ଅଶ୍ଳୀଳ ଭିଡିଓ ଓ ଫଟୋ ଭାଇରାଲ, ଆତ୍ମହତ୍ୟା କଲେ ନାବାଳିକା

Updated: Sunday, October 16, 2022, 8:46 [IST]

ଖୋର୍ଦ୍ଧା: ଅଶ୍ଳୀଳ ଭିଡିଓ ଓ ଫଟୋ ଭାଇରାଲ ପରେ ଜୀବନ ହାରିଲେ ଛାତ୍ରୀ । ଏଭଳି ଅଭାବନୀୟ ଘଟଣା ଖୋର୍ଦ୍ଧା ଜିଲ୍ଲା ନିରାକାରପୁର ଥାନା ପଦ୍ମପୁର ଅଞ୍ଚଳରେ ଦେଖିବା ପାଇଁ ମିଳିଛି । ନାବାଳିକା ଜଣକ ଯୁକ୍ତ ୨ର ଛାତ୍ରୀ । ମୃତ୍ୟୁ ପୂର୍ବରୁ ସେ ନିରାକରପୁର ଆଇଆଇସିଙ୍କୁ ଏକ ଚିଠି ମଧ୍ୟ ଲେଖିଛନ୍ତି । ସେପଟେ ଝିଅ ମୃତ୍ୟୁ ପରେ ନିର୍ଯାତନା ଦେଉଥିବା ଯୁବକଙ୍କ ବିରୋଧରେ ଥାନାରେ ଅଭିଯୋଗ କରିଛନ୍ତି ମୃତକଙ୍କ ବାପା ଓ ମା' ।

ସୂଚନା ଅନୁସାରେ, ଅଶ୍ଳୀଳ ଭିଡିଓ ଭାଇରାଲ ହେବା ପରେ ଲୋକଲଜ୍ଜା ସହିନପାରି ଛାତ୍ରୀ ଜଣକ ଆତ୍ମହତ୍ୟା କରିଥିଲେ । ଏକତରଫା ପ୍ରେମ କରି ବିଫଳ ହେବା ପରେ ଯୁବକ ଜଣକ ତାଙ୍କ ଭାଇଙ୍କ ସହ ମିଶି ନାବାଳିକାଙ୍କୁ ବାରମ୍ବାର ହଇରାଣ କରିବା ସହ ତାଙ୍କର କିଛି ଫଟୋ ମଧ୍ୟ ଭାଇରାଲ କରିଥିଲେ । ଏପରିକି ଅନେକ ଥର ତାଙ୍କୁ କଲେଜ ଯିବା ସମୟରେ ହଇରାଣ କରୁଥିଲେ । ପୂର୍ବରୁ ମଧ୍ୟ ନିରାକାରପୁର ଥାନାରେ ଯୁବକଙ୍କ ବିରୋଧରେ ଅଭିଯୋଗ ହୋଇଥିଲା ପୋଲିସ ଉପସ୍ଥିତିରେ ମାମଲାର ଆପୋଷ ସମାଧାନ ହୋଇଥିଲା ଏପରିକି ଯୁବକ ଜଣ ଆଗକୁ ଏପରି କିଛି କରିବେ ନାହିଁ ବୋଲି ଲିଖିତ ପ୍ରତିଶ୍ରୁତି ଦେଇଥିଲେ ।

ହେଲେ ଯୁବକ ଜଣକ ପୁଣି ନାବାଳିକାଙ୍କୁ ହଇରାଣ କରିବା ସହ ତାଙ୍କର କିଛି ଅଶ୍ଳୀଳ ଫଟୋକୁ ଭାଇରାଲ କରିଦେଇଥିଲେ । ନାବାଳିକାଙ୍କ ଘର ସମ୍ମୁଖକୁ ଆସି ହତ୍ୟା ଧମକ ଦେବା ସହ ଏସିଡ ପକାଇ ପୋଡି ଦେବେ ବୋଲି ଧମକ ଦେବା ପରେ ନାବାଳିକା ଜଣକ ଏପରି ନିଷ୍ପତି ନେଇଛନ୍ତି ବୋଲି ପରିବାର ପକ୍ଷରୁ ଅଭିଯୋଗ କରାଯାଇଛି । ଏନେଇ ଅଭିଯୋଗ ପରେ ପୋଲିସ ତଦନ୍ତ ଆରମ୍ଭ କରିବା ସହ ଅଭିଯୁକ୍ତ ସହ ଅନ୍ୟ ପରିବାର ସଦସ୍ୟଙ୍କୁ ଅଟକ ରଖି ପଚରାଉଚୁରା କରୁଛି ।