ସାବଧାନ! ରାସ୍ତା ଉପରେ ବୁଲିଛି ୧୦ ଫୁଟରୁ ଅଧିକ ଲମ୍ବର ବଉଳା କୁମ୍ଭୀର

Updated: Sunday, November 6, 2022, 8:24 [IST]

କେନ୍ଦ୍ରାପଡ଼ା : ରାସ୍ତାରେ ବୁଲିଲା ୧୦ ଫୁଟରୁ ଅଧିକ ଲମ୍ବର ବଉଳା କୁମ୍ଭୀର । ଗତକାଲି ରାତିରେ କେନ୍ଦ୍ରାପଡ଼ା ଜିଲ୍ଲା ରାଜନଗର ଭିତରକନିକା ରାସ୍ତାରେ ଏପରି ଦୃଶ୍ୟ ଦେଖିବା ପାଇଁ ମିଳିଥିଲା । ଗତକାଲି ଘଡିଆମାଳ ନିକଟରେ ଏକ କୁମ୍ଭୀର ରାସ୍ତା ପାର ହେଉଥିବାର ଦୃଶ୍ୟ କ୍ୟାମେରାରେ କୟଦ ହୋଇଥିଲା । ରାତିରେ ସ୍ଥାନୀୟ ଲୋକେ ଗାଡି ନେଇ ଯାଉଥିବା ବେଳେ କୁମ୍ଭୀରକୁ ଦେଖି ଅଟକି ଯାଇଥିଲେ ।

ତେବେ ବିଶାଳ କୁମ୍ଭୀରଟି କୋଚିଆ ନଦୀରୁ ବ୍ରାହ୍ମଣୀ ନଦୀକୁ ଯାଉଥିବା ନେଇ ଅନୁମାନ କରାଯାଉଛି । ସୂଚନା ଅନୁସାରେ, ଗତକାଲି ରାତି ପାଖାପାଖି ୧୧ଟା ବେଳେ କିଛି ଲୋକେ ନିଜ ଫୋନରେ ଏହି ଦୃଶ୍ୟ କଏଦ କରିଥିଲେ । କୁମ୍ଭୀରଟି ଖାଦ୍ୟ ପାଇଁ ନିଜ ସ୍ଥାନ ପରିବର୍ତ୍ତନ କରୁଥିବା ନେଇ ସାଧାରଣରେ ଆଲୋଚନା ହେଉଛି । ପୂର୍ବରୁ ଅନେକ ଥର ନଦୀରେ ଲୋକ ମାନେ କୁମ୍ଭୀର ଆକ୍ରମଣର ଶିକାର ହୋଇଛନ୍ତି ଏବେ ରାସ୍ତା ଉପରେ କୁମ୍ଭୀରକୁ ଦେଖି ଭୟଭିତ ହୋଇ ପଡିଛନ୍ତି ଲୋକେ ।