ଆସନ୍ତା ମାସରେ ଲାଗିବା ପାଇଁ ଯାଉଛି ବର୍ଷର ପ୍ରଥମ ଚନ୍ଦ୍ର ଗ୍ରହଣ , ଭାରତରେ ହେବ କି ଦୃଶ୍ୟମାନ ?

Updated: Wednesday, May 3, 2023, 17:11 [IST]

ଭୁବନେଶ୍ୱର: ବିଜ୍ଞାନ ସହିତ ଜ୍ୟୋତିଷ ଶାସ୍ତ୍ରରେ ମଧ୍ୟ ଚନ୍ଦ୍ର ଗ୍ରହଣର ବିଶେଷ ମହତ୍ୱ ଉଲ୍ଲେଖ କରାଯାଇଛି । ଚନ୍ଦ୍ରଗ୍ରହଣ ସମୟରେ ପୃଥିବୀ, ସୂର୍ଯ୍ୟ ଏବଂ ଚନ୍ଦ୍ର ଏକ ସରଳରେଖାରେ ଅବସ୍ଥାନ କରୁଥିବାରୁ ପୃଥିବୀର ଛାୟା କିଛି ସମୟ ପାଇଁ ଚନ୍ଦ୍ର ଉପରେ ପଡିଥାଏ ଏବଂ ଚନ୍ଦ୍ରର ପ୍ରକାଶ ଫିକା ପଡିଯାଇଥାଏ ।

ଜ୍ୟୋତିଷ ଶାସ୍ତ୍ର ଅନୁଯାୟୀ ବା ହିନ୍ଦୁ ଧାର୍ମିକ କାହାଣୀ ଅନୁସାରେ ଚନ୍ଦ୍ର ଗ୍ରହଣ ଅଶୁଭ । ଚନ୍ଦ୍ର ମାତା, ମନୋଭାବ, ସମାଜରେ ସମ୍ମାନ, ଦର୍ଶନ, ମାନସିକ ଚିନ୍ତା, ବୁଦ୍ଧି ଏବଂ ଗୃହକୁ ଦର୍ଶାଏ । ସେଥିପାଇଁ ଚନ୍ଦ୍ରଗ୍ରହଣର ପ୍ରଭାବ ସମସ୍ତଙ୍କ ଉପରେ ପଡିଥାଏ । ଚାଲନ୍ତୁ ଜାଣିବା ଚଳିତ ବର୍ଷ ଚନ୍ଦ୍ରଗ୍ରହଣ କେବେ ଲାଗିବା ପାଇଁ ଯାଉଛି ।

ଚଳିତ ବର୍ଷ ୪ଟି ଚନ୍ଦ୍ରଗ୍ରହଣ ଓ ସୂର୍ଯ୍ୟପରାଗ ଲାଗିବା ପାଇଁ ଯାଉଛି । ଦୁଇଟି ସୂର୍ଯ୍ୟପରାଦ ଏବଂ ଦୁଇଟି ଚନ୍ଦ୍ରଗ୍ରହଣ ଲାଗିବ । ବର୍ଷର ପ୍ରଥମ ସୂର୍ଯ୍ୟପରାଗ ଏପ୍ରିଲ ୨୦ ତାରିଖ ଦିନ ହୋଇଥିଲା । ସେହିପରି ମେ'୫ ତାରିଖରେ ବୈଶାଖ ପୂର୍ଣ୍ଣିମା ବା ବୁଦ୍ଧ ପୂର୍ଣ୍ଣିମା ଦିନ ଚଳିତ ବର୍ଷର ପ୍ରଥମ ଚନ୍ଦ୍ର ଗ୍ରହଣ ଲାଗିବା ପାଇଁ ଯାଉଛି ।

ଚନ୍ଦ୍ର ଗ୍ରହଣ ସମୟ
ବର୍ଷର ପ୍ରଥମ ଚନ୍ଦ୍ରଗ୍ରହଣ ଆସନ୍ତା ମେ ୫ ତାରିଖ ଶୁକ୍ରବାର ଦିନ ହେବ । ରାତି ୮:୪୫ରୁ ଆରମ୍ଭ ହୋଇ ରାତି ୧ଟାରେ ଛାଡିବ । ଗ୍ରହଣର ପରମଗ୍ରାସ ସମୟ ରାତି ୧୦.୫୩ମିନିଟ୍ । ଏହି ଚନ୍ଦ୍ରଗ୍ରହଣକୁ ଉପଚ୍ଛାୟ ଚନ୍ଦ୍ର ଗ୍ରହଣ ବା ପେନମ୍ବ୍ରାଲ୍ ଚନ୍ଦ୍ରଗ୍ରହଣ ବୋଲି କୁହାଯାଉଛି । ଏହି ଚନ୍ଦ୍ରଗ୍ରହଣ ପ୍ରାୟ ୪ ଘଣ୍ଟା ୧୪ ମିନିଟ୍ ପର୍ଯ୍ୟନ୍ତ ଲାଗିବ ।

ଏହି ସ୍ଥାନଗୁଡିକରେ ଦୃଶ୍ୟମାନ ହେବ ଚନ୍ଦ୍ର ଗ୍ରହଣ

ମେ ୫ରେ ଲାଗିବା ପାଇଁ ଯାଉଥିବା ଚନ୍ଦ୍ରଗ୍ରହଣ ଭାରତରେ ଦୃଶ୍ୟମାନ ହେବ ନାହିଁ । ଏହି ଚନ୍ଦ୍ରଗ୍ରହଣ ଏସିଆ, ନ୍ୟୁଜିଲ୍ୟାଣ୍ଡ, ଅଷ୍ଟ୍ରେଲିଆ ଏବଂ ଦକ୍ଷିଣ ପୂର୍ବ ୟୁରୋପର କିଛି ଅଂଶରେ ଦୃଶ୍ୟମାନ ହେବ । ଭାରତରେ ଏହାର ପ୍ରଭାବ ରହିବ ନାହିଁ ତେଣୁ ଏଠାରେ ସୂତାକ ସମୟ ମଧ୍ୟ ହେବ ନାହିଁ । ତେଣୁ ଭାରତରେ ପୂଜାପାଠ କିମ୍ବା ଧାର୍ମିକ କାର୍ଯ୍ୟ ଉପରେ ଏହାର କୌଣସି ପ୍ରତିବନ୍ଧକ ରହିବ ନାହିଁ ।

ଚନ୍ଦ୍ରଗ୍ରହଣର ପ୍ରଭାବ
ଆସନ୍ତା ୫ ତାରିଖରେ ହେବାକୁ ଥିବା ଏହି ଚନ୍ଦ୍ରଗ୍ରହଣ ସମୟରେ ତୁଳା ରାଶିରେ ବ୍ୟକ୍ତିଙ୍କୁ ଅଧିକ ସତର୍କ ରହିବାକୁ ପଡିବ ।