ଛତିଶଗଡ଼ ବିଜାପୁର ଜିଲ୍ଲାରେ ମାଓବାଦୀଙ୍କ ବର୍ବରକାଣ୍ଡ; ବିଜେପି ନେତାଙ୍କୁ ନିର୍ମମ ହତ୍ୟା

Updated: Saturday, March 2, 2024, 10:29 [IST]

ଛତିଶଗଡ଼ ବିଜାପୁର ଜିଲ୍ଲାରେ ମାଓବାଦୀଙ୍କ ବର୍ବରକାଣ୍ଡ ଦେଖିବାକୁ ମିଳିଛି । BJP ନେତା ତିରୁପତି କୋଟଲାକୁ ଧାରୁଆ ଅସ୍ତ୍ରରେ ହାଣି ହତ୍ୟା କରିଛନ୍ତି । ମାଓବାଦୀ ତେୟନାର ଗାଁରେ ବାହାଘର ପାର୍ଟିରେ ଯୋଗ ଦେବାକୁ ଯାଇଥିବା ବେଳେ ତାଙ୍କୁ ହତ୍ୟା କରାଯାଇଛି ।

ପୋଲିସ ଷ୍ଟେସନଠାରୁ ପ୍ରାୟ ୭୦୦ ମିଟର ଦୂରରେ ଏହି ଘଟଣା ଦେଖିବାକୁ ମିଳିଛି । ସ୍ଥାନୀୟ ଲୋକ ଗୁରୁତର ଅବସ୍ଥାରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରିଥିଲେ । ହେଲେ ଅତ୍ୟଧିକ ରକ୍ତସ୍ରାବ ହେତୁ ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି । ମାଓବାଦୀଙ୍କ ବିରୋଧରେ ଏକ ମାମଲା ରୁଜୁ ହୋଇଛି ଏବଂ ତଦନ୍ତ ଚାଲିଛି ।

ଛତିଶଗଡର ମନ୍ତ୍ରୀ କେଦାର କାଶ୍ୟପ ଏନେଇ ଦୁଃଖ ପ୍ରକାଶ କରିଛନ୍ତି । ସୋସିଆଲ ମିଡିଆରେ ସେ ଲେଖିଛନ୍ତି, "ବିଜେପୁର ବିଜେପି ନେତା ତଥା ତିରୁପତି କୋଟଲାଙ୍କର ଦେହାନ୍ତ ଖବର ଶୁଣି ମୁଁ ଦୁଃଖିତ। ଅମର ଆତ୍ମାଙ୍କ ଶାନ୍ତି ପାଇଁ ଭଗବାନଙ୍କୁ ପ୍ରାର୍ଥନା କରୁଛି । ମୃତ ତିରୁପତି କୋଟଲା ସ୍ଥାନୀୟ ଅଞ୍ଚଳର ବିଜେପି ନେତା । ସେ କୋଅପରେଟିଭ୍ ସେଲ୍ କମିଟିର ଜିଲ୍ଲା ସଦସ୍ୟ ତଥା ସଂଯୋଜକ ମଧ୍ୟ ଥିଲେ ।

ବିଜାପୁର ଏସପି ଜିତେନ୍ଦ୍ର ଯାଦବଙ୍କ ଅନୁଯାୟୀ, ଏକ ବିବାହ ଉତ୍ସବରେ ଯୋଗଦେବା ପାଇଁ ତିରୁପତି କୋଟଲା ତୋୟନାର ଗାଁକୁ ଯାଇଥିଲେ। ଆଉ ସେଠାରୁ ଫେରିବା ବେଳେ ମାଓବାଦୀମାନେ ତାଙ୍କୁ ଆକ୍ରମଣ କରିଥିଲେ । ତାଙ୍କର ବେକ, ପେଟ ଏବଂ ଶରୀରର ବିଭିନ୍ନ ସ୍ଥାନରେ ଗଭୀର ଆଘାତ ଲାଗିଥିଲା ।

ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ଜିଲ୍ଲା ପ୍ରଶାସନର ସମସ୍ତ ଅଧିକାରୀ ଏବଂ ବିଜେପିର ବହୁ ବଡ ନେତା ଡାକ୍ତରଖାନାରେ ପହଞ୍ଚିଥିଲେ । ତିରୁପତି ବହୁ ବର୍ଷ ଧରି ବିଜେପିରେ ସକ୍ରିୟ ଥିଲେ।
ସେ ନକ୍ସଲମାନଙ୍କ ଟାର୍ଗେଟ ତାଲିକାରେ ମଧ୍ୟ ଥିଲେ । ଗତ ଏକ ବର୍ଷ ମଧ୍ୟରେ ବସ୍ତର ଡିଭିଜନରେ ବିଜେପି ନେତାଙ୍କୁ ହତ୍ୟା ଘଟଣାର ଏହା ହେଉଛି ଷଷ୍ଠ ଘଟଣା । ଏହା ପୂର୍ବରୁ ନରାୟଣପୁର, ସୁକମା ଏବଂ ବିଜାପୁରରେ ନକ୍ସଲମାନେ ବିଜେପି ନେତାଙ୍କୁ ହତ୍ୟା କରିଥିଲେ।