ନିଷ୍ଠୁର IICଙ୍କୁ ପୋଷ୍ଟିଂ ମନା : ଅଭିଯୁକ୍ତଙ୍କୁ ବ୍ୟବହାର ନେଇ ନେବେ ତାଲିମ

ଆଇଆଇସି ସନ୍ଧ୍ୟାରାଣୀ ଜେନାଙ୍କୁ ଦୁଇ ବର୍ଷ ଯାଏଁ ପୋଷ୍ଟିଂ ମନା ।

ଭୁବନେଶ୍ୱର : କେନ୍ଦୁଝର ପାଟଣା ଥାନାରେ ଜଣେ ଅଭିଯୁକ୍ତଙ୍କୁ ନିସ୍ତୁକ ମାଡ଼ ମାରିବା ଜଣେ ଆଇଆଇସିଙ୍କ ପାଇଁ ମହଙ୍ଗା ପଡିଛି । ସଂପୃକ୍ତ ଆଇଆଇସିଙ୍କୁ କୌଣସି ଥାନାରେ ଦୁଇ ବର୍ଷ ପାଇଁ ପୋଷ୍ଟିଂ ନଦେବାକୁ ରାଜ୍ୟ ମାନବାଧିକାର କମିଶନ ନିର୍ଦ୍ଦେଶ ଦେଇଛନ୍ତି । କେବଳ ସେତିକି ନୁହେଁ ସଂପୃକ୍ତ ଆଇଆଇସି ଅଭିଯୁକ୍ତଙ୍କୁ କିଭଳି ବ୍ୟବହାର କରିବେ ସେନେଇ ତାଲିମ ନେବାକୁ ମଧ୍ୟ ରାଜ୍ୟ ମାନବାଧିକାର କମିଶନ ନିର୍ଦ୍ଦେଶ ଦେଇଛନ୍ତି ।

ସୂଚନାଥାଉକି, କେନ୍ଦୁଝର ପାଟଣା ଥାନାରେ ଆଇଆଇସି ସନ୍ଧ୍ୟାରାଣୀ ଜେନା ନିଯୁକ୍ତ ହୋଇଥିଲେ । ଗତ ମେ ମାସରେ ଥାନାରେ ସନ୍ଧ୍ୟାରାଣୀ ଜଣେ ଅଭିଯୁକ୍ତଙ୍କୁ ନିସ୍ତୁକ ମାଡ ମାରୁଥିବା ଭିଡିଓ ଭାଇରାଲ୍ ହୋଇଥିଲା । ଏହି ଘଟଣାରେ ଆଇଆଇସିଙ୍କୁ ନିଲମ୍ବନ କରାଯାଇଥିଲା । ଘଟଣାକୁ ରାଜ୍ୟ ମାନବାଧିକାର କମିଶନ ଗୁରୁତର ଭାବେ ନେବା ସହ କେନ୍ଦୁଝର ଏସପିଙ୍କୁ ଜବାବ ତଲବ କରିଥିଲେ । ଏଥିସହ ମାଡ଼ ଖାଇଥିବା ଯୁବକଙ୍କୁ କ୍ଷତିପୂରଣ ଦେବାକୁ ନିର୍ଦ୍ଦେଶ ଦିଆଯାଇଥିଲା । କ୍ଷତିପୂରଣ ବାବଦକୁ 10 ହଜାର ଟଙ୍କା ସନ୍ଧ୍ୟାରାଣୀଙ୍କୁ ଦରମାରୁ ମଧ୍ୟ କାଟିବାକୁ କୁହାଯାଇଥିଲା । ଶେଷରେ ଆଇଆଇସି ସନ୍ଧ୍ୟାରାଣୀଙ୍କ ପୋଷ୍ଟିଂ ଉପରେ କଟକଣା ଲଗାଇଛନ୍ତି ରାଜ୍ୟ ମାନବାଧିକାର କମିଶନ । ଦୁଇ ବର୍ଷ ଯାଏଁ କୌଣସି ସ୍ଥାନରେ ତାଙ୍କୁ ପୋଷ୍ଟିଂ ନଦେଇ ଅଭିଯୁକ୍ତଙ୍କୁ ବ୍ୟବହାର ନେଇ ତାଲିମ ଦେବାକୁ ନିର୍ଦ୍ଦେଶ ଦେଇଛନ୍ତି ରାଜ୍ୟ ମାନବାଧିକାର କମିଶନ ।

English summary

OHRC Ordered To IIC Posting Prohibited For Two Years