ଆଜି ଷଷ୍ଠୀ ଓଷା: ଜାଣନ୍ତୁ ଏହାର ପାଳନ ବିଧି

Odisha festival : About Sathi Osha Or Sathi Puja ଆଜି ଷଷ୍ଠୀ ଓଷା: ଜାଣନ୍ତୁ ଏହାର ପାଳନ ବିଧି

ଭୁବନେଶ୍ୱର: ଆଜି ଷଷ୍ଠୀ ଓଷା । କାହିଁ କେଉଁ କାଳୁ ଓଡ଼ିଶାର ଘରେ ଘରେ ପାଳନ କରାଯାଉଛି ଏହି ବ୍ରତ । ଏହି ଦିନ ଜନ୍ମଦେବୀ ମା' ଷଠୀ ଠାକୁରାଣୀଙ୍କର ପୂଜା କରାଯାଏ । ଏହି ପାରମ୍ପରିକ ଓଷାକୁ କେଉଁଠି କେଉଁଠି ଷଠି ବ୍ରତ ବୋଲି ମଧ୍ୟ କୁହାଯାଏ । ସେହିପରି ଯାଜପୁର ଅଞ୍ଚଳରେ ନେଙ୍କୁଡ଼ିଆ ଷଠି ବୋଲି କୁହାଯାଏ । ଏହି ପାରମ୍ପାରିକ ଓଷାକୁ ଭାଦ୍ରବ ଶୁକ୍ଳ ଷଷ୍ଠୀ ଦିନ ଅର୍ଥାତ୍ ଗଣେଶ ପୂଜାର ଦୁଇ ଦିନ ପରେ ପାଳନ କରାଯାଏ । ମାନ୍ୟତା ରହିଛି ଷଠୀ ଠାକୁରାଣୀଙ୍କୁ ପିଲାଙ୍କ ଭଲ ମନ୍ଦ ପାଇଁ ପୂଜା କରାଯାଏ ।

ଷଷ୍ଠୀ ଓଷା ପାଳନ ବିଧି :
ସକାଳେ ପ୍ରଥମେ ଭଗବାନ ଶିବଙ୍କ ପାଇଁ ସୋମନାଥ ବ୍ରତ କରାଯାଏ । ଭାତ, ଡାଲି, ମାଛ ଭଜା, ଚକୁଳି ପିଠା, ଦୁଇ ପ୍ରକାର ନିରାମିଷ ତରକାରୀକୁ ମିସାଇ ଛଅ ପ୍ରକାର ଖାଦ୍ୟ ପ୍ରସ୍ତୁତ କରାଯାଏ । ଏହା ପରେ ପୂଜା ପାଇଁ ଶିଳ ପୁଆକୁ ହଳଦୀ କନାରେ ବାନ୍ଧି ଓ ତା'ଉପରେ ହଳଦୀ ରଖାଯାଏ । ସେହିପରି ଅପାମାରଙ୍ଗ,ବାଉଁଶ,ଧାନ,ବଜ୍ରମୂଳୀ,ସାରୁ ଆଦି ପାଞ୍ଚ ପ୍ରକାର ଗଛକୁ ସଂଗ୍ରହ କରି ଏକାଠି ବନ୍ଧାଯାଏ । ଗୋଟେ ପୂର୍ଣ୍ଣ କୁମ୍ଭ ପାଖରେ ଗଳି ଗୁଆ, ସିନ୍ଦୁର ଫରୁଆ,କଜଳ ପାତି ଇତ୍ୟାଦି ରଖାଯାଏ । ମା'ଙ୍କ ପାଖରେ ପୂଜା କରାଯିବା ପରେ ଦୁବ,ବରକୋଳି ପତ୍ର ଓ ଅରୁଆ ଚାଉଳରେ ଛୋଟ ପିଲାମାନଙ୍କୁ ବନ୍ଦାପନା କରାଯିବା ସହ ତାଙ୍କ ହାତରେ ହଳଦୀ କନା ବନ୍ଧାଯାଏ ।

ଷଷ୍ଠୀ ବାଡ଼ିଆ କ'ଣ ?

ସନ୍ଧ୍ୟାରେ ଅପାମାରଙ୍ଗ,ବାଉଁଶ, ଧାନ, ବଜ୍ରମୂଳୀ, ସାରୁ ଆଦି ପାଞ୍ଚ ପ୍ରକାର ଗଛକୁ ଏକାଠି କରି ବାନ୍ଧିଥିବା ଗୋଛାରେ ପିଲାମାନଙ୍କୁ ରକ୍ଷା ବିଧାନାର୍ଥ ତାଙ୍କ ପିଠିରେ ମା'କିମ୍ବା ଘରର ବୟଷ୍କ ସ୍ତ୍ରୀ ଲୋକ ମାନେ ଧିରେ ଧିରେ ବାଡ଼ାନ୍ତି । ମାନ୍ୟତା ରହିଛି ଏହା ଦ୍ୱାରା ଶିଶୁ ମାନଙ୍କର ସମସ୍ତ ବାଳରିଷ୍ଟ ଖଣ୍ତିତ ହୋଇଥାଏ । "ଓଲୁଅ ପରି ବଢ଼ିଯା, ବଣସାରୁ ପରି ମାଡ଼ିଯା, ଜୀଁ ଜୀଁ ;ବଜ୍ର ହୋ। ବଜ୍ର ହୋ" ଏହା ଉଚାରଣ କରି ମା'ନିଜ ପିଲାର ସମସ୍ତ ରିଷ୍ଟ ଖଣ୍ତନ କରିଥାଏ ।

English summary

About Sathi Osha Or Sathi Puja