ସୁନ୍ଦରଗଡରେ ହାତୀ ଆତଙ୍କ : କଲେ ଫସଲ ନଷ୍ଟ, ଭୟରେ ଅଞ୍ଚଳବାସୀ

ସୁନ୍ଦରଗଡ଼ : ସୁନ୍ଦରଗଡ଼ରେ ଥମୁନି ହାତୀ ଆତଙ୍କ । ମଣିଷ ଓ ହାତୀ ଲଢେଇରେ ପଡୁନି ପୂର୍ଣ୍ଣଚ୍ଛେଦ । ଜିଲ୍ଲାର ଦୁଇଟି ଜାଗାରେ ହାତୀ ଆତଙ୍କ ଦେଖିବାକୁ ମିଳିଛି । ସୁନ୍ଦରଗଡ଼ ସଦର ବ୍ଲକ ଅଞ୍ଚଳ ଓ ବଡ଼ଗାଁ ଫରେଷ୍ଟ ରେଞ୍ଜ ଅନ୍ତର୍ଗତ ମହାବୀର ପାହାଡ଼ରେ ହାତୀପଲଙ୍କ ଆତଙ୍କ ଦେଖିବାକୁ ମିଳିଛି ।

ବଡ଼ଗାଁ ଫରେଷ୍ଟ ରେଞ୍ଜରେ ୨୨ ଟିକିଆ ଝାଡ଼ଖଣ୍ଡୀ ହାତୀପଲଙ୍କ ଆତଙ୍କ ଦେଖିବାକୁ ମିଳିଛି । ପାହାଡ଼ରେ କିଛି ଦିନ ରହିବା ପରେ ଏବେ ହାତୀପଲ ଗାଁ ମୁହାଁ ହୋଇଛନ୍ତି । ମଙ୍ଗଳବାର ରାତିରେ ହାତୀପଲ ମୁକୁନ୍ଦପୁର, ଉଦାରମା ଗାଁରେ ପଶି ବିଲ ଗୁଡ଼ିକରୁ ଫସଲ ନଷ୍ଟ କରିଛନ୍ତି ।
ଲୋକମାନେ ଧାନ ଚାଷ କରିଥିବା ବେଳେ ହାତୀପଲ ପଶି ଏହାକୁ ନଷ୍ଟ କରୁଥିବାରୁ ଲୋକେ ଚିନ୍ତିତ ରହିଛନ୍ତି । ଅନ୍ୟପଟେ ହାତୀପଲ ଗାଁ ପାଖ ଜଙ୍ଗଲରେ ରହୁଥିବାରୁ ଲୋକେ ମଧ୍ୟ ଭୟଭୀତ ଅବସ୍ଥାରେ ରହିଛନ୍ତି । ହାତୀପଲଙ୍କୁ ଘଉଡାଇବାକୁ ଚେଷ୍ଟା ଜାରି ରଖିଥିଲେ ମଧ୍ୟ ଏଥିରେ ଫେଲ ମାରିଛନ୍ତି ବନ ବିଭାଗ ।

ସେହିପରି ସଦର ବ୍ଲକ ଅଞ୍ଚଳରେ ମାତିଛନ୍ତି ହାତୀ । ଏକ ମାସରୁ ଅଧିକ ହେବ ୪ ଟିକିଆ ହାତୀ ପଲ ସଦର ବ୍ଲକର କିଞ୍ଜିମା, ମହୁଲ ଜୋର, ଘଣ୍ଟିବୁଡ଼ ଅଞ୍ଚଳରେ ହାତୀ ଉପଦ୍ରବ ଦେଖିବାକୁ ମିଳିଛି ।

ହାତୀ ଦିନ ବେଳା ନିକଟସ୍ଥ ଜଙ୍ଗଲକୁ ଯିବା ସହିତ ସନ୍ଧ୍ୟା ହେଲେ ଗାଁ ମୁହାଁ ହେଉଛନ୍ତି । ଗାଁରେ ପଶି ଘରଦ୍ୱାର ଭାଙ୍ଗିବା ସହ ବ୍ୟାପକ ଫସଲ ନଷ୍ଟ କରୁଛନ୍ତି । ବନବିଭାଗ ହାତୀ ଘଉଡାଇବାରେ ବିଫଳ ହୋଇଛି । ଲୋକେ ରାତି ଅନିଦ୍ରା ହୋଇ ହାତୀକୁ ଜଗି ରହୁଛନ୍ତି । ଏହା ସୁନ୍ଦରଗଡରେ ଭୟର ବାତାବରଣ ସୃଷ୍ଟି କରିଛି ।

ହାତୀ-ମଣିଷ ଲଢେଇରୁ ଧନଜୀବନ ନଷ୍ଟ ରୋକିବାକୁ ବନ ବିଭାଗର ପ୍ରୟାସ ଜାରି ରଖିଛି । ଧନଜୀବନ ନଷ୍ଟ ରୋକିବାକୁ ବହୁସୁତ୍ରୀ ଫର୍ମୁଲା ଆପଣାଇବ ବନ ବିଭାଗ । 'ଗଜସାଥୀ' କାର୍ଯ୍ୟକ୍ରମରେ ଏଣିକି ୩ଟି ନୂଆ କାର୍ଯ୍ୟକ୍ରମ ଯୋଡ଼ି ହୋଇଛି। ରେଡ଼ିଓ କଲାରିଂ, ସୋଲାର ପାୱାର ଫେନ୍ସିଂ, ହାଇମାସ୍କ ଲାଇଟ ଲାଗିବ ।

English summary

Elephant make terror in odisha sundargarh