ପାକିସ୍ତାନ ଉପରେ ଆଫଗାନିସ୍ତାନ ସେନାର ଭୟଙ୍କର ଆକ୍ରମଣ; ୧୨ ପାକିସ୍ତାନୀ ସୈନିକ ନିହତ

ପାକିସ୍ତାନ ଉପରେ ଆଫଗାନିସ୍ତାନ ସେନାର ଭୟଙ୍କର ଆକ୍ରମଣ । ତାଲିବାନ୍ ଓ ପାକ୍‌ ସେନା ମଧ୍ୟରେ ପ୍ରବଳ ଗୁଳି ବିନିମୟ । ୧୨ ପାକିସ୍ତାନୀ ସୈନିକ ନିହତ ହୋଇଥିବା ସୂଚନା।

କୁନାର ଓ ହେଲମାଣ୍ଡ ପ୍ରଦେଶ ସମେତ ଡୁରାଣ୍ଡ ସୀମାରେ ଯୁଦ୍ଧ ଜାରି । ଆଫଗାନିସ୍ତାନ ସେନା କବ୍‌ଜାରେ ପାକିସ୍ତାନର ଅନେକ ଆଉଟପୋଷ୍ଟ।
ଆଫଗାନିସ୍ତାନ ପ୍ରତିରକ୍ଷା ମନ୍ତ୍ରଣାଳୟ ବିବୃତ୍ତିରେ ସୂଚନା ।

ପାକିସ୍ତାନ ଶନିବାର ଆଫଗାନିସ୍ତାନ ରାଷ୍ଟ୍ରଦୂତଙ୍କୁ ଡକାଇ ଗୋଟିଏ ଦିନ ପୂର୍ବରୁ ନୂଆଦିଲ୍ଲୀରେ ଜାରି ହୋଇଥିବା ଭାରତ-ଆଫଗାନିସ୍ତାନ ମିଳିତ ବିବୃତ୍ତି ଉପରେ କଡ଼ା ଆପତ୍ତି ପ୍ରକାଶ କରିଛି। ଆଫଗାନିସ୍ତାନର ବୈଦେଶିକ ମନ୍ତ୍ରୀ ଆମିର ଖାନ ମୁତାକି ଗୁରୁବାର ଛଅ ଦିନିଆ ଭାରତ ଗସ୍ତରେ ନୂଆଦିଲ୍ଲୀରେ ପହଞ୍ଚିଛନ୍ତି।

ପାକିସ୍ତାନ କଣ କହିଲା ଜାଣନ୍ତୁ
ପାକିସ୍ତାନର ବୈଦେଶିକ କାର୍ଯ୍ୟାଳୟ ଏକ ବିବୃତ୍ତିରେ କହିଛି ଯେ ଅତିରିକ୍ତ ବୈଦେଶିକ ସଚିବ (ପଶ୍ଚିମ ଏସିଆ ଏବଂ ଆଫଗାନିସ୍ତାନ) ମିଳିତ ବିବୃତ୍ତିରେ ଜମ୍ମୁ ଏବଂ କାଶ୍ମୀରର ଉଲ୍ଲେଖ ସମ୍ପର୍କରେ ଆଫଗାନ ରାଷ୍ଟ୍ରଦୂତଙ୍କୁ ପାକିସ୍ତାନର "କଠୋର ଆପତ୍ତି" ଜଣାଇଥିଲେ। ବୈଦେଶିକ କାର୍ଯ୍ୟାଳୟ କହିଛି ଯେ "ଏହା ଦର୍ଶାଯାଇଥିଲା ଯେ ଜମ୍ମୁ ଏବଂ କାଶ୍ମୀରକୁ ଭାରତର ଅଂଶ ଭାବରେ ବର୍ଣ୍ଣନା କରିବା ପ୍ରାସଙ୍ଗିକ ଜାତିସଂଘ ସୁରକ୍ଷା ପରିଷଦ ପ୍ରସ୍ତାବର ସ୍ପଷ୍ଟ ଉଲ୍ଲଂଘନ।"

ସୂଚନାନୁଯାୟୀ, ଆଫଗାନିସ୍ତାନ ଏବଂ ପାକିସ୍ତାନ ମଧ୍ୟରେ ବର୍ତ୍ତମାନ ଉତ୍ତେଜନା ଜାରି ରହିଛି । ଆଫଗାନିସ୍ତାନ ଏବଂ ପାକିସ୍ତାନ ମଧ୍ୟରେ ହୋଇଥିବା ସଂଘର୍ଷରେ ୧୨ ଜଣ ପାକିସ୍ତାନୀ ସୈନିକ ନିହତ ହୋଇଥିବାବେଳେ ୨ ଜଣ ଆହତ ହୋଇଥିବା ଜଣାପଡିଛି । ଏହା ବ୍ୟତୀତ ପାକିସ୍ତାନର ସାମରିକ ପ୍ରତିଷ୍ଠାନଗୁଡିକର ମଧ୍ୟ ବହୁ କ୍ଷୟକ୍ଷତି ଘଟିଛି । ଆଫଗାନିସ୍ତାନର ସୈନିକମାନେ ପାକିସ୍ତାନର ସୈନିକଙ୍କଠାରୁ ଅସ୍ତ୍ରଶସ୍ତ୍ର ଜବତ କରିଛନ୍ତି ।

ଅନ୍ୟପଟେ ୯ ଅକ୍ଟୋବରରେ ପାକିସ୍ତାନ ଟିଟିପି ମୁଖ୍ୟ ନୁର ୱାଲି ମେହସୁଦଙ୍କୁ ଟାର୍ଗେଟ କରିଥିଲା ​​ଏବଂ ଆଫଗାନିସ୍ତାନର କାବୁଲ, ଖୋସ୍ତ, ଜଲାଲାବାଦ ଏବଂ ପାକଟିକାରେ ବିମାନ ଆକ୍ରମଣ କରିଥିଲା । ଆଫଗାନିସ୍ତାନ ପ୍ରତିଶୋଧ ପରାୟଣ ହୋଇ ୧୧ ଅକ୍ଟୋବରରେ ବିଳମ୍ବିତ ରାତିରେ ନାଙ୍ଗରହାର ଏବଂ କୁନାର ପ୍ରଦେଶରେ ଡୁରାଣ୍ଡ ରେଖା ନିକଟରେ ପାକିସ୍ତାନୀ ସାମରିକ ପୋଷ୍ଟ ଉପରେ ଆକ୍ରମଣ ଆରମ୍ଭ କରିଥିଲା । ଏହାରି ମଧ୍ୟରେ ଆଫଗାନୀମାନଙ୍କ ସାହସକୁ କମ୍ ଭାବିବା ଉଚିତ୍ ନୁହେଁ ବୋଲି ତାଲିବାନର ବୈଦେଶିକ ମନ୍ତ୍ରୀ ଆମିର ଖାନ ମୁତାକି କହିଥିଲେ ।