ତାତିରୁ ମିଳିବ ତ୍ରାହି! , 7 ଟି ଜିଲ୍ଲାରେ ବର୍ଷା ସମ୍ଭାବନା
ମଙ୍ଗଳବାର ରାଜ୍ୟର ଅନେକ ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।
ଭୁବନେଶ୍ୱର: ତତଲା ତାୱାରେ ଫୁଟୁଛି ଓଡିଶା । ପ୍ରଚଣ୍ଡ ଗ୍ରୀଷ୍ମ ପ୍ରବାହରେ ଅସ୍ତବ୍ୟସ୍ତ ଜନ ଜୀବନ । ତେବେ ଆଜି ଏହି ତାତିରୁ ସାମାନ୍ୟ ଆଶ୍ୱସ୍ତି ମିଳିପାରେ । ମଙ୍ଗଳବାର ରାଜ୍ୟର ଅନେକ ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।
ଆଇଏମଡି ଓଡିଶା ମଧ୍ୟାହ୍ନ ବୁଲେଟିନରେ କହିଛି ଯେ, ମାଲକାନଗିରି, କୋରାପୁଟ, ନବରଙ୍ଗପୁର, ରାୟାଗଡା, ଗଜପତି, ମୟୂରଭଞ୍ଜ ଏବଂ ବାଲାସୋର ଜିଲ୍ଲାର ଗୋଟିଏ କିମ୍ବା ଦୁଇଟି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି।
ସେହିପରି ପାଣିପାଗ କେନ୍ଦ୍ର କହିଛି ଯେ, ଆଗାମୀ 5 ଦିନ ପର୍ଯ୍ୟନ୍ତ ସର୍ବାଧିକ ତାପମାତ୍ରା (ଦିନର ତାପମାତ୍ରା) ରେ କୌଣସି ପରିବର୍ତ୍ତନ ହେବ ନାହିଁ । ଆଭ୍ୟନ୍ତରୀଣ ଓଡିଶାର କିଛି ସ୍ଥାନରେ ସର୍ବାଧିକ ତାପମାତ୍ରା 2ରୁ 3 ଡିଗ୍ରୀ ସେଲସିୟସଠାରୁ ଅଧିକ ହେବାର ସମ୍ଭାବନା ଅଧିକ ରହିଛି ।
ଗତ 24 ଘଣ୍ଟା ମଧ୍ୟରେ, ମାଲକାନଗିରିରେ 15.8 ମିଲିମିଟର ବର୍ଷା ଏବଂ କୋରାପୁଟ ଜିଲ୍ଲାର ସିମିଲିଗୁଡା 8.2 ମିଲିମିଟର ବର୍ଷା ହୋଇଛି । ସୋମବାର ଦିନ ତିନୋଟି ସହରରେ ସର୍ବାଧିକ ଦିନର ତାପମାତ୍ରା 42 ଡିଗ୍ରୀ ସେଲସିୟସ ଅତିକ୍ରମ କରିଥିବାବେଳେ ଅନ୍ୟ 4 ଟି ସ୍ଥାନରେ 40 ଡିଗ୍ରୀ ପାରଦ ଟପିଛି । ଗତକାଲି 42.6 ଡିଗ୍ରୀ ସେଲସିୟସ ସହିତ ବାଲାଙ୍ଗୀର ସବୁଠାରୁ ଉତ୍ତପ୍ତ ସ୍ଥାନ ଥିଲା । ସେହିପରି ଟିଟଲାଗଡରେ 42.5 ଡିଗ୍ରୀ ଏବଂ ବୌଦ୍ଧରେ ତାପମାତ୍ରା 42 ଡିଗ୍ରୀ ସେଲସିୟସ ରେକର୍ଡ କରାଯାଇଥିଲା ।
Click it and Unblock the Notifications
Sign in with Google