ଗଣିତ ଓ ବିଜ୍ଞାନ ଶିକ୍ଷାକୁ ତ୍ୱରାନ୍ୱିତ କରାଯିବ: 'ମୋ ସ୍କୁଲ' ଓ ଖାନ୍ ଏକାଡେମୀ ଇଣ୍ଡିଆ ମଧ୍ୟରେ ବୁଝାମଣାପତ୍ର ସ୍ୱାକ୍ଷର

Published: Saturday, October 7, 2023, 21:53 [IST]

ଭୁବନେଶ୍ୱର: ବିଦ୍ୟାଳୟ ଓ ଗଣଶିକ୍ଷା ଅଧିନରେ ଥିବା ସରକାରୀ ଓ ସରକାରୀ ଅନୁଦାନପ୍ରାପ୍ତ ବିଦ୍ୟାଳୟରର ଛାତ୍ରଛାତ୍ରୀମାନଙ୍କ ପାଇଁ ଆଉ ଏକ ନୂଆ ପଦକ୍ଷେପ ଗ୍ରହଣ କରିଛି 'ମୋ ସ୍କୁଲ ଅଭିଯାନ' । ଷଷ୍ଠରୁ ଦ୍ୱାଦଶ ଶ୍ରେଣୀ ଛାତ୍ରଛାତ୍ରୀଙ୍କ ଗଣିତ ଓ ବିଜ୍ଞାନ ଶିକ୍ଷାକୁ ଅଧିକ ସୁଦୃଢ଼ କରାଯିବ । ଛାତ୍ରଛାତ୍ରୀ ସହଜରେ ବିଜ୍ଞାନ ଓ ଗଣିତର ପାଠ୍ୟକ୍ରମକୁ ଶିଖିପାରିବେ । ଏହାଦ୍ୱାରା ଉକ୍ତ ବିଷୟ ପ୍ରତି ଥିବା ସେମାନଙ୍କର ଭୟ ଦୂର ହେବ । ଏନେଇ 'ମୋ ସ୍କୁଲ ଅଭିଯାନ' ଓ 'ଖାନ୍ ଏକାଡେମୀ ଇଣ୍ଡିଆ' ମଧ୍ୟରେ ଏକ ବୁଝାମଣାପତ୍ର ସ୍ୱାକ୍ଷର ହୋଇଛି ।

ମୋ ସ୍କୁଲ ଅଭିଯାନ ପରିଚାଳନା ସଂଗଠନର ସଦସ୍ୟ ସଚିବ ତଥା ଓସେପାର ରାଜ୍ୟ ପ୍ରକଳ୍ପ ନିର୍ଦ୍ଦେଶକ ଅନପୁମ ସାହା ଓ ଖାନ୍ ଏକାଡେମୀର ଭାରତ ଶାଖା-ନିର୍ଦ୍ଦେଶକ ସ୍ୱାତୀ ଭାଉଦେବାନଙ୍କ ଉପସ୍ଥିତିରେ ଏହି ଏମ୍‌ଓୟୁ ସ୍ୱାକ୍ଷର କରିଛନ୍ତି । ଏମ୍‌ଓୟୁ ଅନୁସାରେ ଆଗମୀ ଶିକ୍ଷା ବର୍ଷରୁ ରାଜ୍ୟର ସମସ୍ତ ସରକାରୀ ଓ ସରକାରୀ ଅନୁଦାନପ୍ରାପ୍ତ ବିଦ୍ୟାଳୟରେ ନବମ ଓ ଦଶମ ଶ୍ରେଣୀ ଛାତ୍ରଛାତ୍ରୀଙ୍କୁ ଉତ୍ତମ ଜ୍ଞାନକୌଶଳ ମାଧ୍ୟମରେ ଗଣିତ ଓ ବିଜ୍ଞାନ ଶିକ୍ଷା ଦିଆଯିବ । ପ୍ରାରମ୍ଭିକ ପର୍ଯ୍ୟୟରେ ୨୦୨୩-୨୪ ଶିକ୍ଷାବର୍ଷରୁ ୨୦୨୭-୨୮ ଶିକ୍ଷାବର୍ଷ ପର୍ଯ୍ୟନ୍ତ ଏହି କାର୍ଯ୍ୟକ୍ରମ ଜାରି ରହିବ ।

ନୂତନ ଅଭିନବ ଉପାୟରେ ଛାତ୍ରଛାତ୍ରୀଙ୍କ ଆଗ୍ରହ ବୃଦ୍ଧି ସହ ଏହି ଦୁଇଟି ବିଷୟକୁ ଅଧିକ ବ୍ୟାପକ କରାଯିବ । ଛାତ୍ରଛାତ୍ରୀ, ଶିକ୍ଷକ-ଶିକ୍ଷୟିତ୍ରୀ ଏସମ୍ବନ୍ଧୀୟ ସହାୟକ ଉପକରଣ ଖାନ୍ ଏକାଡେମୀର ଓଡି଼ଆ ଓ ଇଂରାଜୀ ୱେବସାଇଟ୍‌ରେ ପାଇପାରିବେ । ସେହିପରି ଶିକ୍ଷକମାନେ ଯେପରି ସହଜ ଉପାୟରେ ଛାତ୍ରଛାତ୍ରୀଙ୍କୁ ଶିକ୍ଷା ଦେଇପାରିବେ ସେଦିଗରେ ସେମାନଙ୍କୁ ପ୍ରୋତ୍ସାହିତ କରିବାକୁ ସମୟ ବ୍ୟବଧାନରେ ବିଭିନ୍ନ କ୍ୟାମ୍ପେନ୍ କରାଯିବ । ଏସମ୍ବନ୍ଧିତ କୌଣସି ନୂତନ କାର୍ଯ୍ୟପନ୍ଥା ଅବଲମ୍ବନ କରାଯିବ ତାହା 'ମୋ ସ୍କୁଲ' ଓ ଶିକ୍ଷକ ଶିକ୍ଷା ନିର୍ଦ୍ଦେଶାଳୟ ଏବଂ ରାଜ୍ୟ ଶିକ୍ଷା ଗବେଷଣା ଓ ପ୍ରଶିକ୍ଷଣ ପରିଷଦ ଏବଂ ମାଧ୍ୟମିକ ଶିକ୍ଷା ବୋର୍ଡର ପ୍ରତ୍ୟେକ୍ଷ ତତ୍ତ୍ୱାବଧାନରେ କରାଯିବ ।

Published On October 7, 2023