ପୂର୍ବତନ ଶ୍ରୀମନ୍ଦିର ପ୍ରଶାସକ ରବୀନ୍ଦ୍ର ନାରାୟଣ ମିଶ୍ରଙ୍କ ଦେହାନ୍ତ, ଦେଖିଥିଲେ ଭିତର ରତ୍ନ ଭଣ୍ଡାର

Updated: Thursday, September 7, 2023, 11:32 [IST]

ପୁରୀ: ଆଖି ବୁଜିଲେ ରବୀନ୍ଦ୍ର ନାରାୟଣ ମିଶ୍ର । ଶ୍ରୀମନ୍ଦିରର ପୂର୍ବତନ ପ୍ରଶାସକ ରବୀନ୍ଦ୍ର ନାରାୟଣ ମିଶ୍ରଙ୍କ ପରଲୋକ ଘଟିଛି । ମୃତ୍ୟୁ ବେଳକୁ ତାଙ୍କୁ ୮୭ ବର୍ଷ ହୋଇଥିଲା ।

ଭୁବନେଶ୍ୱରରେ ଏକ ଘରୋଇ ହସ୍ପିଟାଲରେ ତାଙ୍କର ପରଲୋକ ଘଟିଛି । ହୃଦଘାତରେ ଶେଷ ନିଶ୍ୱାସ ତ୍ୟାଗ କରିଥିବା ନେଇ ପରିବାର ପକ୍ଷରୁ ସୂଚନା ଦେଇଛନ୍ତି ।

ଶ୍ରୀଜଗନ୍ନାଥ ସଂସ୍କୃତି ଗବେଷକ ଥିଲେ ରବୀନ୍ଦ୍ର ନାରାୟଣ ମିଶ୍ର । ଶ୍ରୀଜଗନ୍ନାଥ ସଂସ୍କୃତି, ଚେତନା ଉପରେ ସେ ୭ଟି ପୁସ୍ତକ ଲେଖିଛନ୍ତି ।
ଆକାଶ ଦୀପ ପୁସ୍ତକ ରଚନା କରିଥିଲେ ରବୀନ୍ଦ୍ର ନାରାୟଣ । ତାଙ୍କର ପୁସ୍ତକଗୁଡିକ ହେଉଛି-କଥାନୁଭୂତିରେ ଶ୍ରୀଜଗନ୍ନାଥ, କଥା ଅମୃତରେ ଶ୍ରୀଜଗନ୍ନାଥ, କଥା କୈବଲ୍ୟରେ ଶ୍ରୀଜଗନ୍ନାଥ, ବେଦର ମହିମା ଓ ଜଗନ୍ନାଥ' ଇତ୍ୟାଦି ।

'କଥାଟିଏ କହୁ'ର ସ୍ତମ୍ଭକାର ଥିଲେ ରବୀନ୍ଦ୍ର ନାରାୟଣ । ସେହିପରି 'ଆକାଶଦୀପ' ପରି କାଳଜୟୀ ଗଳ୍ପ ଓ 'କଥାନୁଭୂତିରେ ଶ୍ରୀଜଗନ୍ନାଥ', 'କଥାରେ କଥାରେ ଶ୍ରୀଜଗନ୍ନାଥ' ଇତ୍ୟାଦି ସତ୍ୟ ଅନୁଭୂତି ସମ୍ୱନ୍ଧିୟ ଲେଖା ସ୍ୱଗତ ମିଶ୍ର ଜୀବନ କାଳ ଭିତରେ ଲେଖିଛନ୍ତି। ଏହାଛଡ଼ା ତାଙ୍କର ଅନେକ ପୁସ୍ତକ ବିଭିନ୍ନ ଭାଷାରେ ମଧ୍ୟ ଅନୁବାତିତ ହୋଇଛି ।

ସେ ରାଜ୍ୟର ଜଣେ ଶ୍ରେଷ୍ଠ ପ୍ରାବନ୍ଧିକ ଥିବା ସହ ରାଜ୍ୟ ଓ ରାଜ୍ୟ ବାହାରେ ଜଗନ୍ନାଥ ସଂସ୍କୃତିର ପ୍ରଚାର ଓ ପ୍ରସାର କରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ । ତାଙ୍କର ବିୟୋଗ ରାଜ୍ୟର ପ୍ରତ୍ୟେକ ଜଗନ୍ନାଥ ଭକ୍ତଙ୍କ ଲାଗି ଅପୂରଣୀୟ କ୍ଷତି ହୋଇଛି । ରବୀନ୍ଦ୍ର ନାରାୟଣଙ୍କ ବିୟୋଗରେ ବିଭିନ୍ନ ମହଲରେ ଶୋକର ଛାୟା ଖେଳି ଯାଇଛି ।