ଓଡ଼ିଶାରେ ୧୨ ଦିନ ଧରି ଲୁଚିଥିଲା ଗୁଡ୍ଡୁ ମୁସଲିମ !

Published: Tuesday, April 25, 2023, 18:32 [IST]

Guddu Muslim in Odisha: ଓଡ଼ିଶାରେ ୧୨ ଦିନ ଥିଲା ମୋଷ୍ଟ ୱାଣ୍ଟେଡ୍ ଗ୍ୟାଙ୍ଗଷ୍ଟର ଗୁଡ୍ଡୁ ମୁସଲିମ୍ । ରାଜ୍ୟ ଭିତରେ ଏପ୍ରିଲ ୨ ତାରିଖରୁ ୧୩ ତାରିଖ ପର୍ଯ୍ୟନ୍ତ ଥିଲା ଗୁଡ୍ଡୁ । ଏଭଳି କିଛି ତଥ୍ୟ ଏବେ ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି ।

ପୋଲିସର ସୂଚନା ଅନୁସାରେ, ଗୁଡୁ ମୁସଲିମ୍ ଓଡ଼ିଶାରୁ ଛତିଶଗଡ଼ ଚମ୍ପଟ ମାରିଥିଲା । ଯିବା ସମୟରେ ଗୁଡୁ ମୁସଲିମର ବ୍ୟାଗ୍ ଓ କପଡ଼ା ରହିଯାଇଥିବା ସୂଚନା ମିଳିଛି । ଗୁଡୁ ମୁସଲିମ ଓଡ଼ିଶା ଆସି ରାଜା ଖାନକୁ ଭେଟିବା ଖବର ସାମ୍ନାକୁ ଆସିବା ପରେ ଉତ୍ତରପ୍ରଦେଶ ଏସଟିଏଫ୍ ରାଜା ଖାନକୁ ପଚରା ଉଚରା କରୁଥିଲା । ଏନେଇ ଓଡ଼ିଶା ଏସପି ମଧ୍ୟ ସୂଚନା ଦେଇଥିଲେ ।

ପୁରୀରୁ ସେ ବରଗଡ଼ ଯାଇଥିଲା, ପୁଣି ସେଠୁ ଛତିଶଗଡ଼ ପଲାଇଥିବା ଜଣାପଡ଼ିଛି । ୟୁପି ପୋଲିସକୁ ଚକମା ଦେଇ ଗୁଡ୍ଡୁ ମିରଟ, ଆଜମେର, ଝାନସୀ, ନାସିକ, ପୁଣେ ଓ ପରେ କର୍ଣ୍ଣାଟକ ଯାଇଥିଲା । ଏସବୁ ପରେ ଆତ୍ମଗୋପନ କରିବାକୁ ସେ ଓଡ଼ିଶା ଆସିଥିଲା । ତା'ସହ ବରଗଡ଼ରୁ ଛତିଶଗଡ଼ ଯିବା ବେଳେ ଏକ ବ୍ୟାଗ୍ ଛାଡ଼ି ପଳାଇଥିଲା ଗୁଡ୍ଡୁ । ଯାହାକୁ ୟୁପି ଏସଟିଏଫ୍ ଜବତ କରିଥିବା ଚର୍ଚ୍ଚା ହେଉଛି ।

ସୂଚନାନୁସାରେ, ଉମେଶ ପାଲ ହତ୍ୟାକାଣ୍ଡରେ ସଂପୃକ୍ତ ଥିବା ୧୦ଜଣଙ୍କ ମଧ୍ୟରେ ଗୁଡୁ ମୁସଲିମ ହେଉଛି ଅନ୍ୟତମ । ହତ୍ୟା, ଅପହରଣ ଭଳି ଅପରାଧ ସହ ଅଣ୍ଡରୱାର୍ଲ୍ଡ ସହ ଗୁଡୁ ମୁସଲିମର ଲିଙ୍କ ଥିବା କୁହାଯାଉଛି । ଆତତାୟୀ ଗୁଳିରେ ମୃତ୍ୟୁବରଣ କରିଥିବା ଗ୍ୟାଙ୍ଗଷ୍ଟର ଅତିକ ଅହମ୍ମଦର ଦିନେ ଘନିଷ୍ଠ ସହଯୋଗୀ ଥିଲା । ଏମିତିକି ଗୁଡୁ ମୁସଲିମ ଜେଲରେ ଥିବା ସମୟରେ ଅତିକ ତାକୁ ମୁକୁଳାଇଥିବା କୁହାଯାଏ ।

Published On April 25, 2023