୟକ୍ରମ। ଘରର ବଡ ମାନଙ୍କୁ ଜୁହାର କରି ଆଶୀର୍ବାଦ ନିଅନ୍ତି ସମସ୍ତ । ଏହି ପର୍ବକୁ ବେଶ୍‌ ଉତ୍ସାହର ସହ ପଶ୍ଚିମ ଓଡ଼ିଶାରେ ପାଳନ କରାଯାଇଥିବା ବେଳେ ଘରେ ଘରେ ସମସ୍ତେ ନୂଆ ବସ୍ତ୍ର ପିନ୍ଧିଥାନ୍ତି।

ଏନେଇ ରାଜପୁରୋହିତ କହିଛନ୍ତି, ନୂଆଖାଇ ହେଉଛି ଆମ ଗଣପର୍ବ, ଭାଇଚାରାର ପର୍ବ । ନିୟମ ଅଛି ଆମର ନୂଆ ଫସଲ ହେଲେ ଦେବାଦେବୀଙ୍କ ନିକଟରେ ଲାଗି କରାଯାଇଥାଏ । ତେଣୁ ଅମୃତ ବେଳାରେ ନୂଆ ଫସଲକୁ ଦେବାଦେବୀଙ୍କ ନିକଟରେ ଲାଗି କରାଯାଇଥାଏ ।

ଲଗ୍ନ ଧାର୍ଯ୍ୟ ହେବା ପରେ ଏନେଇ ଆମେ ରାଜାଙ୍କୁ ଅବଗତ କରିବୁ । ରାଜା ଏହାକୁ ଅନୁମୋଦନ କରିବେ। ପରେ ଘୋଷଣାପତ୍ର ଛପାଯାଇ ଗାଁ ଗାଁ ପଠାଯିବ । ଏହାଦ୍ୱାରା ଅମୃତ କାଳରେ ନୂଆ ଫସଲ ଦେବାଦେବୀଙ୍କ ନିକଟରେ ଅର୍ପଣ କରିବାକୁ ସେ ରାଜ୍ୟ ସାରା ଲୋକଙ୍କୁ ଅବଗତ କରାଇଥାନ୍ତି ବୋଲି କହିଛନ୍ତି ରାଜ ପୁରୋହିତ ।

ପ୍ରଥମେ ଇଷ୍ଟଦେବୀଙ୍କୁ ଲଗ୍ନପତ୍ର ଦେବା ପରେ ଗାଁ ଗାଁକୁ ପ୍ରେରଣ କରାଯିବ। ତା' ପରେ ଆରମ୍ଭ ହୋଇଯିବ ନୂଆଖାଇ ପାଇଁ ପ୍ରସ୍ତୁତି। ନୂଆଖାଇ ପଶ୍ଚିମ ଓଡ଼ିଶାର ଗଣ ପର୍ବ ହୋଇଥିବାରୁ ପରିବାର ସଦସ୍ୟ ଯିଏ ଯେଉଁଠି ଥିଲେ ବି ଘରମୁହାଁ ହୋଇଥାଆନ୍ତି।