ମହାନଦୀ ପ୍ରସଙ୍ଗରେ ପୁଣି ସରଗରମ ହେଲା ଗୃହ, ଉତ୍ତର ମାଗିଲେ ବିରୋଧୀଦଳ ନେତା

Published: Tuesday, March 28, 2023, 15:05 [IST]

ଭୁବନେଶ୍ୱର: ବିଧାନସଭା ଶୂନ୍ୟକାଳରେ ଉଠିଲା ମହାନଦୀ ଜଳ ସଂକଟ ପ୍ରସଙ୍ଗ । ମହାନଦୀ ପ୍ରସଙ୍ଗରେ ପୁଣି ସରଗରମ ହେଲା ଗୃହ । ପ୍ରସଙ୍ଗ ଉଠାଇ ସରକାରଙ୍କୁ ପ୍ରଶ୍ନ କଲେ ବିରୋଧୀ ଦଳ ନେତା ଜୟ ନାରାୟଣ ମିଶ୍ର । ମହାନଦୀ ପ୍ରସଙ୍ଗ ଉପରେ ମୋସନ ଆକାରରେ ଆଲୋଚନା ହେଉ ଓ ବିଭାଗୀୟ ମନ୍ତ୍ରୀ ଉତ୍ତର ରଖନ୍ତୁ ବୋଲି ସେ ଦାବି କରିଛନ୍ତି ।

ବିରୋଧୀ ଦଳ ନେତା କହିଛନ୍ତି, ଗତ ୨୦୧୭ ମସିହା ଡିସେମ୍ବର ୭ ତାରିଖରେ ତତ୍କାଳୀନ ବାଚସ୍ପତି ପ୍ରଦୀପ କୁମାର ଅମାତଙ୍କ ଅଧ୍ୟକ୍ଷତାରେ ମହାନଦୀ ପ୍ରସଙ୍ଗରେ ଏକ ସର୍ବଦଳୀୟ କମିଟି ଗଠନ ହୋଇଥିଲା । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଏକ ସର୍ବଦଳୀୟ କମିଟି ଗଠନ ହୋଇଥିଲା । କଣ ସବୁ ନିଷ୍ପତ୍ତି ହୋଇଥିଲା , କେବେ ଏହି କମିଟିର ବୈଠକ ବସିଥିଲା ବିଭାଗୀୟ ମନ୍ତ୍ରୀ ଉତ୍ତର ରଖନ୍ତୁ । ଜଳ ଟ୍ରିବ୍ୟୁନାଲ ପାଇଁ ୫ଜଣିଆ କମିଟି ଗଠନ ହୋଇଥିଲା । ଏଥିପାଇଁ କେତେ ଅର୍ଥ ଖର୍ଚ୍ଚ ହୋଇଛି? ଟ୍ରିବ୍ୟୁନାଲ ତାରିଖ କାହିଁକି ବାରମ୍ବାର ଘୁଞ୍ଚିଯାଉଛି ବୋଲି ପ୍ରଶ୍ନ କରିଛନ୍ତି ଜୟ ନାରାୟଣ ମିଶ୍ର ।

ସେପଟେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି ଯେ, ଗୃହ କମିଟିର ବୈଠକ ଗୋଟେ ଥର ବି ହୋଇନାହିଁ । ଏଥିରୁ ସ୍ପଷ୍ଟ ଆମେ ମହାନଦୀକୁ ନେଇ ତତ୍ପର । ମହାନଦୀ ବିବାଦକୁ ନେଇ କେନ୍ଦ୍ରର ଜଳ ସମ୍ପଦ ମନ୍ତ୍ରୀ ବି ଓଡ଼ିଶାର କିନ୍ତୁ ତାଙ୍କର ବି ହସ୍ତକ୍ଷେପ ବି ହେଉନାହିଁ । ମୁଖ୍ୟମନ୍ତ୍ରୀ ୩ ତାରିଖରୁ ଜାପାନ ଯାଉଛନ୍ତି । ଆଉ ଏପଟେ ଗୃହରେ ମହାନଦୀକୁ ନେଇ ମୋସନ ଆଲୋଚନା ହେବ । ତେବେ ତାର ଗୁରୁତ୍ୱ କଣ ରହିବ । ୬ ତାରିଖ ଯାଏଁ ବିଧାନସଭା ଅଛି । ତାପରେ ଗଲେ ଯାଆନ୍ତୁ । ଅନେକ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଅଛି ଆଲୋଚନା ପାଇଁ ମୁଖ୍ୟମନ୍ତ୍ରୀ ଉପସ୍ଥିତ ରହିବେ ବୋଲି ଆଶା ।

Published On March 28, 2023