ଡାଇରିଆ ସ୍ଥିତି ସମୀକ୍ଷା କଲେ ମୁଖ୍ୟ ଶାସନ ସଚିବ

ଆଜି ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ୬ ଟି ଜିଲ୍ଲାର ନିର୍ଦ୍ଦିଷ୍ଟ କେତେକ ଅଂଚଳରେ ଦେଖାଦେଇଥିବା ଡାଇରିଆ ରୋଗର ନିୟନ୍ତ୍ରଣ ଓ ନିରାକରଣ ସ୍ଥିତିର ସମୀକ୍ଷା କରିଥିଲେ ।

Published: Friday, August 5, 2022, 18:44 [IST]

ଭୁବନେଶ୍ବର: ଆଜି ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ୬ ଟି ଜିଲ୍ଲାର ନିର୍ଦ୍ଦିଷ୍ଟ କେତେକ ଅଂଚଳରେ ଦେଖାଦେଇଥିବା ଡାଇରିଆ ରୋଗର ନିୟନ୍ତ୍ରଣ ଓ ନିରାକରଣ ସ୍ଥିତିର ସମୀକ୍ଷା କରିଥିଲେ । ସ୍ଥିତିର ସମୀକ୍ଷା କରି ଗ୍ରାମ ଓ ୱାର୍ଡ ରୁ କମ୍ୟୁନିଟି ହେଲ୍‌ଥ୍ ସେଣ୍ଟର , ଜିଲ୍ଲା ମୁଖ୍ୟାଳୟ ଡାକ୍ତରଖାନା ଏବଂ ଜିଲ୍ଲାପାଳଙ୍କ ପର୍ଯ୍ୟନ୍ତ ତ୍ଵରିତ ଡାଇରିଆ ସୂଚନା ପ୍ରସାରଣ ଓ ସଂକ୍ରମିତଙ୍କୁ ତୁରନ୍ତ ହସ୍‌ପିଟାଲ ସ୍ଥାନାନ୍ତର ନିମନ୍ତେ ଏକ ସକ୍ରିୟ ଓ ନିର୍ଭରଯୋଗ୍ୟ ବ୍ୟବସ୍ଥା କରିବାକୁ ମୁଖ୍ୟ ଶାସନ ସଚିବ ସୁରେଶ ମହାପାତ୍ର ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଥିଲେ । ଏହି ଶୃଙ୍ଖଳରେ ଆଶାକର୍ମୀ , ଅଙ୍ଗନାବାଡ଼ି କର୍ମୀ ୱାର୍ଡ଼ - ମେମ୍ବର , ସରପଂଚ ସ୍ଥାନୀୟ ସ୍ବେଚ୍ଛାସେବୀ ଅନୁଷ୍ଠାନ ଓ ବିଦ୍ୟାଳୟମାନଙ୍କୁ ସାମିଲ କରିବା ନିମନ୍ତେ ମଧ୍ୟ ମହାପାତ୍ର ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଥିଲେ ।

ସବୁ ଗାଁରେ ସମସ୍ତ ପାନୀୟଜଳ ସ୍ରୋତକୁ ନିୟମିତ ବ୍ୟବଧାନରେ ବିଶୋଧନ କରିବା ସହ ଲୋକମାନେ ଯେପରି ଝରଣାପାଣି ନପିଅଛି ତାଉପରେ ସତର୍କ ଦୃଷ୍ଟି ରଖିବାକୁ ସମସ୍ତ ଜିଲ୍ଲାପାଳ ମାନଙ୍କୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଥିଲେ । ସଚେତନତା କାର୍ଯ୍ୟକ୍ରମକୁ ଅଧିକ ସଘନ କରିବାକୁ ମଧ୍ୟ ଜିଲ୍ଲାପାଳ ଓ ସ୍ବାସ୍ଥ୍ୟ କର୍ମୀମାନଙ୍କୁ ନିର୍ଦ୍ଦେଶ ଦିଆଯାଇଥିଲା । ଏହାଛଡା ସଂକ୍ରମିତ ଅଂଚଳରେ ଜଳ ବିଶୋଧନ ପାଇଁ ' ରିଭର୍ସ ଅସମୋସିସ୍ ଯନ୍ତ୍ର ' ଲାଗିଥିବା ଚାଡ଼ି ମୁତୟନ କରିବାକୁ ଶ୍ରୀ ମହାପାତ୍ର ନିର୍ଦ୍ଦେଶ ଦେଇଥିଲେ । ସଂକ୍ରମିତ ଏବଂ ସଂକ୍ରମଣ ସମ୍ଭାବନାଥବା ଅଂଚଳମାନଙ୍କରେ ରୋଗ ନିରୀକ୍ଷଣ ଓ ଅନୁ ନ ବ୍ୟବସ୍ଥାକୁ ଅଧିକ ବ୍ୟାପକ କରାଯିବ । ରାଜ୍ୟରେ ବର୍ଷା ଋତୁ ଶେଷ ପର୍ଯ୍ୟନ୍ତ ଡାଇରିଆ ନିରାକରଣ ବ୍ୟବସ୍ଥାକୁ ପୂର୍ଣ୍ଣ ସକ୍ରିୟ ରଖୁବା ସହ ସଂପୂର୍ଣ୍ଣ ସଜାଗ ଓ ସତର୍କ ରହିବାକୁ ମୁଖ୍ୟ ଶାସନ ସଚିବ ସମସ୍ତ ଜିଲ୍ଲାପାଳ ଏବଂ କ୍ଷେତ୍ରସ୍ତରୀୟ ସ୍ୱାସ୍ଥ୍ୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ ।

ପ୍ରାପ୍ତ ସୂଚନାରୁ ଜଣାପଡ଼ିଛି , ବର୍ତ୍ତମାନ ସୁଦ୍ଧା ରାୟଗଡ଼ା , କୋରାପୁଟ , ନବରଙ୍ଗପୁର , ସୋନପୁର , ନୂଆପଡ଼ା , ଗଜପତି , ଝାରସୁଗୁଡ଼ା ଆଦି ୭ ଟି ଜିଲ୍ଲାରେ ସମୁଦାୟ ୬୮୦ ଲୋକ ସଂକ୍ରମିତ ହୋଇଥିବା ବେଳେ ୬୧୦ ଜଣ ଆରୋଗ୍ୟ ଲାଭ କରିଛନ୍ତି । ୫୩ ଜଣେ ହସ୍‌ପିଟାଲରେ ଚିକିତ୍ସାଧନ ଅଛନ୍ତି ଏବଂ ୧୭ ଜଣ ହସ୍‌ପିଟାଲ୍ ଆସିବାରେ ବହୁ ବିଳମ୍ବ କରି ମୃତ୍ୟୁ ବରଣ କରିଛନ୍ତି । ଜିଲ୍ଲା ପ୍ରଶାସନ ଓ ସ୍ବାସ୍ଥ୍ୟ ବିଭାଗଙ୍କ ତ୍ବରିତ ପଦକ୍ଷେପ ଯୋଗୁ ନବରଙ୍ଗପୁର , ସୋନପୁର , ନୂଆପଡା , ଗଜପତି ଓ ଝାରସୁଗୁଡା ଆଦି ୫ ଟି ଜିଲ୍ଲାରେ ଗତ ତିନିଦିନ ଧରି ଲଗାତର ଭାବେ ସଂକ୍ରମଣ ୨ ରେ ପହଞ୍ଚିଛି । ସେହିପରି ରାୟଗଡା ଓ କୋରାପୁଟ ଜିଲ୍ଲାରେ ମଧ୍ୟ ସଂକ୍ରମଣ ଲଗାତର ୨ ଦିନ ଧରି ୧ ରହିଛି । ସମୁଦାୟ ଭିତ୍ତି ପୂର୍ଣ୍ଣ ନିୟନ୍ତ୍ରଣାଧନ ଅଛି ବୋଲି ଜିଲ୍ଲାପାଳମାନେ ଜଣାଇଥଲେ । ଇତି ମଧ୍ୟରେ ସମସ୍ତ ପାନୀୟଜଳ ସ୍ରୋତକୁ ବିଶୋଧନ କରାଯାଇଛି । ସଂକ୍ରମଣ ସ୍ଥାନରେ ତୁରନ୍ତ ପହଞ୍ଚିବା ପାଇଁ ଦୃତ କାର୍ଯ୍ୟାନୁଷ୍ଠାନ ଟିମ୍ ମାନ ଗଠନ କରାଯାଇଛି ।

ସମସ୍ତ ସବ୍‌ସେଣ୍ଟର , ଅଙ୍ଗନବାଡି , ଆଶାକର୍ମୀ ଏବଂ ଏ.ଏନ୍.ଏମ୍.ମାନଙ୍କ ନିକଟରେ ଆବଶ୍ୟକୀୟ ଓ.ଆର୍.ଏସ୍ ପ୍ୟାକେଟ୍ ଓ ପ୍ରାଥମିକ ଔଷଧ ମହଜୁଦ ରଖାଯାଇଛି । ବୈଠକରେ ସ୍ବାସ୍ଥ୍ୟ ଓ ପରିବାର କଲ୍ୟାଣ ପ୍ରମୁଖ ଶାସନ ସଚିବ ନିକୁଞ୍ଜବିହାରୀ ଧଳ , ଜାତୀୟ ସ୍ବାସ୍ଥ୍ୟ ମିଶନ ନିର୍ଦ୍ଦେଶକ ଶାଳିନୀ ପଣ୍ଡିତ୍ , ଆଂଚଳିକ ଭେଷଜ ଗବେଷଣା କେନ୍ଦ୍ରର ନିର୍ଦ୍ଦେଶକ ସଂଘମିତ୍ରା ପତି , ପବ୍ଲିକ୍‌ ହେଲ୍‌ଥ୍ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ରଙ୍କ ସମେତ ସଂପୃକ୍ତ ବିଭାଗର ବରିଷ୍ଠ ଅଧିକାରୀମାନେ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ । ସଂପୃକ୍ତ ଜିଲ୍ଲାପାଳମାନେ ଭିଡିଓ କନ୍‌ଫେରେନ୍‌ସିଂ ମାଧ୍ୟମରେ କ୍ଷେତ୍ରସ୍ତରୀୟ ସ୍ଥିତି ଓ ଡାଇରିଆ ନିରାକରଣ ନିମନ୍ତେ ନିଆଯାଇଥିବା ପଦକ୍ଷେପ ବିଷୟରେ ଜଣାଇଥିଲେ ।

Published On August 5, 2022