ସମ୍ବଲପୁର-ଝାରସୁଗୁଡ଼ା ବିଜୁ ଏକ୍ସପ୍ରେସ୍ ୱେରେ ଭୟଙ୍କର ସଡ଼କ ଦୁର୍ଘଟଣା, ମୃତ୍ୟୁ ସଂଖ୍ୟା ୭କୁ ବୃଦ୍ଧି

Updated: Saturday, September 17, 2022, 14:14 [IST]

ଝାରସୁଗୁଡ଼ା: ସମ୍ବଲପୁର-ଝାରସୁଗୁଡ଼ା ବିଜୁ ଏକ୍ସପ୍ରେସ୍ ୱେରେ ଗତକାଲି ରାତିରେ ମର୍ମନ୍ତୁଦ ଦୁର୍ଘଟଣା । ଦୁର୍ଘଟଣାରେ ମୃତ୍ୟୁ ସଂଖ୍ୟା ୭କୁ ବୃଦ୍ଧି, ୧୩ ଗୁରୁତରଙ୍କୁ ବୁର୍ଲା ମେଡିକାଲକୁ ସ୍ଥାନନ୍ତର କରାଯାଇଛି । ସେହିପରି ସାମାନ୍ୟ ଆହତଙ୍କୁ ଝାରସୁଗୁଡ଼ା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ୨୦ରୁ ଅଧିକ ଯାତ୍ରୀ ଆହତ ହୋଇଥିବା ନେଇ ସୂଚନା ରହିଛି । ଜେଏସଡବ୍ଲୁ କମ୍ପାନୀରୁ ଶ୍ରମିକ ନେଇ ଝାରସୁଗୁଡ଼ା ଯାଉଥିଲା ବସ୍ । ଗତକାଲି ସନ୍ଧ୍ୟା ପ୍ରାୟ ୭ ଟାରେ ଏକ ବସକୁ ହାଇୱା ପିଟିବା ଦ୍ୱାରା ଦୁର୍ଘଟଣା ହୋଇଥିଲା ।

ସୂଚନାଅନୁସାରେ, ଗତକାଲି ସନ୍ଧ୍ୟାରେ JSW କାରଖାନାରୁ ଶ୍ରମିକ ନେଇ ଯାଉଥିବା ବସ ସହ ଧକ୍କା ହୋଇଥିଲା ହାଇୱା । ବସରେ ପ୍ରାୟ ୫୨ରୁ ଅଧିକ କର୍ମଚାରୀ ଥିବା ନେଇ ସୂଚନା ରହିଛି । ସରବାହାଲ ନିକଟରେ ଏକ କୋଇଲା ବୋଝେଇ ହୋଇଥିବା ହାଇୱା ପ୍ରଥମେ ଦୁଇଟି ଗାଈଙ୍କୁ ଧକ୍କା ଦେଇ ଡିଭାଇଡର କ୍ରସ୍ କରି ରାସ୍ତା ଅପରପାର୍ଶ୍ୱରେ ଯାଉଥିବା ଏକ ବସକୁ ଧକ୍କା ଦେଇଥିଲା । ଦୁର୍ଘଟଣାରେ ଗୁରୁତରମାନଙ୍କୁ ସ୍ଥାନୀୟ ଲୋକେ ତୁରନ୍ତ ଉଦ୍ଧାର କରି ପ୍ରଥମ ଝାରସୁଗୁଡ଼ା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ ।