ନନ୍ଦନକାନନରେ ଦିନକରେ ଜନ୍ମ ନେଲେ 9 ଆନାକୋଣ୍ଡା

ଏକାଥରକେ 9 ଶାବକ ଜନ୍ମ ଦେଲା ଆନାକୋଣ୍ଡା । ଏହି ନୂଆ ଅତିଥିଙ୍କୁ ମିଶାଇ ଏବେ ପ୍ରାଣୀ ଉଦ୍ୟାନରେ ହଳଦିଆ ଆନାକୋଣ୍ଡାଙ୍କ ସଂଖ୍ୟା 14କୁ ବୃଦ୍ଧି ପାଇଛି ।

Published: Saturday, July 9, 2022, 13:14 [IST]

ଭୁବନେଶ୍ବର: ଏକାଥରକେ 9 ଶାବକ ଜନ୍ମ ଦେଲା ଆନାକୋଣ୍ଡା । ଏହି ନୂଆ ଅତିଥିଙ୍କୁ ମିଶାଇ ଏବେ ପ୍ରାଣୀ ଉଦ୍ୟାନରେ ହଳଦିଆ ଆନାକୋଣ୍ଡାଙ୍କ ସଂଖ୍ୟା 14କୁ ବୃଦ୍ଧି ପାଇଛି । ଏପରି ଏକାସହିତ ଏତେ ସାପଛୁଆ ଜନ୍ମ ହେବା ନନ୍ଦନକାନନ ଇତିହାସରେ ପ୍ରଥମ ବୋଲି କୁହାଯାଉଛି। ବୁଧବାର ଗୋଟିଏ ଶାବକକୁ ଜନ୍ମ ଦେବା ପରେ ମାଈ ହଳଦିଆ ଆନାକୋଣ୍ଡାଟି ଆଉ ପ୍ରସବ କରିନଥିଲା । କିନ୍ତୁ ତାର ପେଟ ଫୁଲି ରହିଥିବାରୁ କର୍ତ୍ତୃପକ୍ଷ ଓ ଚିକିତ୍ସକଙ୍କ ଚିନ୍ତାରେ ପଡିଥିଲେ। ଉକ୍ତ ଆନାକୋଣ୍ଡାକୁ ଖୁଆଡ଼ ମଧ୍ୟରୁ ଅଲଗା କରି ସ୍ବତନ୍ତ୍ର ନିରୀକ୍ଷଣରେ ରଖାଯାଇଥିଲା । ପାଖାପାଖି 36 ଘଣ୍ଟା ପରେ ବି ସ୍ଥିତିରେ କୌଣସି ଉନ୍ନତି ନ ହେବାରୁ ଓୟୁଏଟି ପ୍ରାଣୀ ବିଭାଗରକୁ ଖବର ଦିଆଯାଇଥିଲା ।

ଗତକାଲି ଓୟୁଏଟିର ଅସ୍ଥିଶଲ୍ୟ ବିଭାଗର ମୁଖ୍ୟ ପ୍ରଫେସର୍‌ ଓ ପ୍ରସୂତି ବିଭାଗର ପ୍ରଫେସର୍‌ ବିଜୟ କୁମାର ସାହୁ ପ୍ରାଣୀ ଉଦ୍ୟାନରେ ପହଞ୍ଚି ଆନାକୋଣ୍ଡାଟିର ସ୍ବାସ୍ଥ୍ୟ ଯାଞ୍ଚ କରିଥିଲେ । ଅଲଟ୍ରାସାଇଣ୍ଡ କରାଯିବାରୁ ତା ଗର୍ଭରେ ଆଉ 9ଟି ଶାବକ ଥିବା ଜଣାପଡ଼ିଥିଲା । ତେଣୁ ସରଳ ପ୍ରସବ କରାଇବା ପାଇଁ ଅକ୍ସିଟକସିନ୍ ଦେଇ ଚିକିତ୍ସା କରାଯାଇଥିଲା । ପ୍ରାୟ ଏକ ଘଣ୍ଟା ପରେ ଗୋଟି ଗୋଟି ହୋଇ ମାଈ ଆନାକୋଣ୍ଡା ଗର୍ଭରେ ଥିବା 8ଟି ଶାବକ ପଦାକୁ ବାହାରି ଆସିଥିଲେ। ଶେଷକୁ ରହିଥିବା ଶାବକଟି ମରିଯାଇଥିବାରୁ ପଦାକୁ ବାହାରି ପାରିନଥିଲା ।

ସୂଚନାଯୋଗ୍ୟ, 2019 ମସିହାରେ ମାଡ୍ରାସର କ୍ରୋକୋଡାଇଲ୍‌ ବ୍ୟାଙ୍କରୁ ପ୍ରଥମଥର ପାଇଁ 8ଟି ହଳଦିଆ ଆନାକୋଣ୍ଡାଙ୍କୁ ନନ୍ଦନକାନନ ଅଣାଯାଇଥିଲା। ସେଥିମଧ୍ୟରୁ ସଂକ୍ରମଣରେ 3 ଜଣଙ୍କ ମୃତ୍ୟୁ ହୋଇଯାଇଥିଲା।

Published On July 9, 2022