ରାସ୍ତା କଡରେ ଖାଦ୍ୟ ବିକ୍ରି ନେଇ ବିଜ୍ଞପ୍ତି ଜାରି କଲା ବିଏମସି

ରାସ୍ତା କଡରେ ଖାଦ୍ୟ ବିକ୍ରି ନେଇ ବିଜ୍ଞପ୍ତି ଜାରି କଲା ବିଏମସି । ଉଭୟ ପାର୍କିଂ ଏବଂ ସ୍ବଚ୍ଛତାକୁ ଆଖିରେ ରଖି ଏଭଳି ନିଷ୍ପତ୍ତି ନିଆଯାଇଥିବା ଜଣା ପଡିଛି ।

Published: Saturday, October 8, 2022, 12:50 [IST]

ଭୁବନେଶ୍ବର: ଷ୍ଟ୍ରିଟ୍ ଫୁଡ କାହାକୁ ବା ପସନ୍ଦ ନୁହେଁ, ଗୁପଚୁପ ଚାଟ ଟାରୁ ଆରମ୍ଭ କରି ମୋମୋ ପର୍ଯ୍ୟନ୍ତ ସମସ୍ତିଙ୍କର ପ୍ରିୟ। ତେବେ ରାଜଧାନୀ ଭୁବନେଶ୍ବରରେ ରାସ୍ତା କଡରେ ବିକ୍ରି ହେଉଥିବା ଖାଦ୍ୟ ଆପଣଙ୍କ ପାଇଁ କେତେ ସୁରକ୍ଷିତ ସେ କଥା ଆପଣ ମଧ୍ୟ ଜାଣି ରଖନ୍ତୁ। ଯଦି ଆପଣଙ୍କ ଏହି ଖାଦ୍ୟ ଖାଇବାକୁ ଯାଉଥାନ୍ତି ତେବେ ବିଏମସି ଜାରି କରିଥିବା ବିଜ୍ଞପ୍ତି ବିଷୟରେ ଜାଣି ରଖନ୍ତୁ।

ରାଜଧାନୀ ରାସ୍ତାରେ ଷ୍ଟ୍ରିଟ୍ ଫୁଡ୍ ବିକ୍ରି ନେଇ ବିଏମସି ଜାରି କରିଛି ଏକ ବିଜ୍ଞପ୍ତି। ଉଭୟ ପାର୍କିଂ ଏବଂ ସ୍ବଚ୍ଛତାକୁ ଆଖିରେ ରଖି ଏଭଳି ନିଷ୍ପତ୍ତି ନିଆଯାଇଥିବା ଜଣା ପଡିଛି । ଫୁଟପାଥ ବା କୌଣସି ଡ୍ରେନ ଉପରେ ଖାଦ୍ୟ ବିକ୍ରି ଉପରେ ରୋକ ଲଗାଯାଇଛି । ପାର୍କିଂ ବ୍ୟବସ୍ଥା ନଥିଲେ ଷ୍ଟଲରେ ବିକ୍ରି ଖାଦ୍ୟ ପରଷାଯାଇ ପାରିବ ନାହିଁ । କେବଳ କେବଳ ପାର୍ସଲ ଦେଇ ପାରିବେ । ରାସ୍ତା ଉପରେ କୌଣସି ଗାଡି ପାର୍କିଂ ହୋଇ ପାରିବ ନାହିଁ । ଯଦି କୌଣସି କ୍ଷେତ୍ରରେ ରାସ୍ତା କଡରେ ଗାଡ଼ି ପାର୍କିଂ ହୋଇଥିବାର ଦେଖାଯିବ ସଙ୍ଗେ ସଙ୍ଗେ ସେହି ଗାଡିକୁ ସିଜ୍ କରାଯିବା ସହିତ ଯଥେଷ୍ଟ ଜରିମାନା ଆଦାୟ କରାଯିବ।

ଯଦି ଏହା ପରେ ମଧ୍ୟ କେହି ନିୟମ ଉଲ୍ଲଂଘନ କରେ , ତେବେ ତାଙ୍କର ଟ୍ରେଡ୍ ଲାଇସେନ୍ସ ବାତିଲ କରାଯିବ । ସ୍ୱାସ୍ଥ୍ୟକର ପରିବେଶରେ ଖାଦ୍ୟ ପ୍ରସ୍ତୁତ ଓ ପରିବେଷଣ ହେବା ଆବଶ୍ୟକ । ଏହି ଷ୍ଟଲ ମାନଙ୍କରରେ ଦୁଇଟି ଡଷ୍ଟବିନର ବ୍ୟବସ୍ଥା ରହିବ । ଭିନ୍ନ ଡଷ୍ଟବିନରେ ଅଲଗା ଅଲଗା ଓଦା ଓ ଶୁଖିଲା ଆବର୍ଜନା ରଖାଯିବ । ନିଜ ଦୋକାନ ଠାରୁ 5 ମିଟର ପର୍ଯ୍ୟନ୍ତ ଅଞ୍ଚଳ ସଂପୂର୍ଣ୍ଣ ସଫା ରଖିବାକୁ ପଡିବ । ବିଏମ୍‌ସିର ସ୍ୱତନ୍ତ୍ର ଦଳ ସହରସାରା ବିଭିନ୍ନ ସ୍ଥାନରେ ଚଢ଼ଉ କରିବେ । ତେବେ ଏହିସବୁ ନିୟମ ନମାନିଲେ ଦୋକାନ ମାଲିକଙ୍କୁ ଫାଇନ ଗଣିବାକୁ ପଡିବ ବୋଲି ବିଏମସି ପକ୍ଷରୁ କୁହାଯାଇଛି ।

Published On October 8, 2022