ନିଆରା ପରମ୍ପରା, ବିଦାୟ ପୂର୍ବରୁ ଚାପ ଖେଳିଲେ ମା'

Updated: Thursday, October 6, 2022, 15:34 [IST]

ରାଜନଗର: ଶେଷ ହୋଇଛି ମାଆ ଦୁର୍ଗାଙ୍କ ପୂଜା । ଏବେ ମା' ଙ୍କୁ ମେଲାଣି ଦେବାର ସମୟ । ସାରା ରାଜ୍ୟରେ ମାଆଙ୍କୁ ଧୂମଧାମରେ ରୋଷଣୀ କରି ମେଲାଣି ଦେଉଥିବା ବେଳେ କେନ୍ଦ୍ରାପଡ଼ା ରାଜନଗରରେ ମା' ଙ୍କୁ ଭିନ୍ନ ଢଙ୍ଗରେ ବିଦାୟ ଦିଆଯାଇଛି । ଏଠି ଡଙ୍ଗାରେ ଦିଆଯାଇଛି ମା'ଙ୍କୁ ବିଦାୟ । ହଂସୁଆ ନଦୀରେ ୭ ଘେରା ଚାପ ଖେଳିବା ପରେ ମା' ଙ୍କୁ ଗଭୀର ନଦୀରେ ବିସର୍ଜନ କରାଯାଇଛି ।

ବର୍ଷ ବର୍ଷ ଧରି କେନ୍ଦ୍ରାପଡ଼ା ରାଜନଗରରେ ଗାଁରେ ଏହି ପରମ୍ପରା ଚାଲି ଆସୁଛି । ପ୍ରତି ବର୍ଷ ଦୁର୍ଗା ପୂଜାର ଶେଷ ଦିନରେ କେବଳ ଘଣ୍ଟ ଘଣ୍ଟା ଓ ପାରମ୍ପରିକ ବାଦ୍ୟ ଯନ୍ତ୍ର ସାହାଯ୍ୟରେ ମାଆଙ୍କୁ ମଣ୍ଡପରୁ ଗୋପାଳ ସମ୍ପ୍ରଦାୟର ଲୋକମାନେ କାନ୍ଧେଇ ନେଇଥାନ୍ତି । ପରେ ସୁସଜ୍ଜିତ ହୋଇଥିବା ନୌକାରେ ମାଆଙ୍କୁ ବସାଇବା ପରେ ଆରମ୍ଭ ହୁଏ ଚାପ ଖେଳ । ହଂସୁଆ ନଦୀରେ ୭ ଘେରା ଚାପ ଖେଳିବା ପରେ ମା' ଙ୍କୁ ଗଭୀର ନଦୀରେ ବିସର୍ଜନ କରାଯିବାର ରହିଛି ପରମ୍ପରା । ଏହି ନିଆରା ଭସାଣି ଦେଖିବା ପାଇଁ ହଂସୁଆ ନଦୀ ପଠାରେ ଲାଗିଥାଏ ହଜାର ହଜାର ଶ୍ରଦ୍ଧାଳଙ୍କ ଭିଡ । କରୋନା ପାଇଁ 2 ବର୍ଷ ଭସାଣି ବନ୍ଦ ଥିବାରୁ ଚଳିତ ବର୍ଷ ଅଧିକ ଶ୍ରଦ୍ଧାଳୁ ଭିଡ଼ ଦେଖିବା ପାଇଁ ମିଳିଥିଲା । ଯେଉଁଥି ପାଇଁ ପ୍ରଶାସନ ତରଫରୁ ବ୍ୟାପକ ବନ୍ଦବସ୍ତ କରାଯାଇଥିଲା ।