ଜେଲରୁ ବାହାରି ପ୍ରେମିକାକୁ ବିଭତ୍ସ ହତ୍ୟା କଲା ପ୍ରେମିକ , ମାରିଲା ଝାରସୁଗୁଡାରେ, ଫିଙ୍ଗିଲା ରାଉରକେଲାରେ

ଓଡ଼ିଶାରେ ଦିଲ୍ଲୀ ଶ୍ରଦ୍ଧା ୱାକର ହତ୍ୟାକାଣ୍ଡ ଭଳି ଜଘନ୍ୟ ହତ୍ୟାକାଣ୍ତ । ପ୍ରେମିକାକୁ ହତ୍ୟା କରି ଖଣ୍ଡ ଖଣ୍ଡ କରି କାଟିଲା ଜହ୍ଲାଦ ପ୍ରେମିକ । ଝାରସୁଗୁଡାରେ ମାରିଲା । ରାଉରକେଲାରେ ଫିଙ୍ଗିଲା । ପ୍ରେମ ବ୍ୟାପାରକୁ ନେଇ ବୀଭତ୍ସ ହତ୍ୟା । ପ୍ରେମିକାକୁ ଦୁଷ୍କର୍ମ କରି ଜେଲ୍‌ ଯାଇଥିଲା ଅଭିଯୁକ୍ତ । ଜାମିନରେ ଆସିବା ପରେ ଘଟାଇଲା ନାରକୀୟ କାଣ୍ଡ ।

ପ୍ରେମିକାକୁ ହତ୍ୟା ପରେ ଖଣ୍ଡ ଖଣ୍ଡ କରି ଫିଙ୍ଗିଦେଲା । ବ୍ରାହ୍ମଣୀ ନଦୀରୁ ଯୁବତୀଙ୍କ ମୁଣ୍ଡବିହୀନ ମୃତଦେହ ମିଳିଥିବାବେଳେ ନିକଟ ପୋଖରୀରୁ ମିଳିଛି ହାତ ଗୋଡ । ଏହା ସଂପୃକ୍ତ ଯୁବତୀଙ୍କର ବୋଲି ସନ୍ଦେହ କରାଯାଉଛି । ଏବେ ସୁଦ୍ଧା ମୁଣ୍ଡ ମିଳିନଥିବାରୁ ମୃତଦେହ ଚିହ୍ନଟ ପାଇଁ ପରିବାର ଲୋକଙ୍କୁ ଡାକିଛି ପୋଲିସ ।

ଝାରସୁଗୁଡ଼ା, ରାଉରକେଲା ପୋଲିସ ମିଳିତ ଭାବେ ତଦନ୍ତ କରୁଥିବାବେଳେ ଘଟଣା ସ୍ଥଳରେ ସାଇଣ୍ଟିଫିକ୍ ଟିମ୍ ପହଞ୍ଚିଛି । ଅଭିଯୁକ୍ତ ପ୍ରେମିକର ବୟାନ ଆଧାରରେ ଖଣ୍ଡ ବିଖଣ୍ଡିତ ମୃତଦେହ ଖୋଜୁଛି ପୋଲିସ । ଅଭିଯୁକ୍ତ ପ୍ରେମିକ ନାଁ କୁନା କିଷାନ । ସୂଚନା ଅନୁସାରେ ମୃତ ଯୁବତି ସୁନ୍ଦରଗଡ଼ର । ୨୦୧୮ ମସିହାରେ କୁନା କିଷାନ ଓ ମୃତ ଯୁବତୀଙ୍କ ଭିତରେ ଗଢ଼ି ଉଠିଥିଲା ପ୍ରେମ ସମ୍ପର୍କ । ସେତେବେଳେ ଯୁବତୀ ଜଣଙ୍କ ନାବାଳିକା ଥିଲେ ।

୨୦୨୩ ମସିହାରେ ପ୍ରେମିକ ବିରୋଧରେ ଦୁଷ୍କର୍ମ ଅଭିଯୋଗ ଆଣି ଥାନାର ଦ୍ବାରସ୍ଥ ହୋଇଥିଲେ ପ୍ରେମିକା । ପୋକ୍ସୋ ଆକ୍ଟରେ ମାମଲା ହୋଇ ଅଭିଯୁକ୍ତ ଜେଲ୍ ଯାଇଥିଲେ । ଆଉ ଏବେ ୧୫ ଦିନ ତଳେ ଜେଲରୁ ମୁକୁଳିଥିଲେ କୁନା । ତେବେ ଜେଲରୁ ବାହାରିବା ପରେ ପ୍ରତିଶୋଧ ନେବା ପାଇଁ ଝାରସୁଗୁଡ଼ାରେ ମାଉସୀ ଘରେ ଥିବା ପ୍ରେମିକା ପାଖରେ ପହଞ୍ଚିଥିଲା ।

ସେଠାରେ ତାକୁ ହତ୍ୟା କରିବା ପରେ ମୃତ ଦେହକୁ ଅତି ନିର୍ମମ ଭାବେ ଖଣ୍ଡ ଖଣ୍ଡ କାଟି ରାଉରକେଲାର ବିଭିନ୍ନ ସ୍ଥାନରେ ପିଙ୍ଗିଛି ଜହ୍ଲାଦ। ଝାରସୁଗୁଡ଼ା ଥାନାରେ ଏନେଇ ଅଭିଯୋଗ ହେବା ପରେ ତଦନ୍ତ ଆରମ୍ଭ ହୋଇଛି ।