ଭୁବନେଶ୍ୱର ବିମାନବନ୍ଦରରେ ପାଇବେ ହସ୍ତଶିଳ୍ପ ସାମଗ୍ରୀ

Bhubaneswar Airport Attracts Tourists For Te Stalls Of Handicraft Made By Women Marketed By ORMSଭୁବନେଶ୍ୱର ବିମାନବନ୍ଦରରେ ପାଇବେ ହସ୍ତଶିଳ୍ପ ସାମଗ୍ରୀ

Updated: Sunday, August 28, 2022, 22:37 [IST]

ଭୁବନେଶ୍ୱର: ଏଥର ଆପଣ ଭୁବନେଶ୍ୱର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦର ଭିତରେ ପାଇପାରିବେ ଓଡ଼ିଶାର ହସ୍ତଶିଳ୍ପ ସାମଗ୍ରୀ । ଯାହା ଏବେ ଯାତ୍ରୀଙ୍କୁ ଆକୃଷ୍ଟ କରୁଛି । ଦିନକୁ ଦିନ ଚାହିଦା ମଧ୍ୟ ବଢିବାରେ ଲାଗିଛି । ୨ମାସ ଭିତରେ ମୋଟ ଅଢେଇ ଲକ୍ଷ ଟଙ୍କାର ବିକ୍ରି ବଟା ହୋଇସାରିଛି । ମାସକୁ ପ୍ରାୟ ୮୦ ହଜାରରୁ ୧ ଲକ୍ଷ ପର୍ଯ୍ୟନ୍ତ ବ୍ୟବସାୟ ହେଉଛି । ସେହିପରି ଦିନକୁ ପ୍ରାୟ ୩-୪ହଜାର ଟଙ୍କାର ବ୍ୟବସାୟ ମଧ୍ୟ ହେଉଛି । ଯାହା ସୂଚାଉଛି ଯେ ଓଡ଼ିଶାର ଖାଦ୍ୟ , ଘର ସାଜସଜ୍ଜା ସାମଗ୍ରୀରେ ଲୋକଙ୍କର କେତେ ଅଧିକ ରୁଚି ରହୁଛି ।

ରାଜ୍ୟର ମହିଳା ଉତ୍ପାଦକ ଗୋଷ୍ଠୀଙ୍କ ଦ୍ୱାରା ପ୍ରସ୍ତୁତ ହେଉଥିବା ସାମଗ୍ରୀର ଚାହିଦା ଏବେ ଦେଶ ବିଦେଶରେ । ରାଜ୍ୟର ମହିଳା ସ୍ୱୟଂ ସହାୟକ ଗୋଷ୍ଠୀଙ୍କ ଦ୍ୱାରା ପ୍ରସ୍ତୁତ ସାମଗ୍ରୀର ବିକ୍ରିବଟା ପାଇଁ ରାଜ୍ୟ ସରକାରଙ୍କ ତରଫରୁ ନିଆଯାଇଛି ନୂଆ ପଦକ୍ଷପ । ଓଡ଼ିଶା ସରକାରଙ୍କ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଅଧୀନରେ ଥିବା ଓରମାସ ତରଫରୁ ବିମାନ ବନ୍ଦରର ମୁଖ୍ୟ ପ୍ରବେଶ ଦ୍ୱାର ନିକଟରେ ଖୋଲାଯାଇଛି ସ୍ୱତନ୍ତ୍ର ଷ୍ଟଲ୍ । ଯେଉଁଥିରେ ବିଭିନ୍ନ ଜିଲ୍ଲାର ମହିଳା ସ୍ୱୟଂ ସହାୟକ ଗୋଷ୍ଠୀ ସଦସ୍ୟଙ୍କ ଦ୍ୱାରା ପ୍ରସ୍ତୁତ ବିଭିନ୍ନ ହସ୍ତଶିଳ୍ପ ସାମଗ୍ରୀ, ଖାଦ୍ୟ ପଦାର୍ଥ ଓ ବନଜାତ ଦ୍ରବ୍ୟ ଆଦି ବିକ୍ରି କରାଯାଉଛି ।

ମୟୂରଭଞ୍ଜ ସବାଇ ଘାସରୁ ତିଆରି ଘର ସାଜସଜ୍ଜା ସାମଗ୍ରୀଠୁ ଆରମ୍ଭ କରି ଅନୁଗୋଳ ଜିଲ୍ଲାର ହସ୍ତତନ୍ତ ଓ ବାଉଁଶରୁ ପ୍ରସ୍ତୁତ ଜିନିଷ , ଯାଜପୁର ଟସର ସାମଗ୍ରୀ ଆଦି ଆପଣ ଏହି ଷ୍ଟଲରେ ପାଇ ପାରିବେ । ଏହି କେନ୍ଦ୍ରକୁ ପର୍ଯ୍ୟାୟକ୍ରମେ ବିଭିନ୍ନ ଜିଲ୍ଲାର ସ୍ୱୟଂ ସହାୟିକା ଗୋଷ୍ଠୀ ପରିଚାଳନା କରୁଛନ୍ତି। ପ୍ରତି ୧୫ଦିନରେ ଥରେ ବିଭିନ୍ନ ଜିଲ୍ଲାର ସ୍ୱୟଂ ସହାୟକ ଗୋଷ୍ଠୀଙ୍କୁ ଏହାର ଦାୟିତ୍ୱ ଦିଆଯାଉଛି । ଷ୍ଟଲରେ ପ୍ରାୟ ୩୦-୪୦ଟି ଉତ୍ପାଦକ ଗୋଷ୍ଠୀଙ୍କ ଦ୍ୱାରା ପ୍ରସ୍ତୁତ ହସ୍ତତନ୍ତ, ହସ୍ତଶିଳ୍ପ ଏବଂ ଖାଦ୍ୟ ସାମଗ୍ରୀ ରହିଛି।

ଜାତୀୟ ତଥା ଅନ୍ତର୍ଜାତୀୟସ୍ତରରେ ଏହି ସବୁ ସାମଗ୍ରୀର ସ୍ୱତନ୍ତ୍ର ପରିଚୟ ସୃଷ୍ଟି କରିବା ଦିଗରେ ମଧ୍ୟ ଏହି ଷ୍ଟଲ ସହାୟକ ହୋଇପାରିବ ବୋଲି ଓରମାସ ତରଫରୁ ସୂଚନା ଦିଆଯାଇଛି। ଓରମାସ ସାମଗ୍ରୀର ବ୍ରାଣ୍ଡିଂ ଓ ପ୍ୟାକେଜିଂ ଉପରେ ଅଧିକ ଗୁରୁତ୍ୱ ଦେଉଛି । ଯାହା ଗ୍ରାହକଙ୍କୁ ଅଧିକ ଆକୃଷ୍ଟ କରିପାରୁଛି ।