ଓଡିଶା ଇନଫ୍ରାଟେକ୍ ର ନିର୍ଦ୍ଦେଶକ ପଦରୁ ମନୋରଞ୍ଜନଙ୍କ ଇସ୍ତଫା

ଓଡିଶା ଇନଫ୍ରାଟେକ୍ ର ନିର୍ଦ୍ଦେଶକ ପଦରୁ ମନୋରଞ୍ଜନ ଷଡଙ୍ଗୀଙ୍କ ଇସ୍ତଫା

ଭୁବନେଶ୍ୱର : ଓଡିଶା ଇନଫ୍ରାଟେକର ନିର୍ଦ୍ଦେଶକ ପଦରୁ ମନୋରଞ୍ଜନ ଷଡଙ୍ଗୀ ଇସ୍ତଫା ଦେଇଛନ୍ତି । ଏସମ୍ପର୍କରେ ମନୋରଞ୍ଜନଙ୍କ ସଂପର୍କୀୟ ଗଣମାଧ୍ୟମକୁ ସୂଚନା ଦେଇଛନ୍ତି । ସ୍ୱାସ୍ଥ୍ୟଗତ କାରଣ ଦର୍ଶାଇ ସେ ଏହି ଇସ୍ତଫା ଦେଇଥିବା ତାଙ୍କ ସଂପର୍କୀୟ କହିଛନ୍ତି । ଏଥିସହ ଓଡିଭିର ଚିଫ୍ ଫାଇନାନ୍ସ ଅଫିସର ପଦବୀରୁ ମଧ୍ୟ ସେ ଇସ୍ତଫା ଦେଇଥିବା ସେ କହିଛନ୍ତି । ସାରୁଅ ଜମି ଜାଲିଆତି ମାମଲାରେ ମନୋରଞ୍ଜନଙ୍କୁ କ୍ରାଇମବ୍ରାଞ୍ଚର ଅର୍ଥନୀତିକ ଅପରାଧ ଶାଖା ଗିରଫ କରିଥିଲା । ଏବେ ମନୋରଞ୍ଜନ ଝାରପଡା ଜେଲ୍ ବିଚାର ବିଭାଗୀୟ ହାଜତରେ ଅଛନ୍ତି ।

ସୂଚନାଥାଉକି, ସାରୁଅ ଜମି ଦୁର୍ନୀତି ମାମଲାରେ ଗତ 1 ତାରିଖରେ କ୍ରାଇମବ୍ରାଞ୍ଚ ମନୋରଞ୍ଜନଙ୍କୁ ଗିରଫ କରିଥିଲା । ଗିରଫ ପରେ ତାଙ୍କୁ ରିମାଣ୍ଡରେ ଆଣି ପଚରାଉଚରା କରିଥିଲା । ଏହି ପଚରାଉଚରା ମଧ୍ୟରେ ସାରୁଅ ଜମି ନେଇ ଅନେକ କେଳେଙ୍କାରୀର ପର୍ଦ୍ଦାଫାସ ହୋଇଥିଲା । ଆଦିବାସୀମାନଙ୍କ ଜମିକୁ ଓଡିଶା ଇନଫ୍ରାଟେକ୍ ତା ଡ୍ରାଇଭର ରବି ସେଠୀଙ୍କ ଜରିଆରେ କିଭଳି କିଣିଥିଲା ସେନେଇ ଗୁମର ଖୋଲିଥିଲା । ଅନେକ ବେନାମୀ ଆକାଉଣ୍ଟ ଜରିଆରେ ଜମି କିଣିବିକା ହୋଇଥିବା କ୍ରାଇମବ୍ରାଞ୍ଚ ତା ତଦନ୍ତରେ ଜାଣିବାକୁ ପାଇଥିଲା । ଏହାକୁ ନେଇ ଆୟକର ବିଭାଗକୁ ଅଧିକ ତଦନ୍ତ ପାଇଁ ଚିଠି ମଧ୍ୟ ଲେଖିଛି କ୍ରାଇମବ୍ରାଞ୍ଚ । ଅପରପକ୍ଷରେ ମନୋରଞ୍ଜନଙ୍କ ଶଳା ହରି ମିଶ୍ର କହିଛନ୍ତି ତାଙ୍କ ଭିଣୋଇଙ୍କର ସଚ୍ଚୋଟତାର ସୁଯୋଗ ନେଇ ଫସାଇ ଦିଆଯାଇଛି । ଏକ ନିର୍ଦ୍ଦିଷ୍ଟ ପୁଞ୍ଜିପତି ନିଜକୁ ଧନୀ କରିବା ପାଇଁ ଅନ୍ୟକୁ କିଭଳି ବକରା ବନାନ୍ତି ସେମିତି ମନୋରଞ୍ଜନ ଷଡଙ୍ଗୀଙ୍କୁ ବନାଯାଇଛି ବୋଲି ତାଙ୍କ ଶଳା ଗଣମାଧ୍ୟମକୁ କହିଛନ୍ତି ।

English summary

Odisha Infratec Cfo Manoranja Sarangi Resigned