ପାରାଦୀପରେ ଦୁଇଟି ଟ୍ରଲରର ମିଳୁ ନାହିଁ ପତ୍ତା, ନିଖୋଜ ୧୩ ମତ୍ସ୍ୟଜୀବୀ

Updated: Monday, January 16, 2023, 18:04 [IST]

ଜଗତସିଂହପୁର: ଗତ ୪ ଦିନ ହେଲା ନିଖୋଜ ଅଛି ୨ଟି ଟ୍ରଲର । ଯେଉଁଥିରେ ୧୩ ମତ୍ସ୍ୟଜୀବୀ ଥିବା ନେଇ ସୂଚନା ରହିଛି । ଅନେକ ଖୋଜା ଖୋଜି ପରେ ବିଫଳ ହେବା ପରେ ମତ୍ସ୍ୟ ବିଭାଗର ଅତିରିକ୍ତ ଅଧିକାରୀ ଭାରତୀୟ ତଟରକ୍ଷୀବାହିନୀ ଏବଂ ସାମୁଦ୍ରିକ ଥାନା ପୋଲିସକୁ ଏହି ସମ୍ପର୍କରେ ଏକ ଚିଠି ଲେଖିଛନ୍ତି ।

ମତ୍ସ୍ୟ ବିଭାଗର ଅତିରିକ୍ତ ଅଧିକାରୀଙ୍କ ସୂଚନା ଅନୁସାରେ, ପାରଦୀପଠାରୁ ୮୮ ନଟିକାଲ୍ ମାଇଲ୍ ଦୂରକୁ ମାଛ ଧରିବା ପାଇଁ ଯାଇଥିବା ୨ଟି ଟ୍ରଲରର ଗତ ଚାରି ଦିନ ହେବ ପତ୍ତା ମିଳିପାରୁ ନାହିଁ । ଜଣେ ଟ୍ରଲର ମାଲିକଙ୍କ କହିବା ଅନୁସାରେ, ତାଙ୍କ ଟ୍ରଲରରେ ଚାଳକଙ୍କୁ ମିଶାଇ ମୋଟ୍ ୭ଜଣ ମତ୍ସ୍ୟଜୀବୀ ଥିଲେ । ସେହିପରି ଆଉ ଜଣେ ଟ୍ରଲର ମାଲିକ ଅଭିଯୋଗ କରିଛନ୍ତି ଯେ, ତାଙ୍କ ଟ୍ରଲରେ ମୋଟ୍ ୬ଜଣ ମତ୍ସ୍ୟଜୀବୀ ଥିଲେ । ତେବେ ଚାରି ଦିନ ପୂର୍ବରୁ ଏହି ଦୁଇଟି ଟ୍ରଲର ମାଛ ଧରିବା ପାଇଁ ସମୁଦ୍ର ଭିତରକୁ ଯାଇଥିଲେ ହେଲେ ନିର୍ଦ୍ଧାରିତ ସମୟରେ ଫେରି ନଥିଲେ । ପରେ ଟ୍ରଲର ଚାଳକଙ୍କ ସହ ଯୋଗାଯୋଗ କରିବା ପାଇଁ ଚେଷ୍ଟା କରାଯାଇଥିଲା ହେଲେ ଯୋଗାଯୋଗ ମଧ୍ୟ ହୋଇ ପାରି ନଥିଲା । ଶେଷରେ ଦୁଇ ଟ୍ରଲର ମାଲିକ ମତ୍ସ୍ୟ ବିଭଗରୁ ଏ ବିଷୟରେ ଅବଗତ କରାଇଥିଲେ ।