ମାଡ଼ି ଚାଲିଛି ଆଖିଧର ରୋଗ: ଜାଣନ୍ତୁ, କେମିତି କରିବେ ଏହାର ପ୍ରତିକାର ?

Published: Monday, July 10, 2023, 13:15 [IST]

ଭୁବନେଶ୍ୱର: ସାରା ରାଜ୍ୟରେ ଏବେ ଆଖିଧରା ରୋଗ ବ୍ୟାପିବାରେ ଲାଗିଛି । ସ୍ଥିତି ଏପରି ଯେ ଯାହାକୁ ଦେଖିବ ତାର ଆଖି ନାଲି । କ୍ୟାପିଟାଲ ହସ୍ପିଟାଲରେ ପ୍ରତିଦିନ ୬୦ରୁ ଅଧିକ ଆଖିଧରା ରୋଗୀ ଚିକିତ୍ସା ପାଇଁ ଆସୁଥିବାର ସୂଚନା ରହିଛି ।

ଏହି ଆଖିଧରା ସଂକ୍ରମଣରେ ଛୋଟ ଛୁଆ ମଧ୍ୟ ସାମିଲ ହୋଇଥିବା ସୂଚନା ରହିଛି । ତେବେ ଆଖିଧରା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଥିବାରୁ ବଜାରରେ ହଠାତ ଆଣ୍ଟିବାୟୋଟିକ ଆଇ ଡ୍ରପ, କଳା ଚଷମାର ଚାହିଦା ବୃଦ୍ଧି ପାଇଛି ।

ଆଡେନୋ ଭାଇରସ ନାମକ ଏକ ଭୂତାଣୁ ଏହି ରୋଗର କାରଣ । ପ୍ରଥମେ ଆଖି କୁଣ୍ଡେଇ ହେବା ସହ ଆଖି ଲାଲ ପଡ଼ିଯାଏ । ଏହାପରେ ଆଖି ଫୁଲିଯାଏ । ବିଶେଷଜ୍ଞଙ୍କ ମତରେ ଏହା ଏକ ସଂକ୍ରାମକ ରୋଗ । ତେଣୁ ଏଥିପାଇଁ ପ୍ରତିଷେଧକ ବ୍ୟବସ୍ଥା ଗ୍ରହଣ କରିବା ନିତ୍ୟାନ୍ତ ଆବଶ୍ୟକ ।

ଆଖିଧରା ଲକ୍ଷଣ:

ଆଖି ଲାଲ ପଢ଼ିବା, କୁଣ୍ଡେଇ ହେବା, ଖୁଞ୍ଚି ଖୁଞ୍ଚି ହେବା, ଆଖିପତା ଫୁଲିଯିବା, ଦେଖି ନ ପାରିବା ଓ ଅତ୍ୟଧିକ ଲୁହ ବୋହିବା, ଲେଞ୍ଜେରା ଜମିବା, ଆଖିପତା ଲାଗିଯିବା ଓ ଆଖିରେ ଯନ୍ତ୍ରଣା ଅନୁଭବ କରିବା ।
ଏହା ସହିତ ଜ୍ବର ହେବା ଓ ମୁଣ୍ଡ ବିନ୍ଧିବା ମଧ୍ୟ ଦେଖାଦିଏ ।
ମହିଳା ଓ ଶିଶୁମାନଙ୍କ କ୍ଷେତ୍ରରେ ଏହି ରୋଗ ସାଧାରଣତଃ ଅଧିକମାତ୍ରାରେ ଦେଖାଯାଏ ।

କେମିତି ବ୍ୟାପେ ସଂକ୍ରଣ

ଏହିରୋଗ ଲୁହ ବା ତା ସଂସ୍ପର୍ଶରେ ଆସିଥିବା ଆଙ୍ଗୁଠି, ରୁମାଲ, ସାବୁନ ଓ ଅନ୍ୟାନ୍ୟ ନିତ୍ୟ ବ୍ୟବହାର୍ଯ୍ୟ ଉପକରଣ ମାଧ୍ୟମରେ ସଂକ୍ରମିତ ହୋଇଥାଏ ।
ଜନଗହଳିପୂର୍ଣ୍ଣ ସ୍ଥାନ ଯଥା, ବିଦ୍ୟାଳୟ, ଡାକ୍ତରଖାନା, ବଜାରହାଟ ଆଦି ସ୍ଥାନରେ ଏହା ବ୍ୟାପିବାର ସମ୍ଭାବନା ଅଧିକ ।
ଏହା ବ୍ୟତୀତ ଏହି ରୋଗର ଭୂତାଣୁ କଫ ବା ଛିଙ୍କରେ ନିର୍ଗତ ବାୟୁ ମାଧ୍ୟମରେ ବ୍ୟାପିଥାଏ ।
ଜଣେ ବ୍ୟକ୍ତି ଆଖି ଧରାରେ ପୀଡ଼ିତ ହେଲେ ଏହା ଏକ ସପ୍ତାହରୁ ଦୁଇ ସପ୍ତାହ ପର୍ଯ୍ୟନ୍ତ ଲାଗିରହେ ।
ଆ‌ଡେନୋ ଭାଇରସ୍‌ ଛଡ଼ା ଅନ୍ୟ ଭୂତାଣୁ ଓ କିଛି ଜୀବାଣୁ ଦ୍ବାରା ମଧ୍ୟ କଞ୍ଜକ୍ଟି ଭାଇଟିସ (ଆଖିଧରା) ହୋଇଥାଏ ।

ଆଖିଧରା ପ୍ରତିକାର

ଆକ୍ରାନ୍ତ ବ୍ୟକ୍ତିଙ୍କ ରୁମାଲ୍, ତଉଲିଆ, ତକିଆ ବ୍ୟବହାର କରୁନ୍ତୁ ନାହିଁ
ଆକ୍ରାନ୍ତ ବ୍ୟକ୍ତି ବ୍ୟବହାର କରିଥିବା ଆଇ-ଡ୍ରପ୍ ଅନ୍ୟମାନେ ବ୍ୟବହାର କରନ୍ତୁ ନାହିଁ
ନିଜର ଚଷମା ନିୟମିତ ସଫା କରନ୍ତୁ
ସୁଇମିଂ ପୁଲ, ପୋଖରୀ ଆଦିରେ ମୁହଁ ବୁଡାନ୍ତୁ ନାହିଁ
କଣ୍ଟାକ୍ଟ ଲେନ୍ସ ବ୍ୟବହାରକାରୀ ନିଜର ଚକ୍ଷୁ ଚିକିତ୍ସକଙ୍କ ସହ ପରାମର୍ଶ କରି ସାବଧାନତା ଅବଲମ୍ବନ କରନ୍ତୁ
ଆଖିରେ କୌଣସି ପ୍ରସାଧନ ସାମଗ୍ରୀ ବ୍ୟବହାର କରନ୍ତୁ ନାହିଁ
ଆଖି ଧରିଲେ ପରିଷ୍କାର କପଡ଼ା ଉଷୁମପାଣିର ପକାଇ ଆଖିକୁ ପୋଛନ୍ତୁ
ଆଖି ପୋଛା କପଡ଼ାକୁ ଗରମ ପାଣିରେ ଭିଜାଇବା ପରେ ନଷ୍ଟ କରିଦିଅନ୍ତୁ
ଡାକ୍ତରଙ୍କ ବିନା ପରାମର୍ଶରେ କୌଣସି ଆଖି ଔଷଧ ବ୍ୟବହାର କରନ୍ତୁ ନାହିଁ
ଆବଶ୍ୟକ ହେଲେ ନିକଟସ୍ଥ ଡାକ୍ତରଖାନାକୁ ଯାଇ ଡାକ୍ତରଙ୍କ ପରାପର୍ଶ ନିଅନ୍ତୁ