ଏହି ସବୁ ବଡ଼ ନେତା ଥିଲେ ଦିନେ ସାମ୍ବାଦିକ, ହୋଇଗଲେ ରାଜନେତା

Published: Friday, May 17, 2024, 9:41 [IST]

ସାମ୍ବାଦିକତା ରୁ ରାଜନେତା ହେବା ବର୍ତ୍ତମାନ ଏକ ସାଧାରଣ କଥା ହୋଇଗଲାଣି । କିଛି ଦିନ ସାମ୍ବାଦିକତା ପରେ ଲୋକସମର୍ଥନ ହେଉ ଅବା ନିଜ ପରିଚୟରେ ରାଜନୀତିରେ ପାଦ ଥାପିଥାନ୍ତି । ନିକଟରେ ସାମ୍ବାଦିକ ତଥା ୟୁଟ୍ୟୁବର୍ ମନୀଷ କାଶ୍ୟପ ଭାରତୀୟ ଜନତା ପାର୍ଟି (ବିଜେପି) ରେ ଯୋଗ ଦେଇଥିଲେ । ୟୁଟ୍ୟୁବରେ ଲକ୍ଷ ଲକ୍ଷ ସବସ୍କ୍ରାଇବର ଥିବା କାଶ୍ୟପ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମର୍ଥନରେ ବାହାରିଛନ୍ତି । କିନ୍ତୁ କାଶ୍ୟପ ପ୍ରଥମ ସାମ୍ବାଦିକ ନୁହଁନ୍ତି ଯିଏ ରାଜନୀତିରେ ପ୍ରବେଶ କରିଛନ୍ତି, ତାଙ୍କ ପୂର୍ବରୁ ମଧ୍ୟ ଅନେକ ସାମ୍ବାଦିକ ସଫଳତାର ସହ ରାଜନୀତିରେ ନିଜର ପରିଚୟ ସୃଷ୍ଟି କରିଛନ୍ତି ।

ଅଟଳ ବିହାରୀ ବାଜପେୟୀ

ଅଟଳ ବିହାରୀ ବାଜପେୟୀ ସାମ୍ବାଦିକ ଭାବରେ ନିଜର କ୍ୟାରିଅର୍ ଆରମ୍ଭ କରିଥିଲେ । ଯାହାକି ରାଷ୍ଟ୍ରମଧର୍ମ, ପାଞ୍ଚଜନ୍ୟ ଏବଂ ସ୍ୱଦେଶ ଭଳି ଖବରକାଗଜରେ କାର୍ଯ୍ୟ କରିଥିଲେ । ଗୋ ସୁରକ୍ଷା, ହିନ୍ଦୁ ବ୍ୟକ୍ତିଗତ ନିୟମ ଏବଂ ବିଶ୍ୱ ସହିତ ଭାରତର ସମ୍ପର୍କ ଭଳି ଅନେକ ବିଷୟ ଉପରେ ସେ ଲେଖିଥିଲେ ।

ବାଜପେୟୀ ରାଷ୍ଟ୍ରିୟ ସ୍ୱୟଂ ସେବକ ସଂଗଠନ (ଆରଏସଏସ) ରେ ଜଣେ କଲେଜ ଛାତ୍ର ଭାବରେ ଯୋଗ ଦେଇଥିଲେ ଏବଂ 1947 ମସିହାରେ ଜଣେ ପୂର୍ଣ୍ଣକାଳୀନ କାର୍ଯ୍ୟକର୍ତ୍ତା ହୋଇଥିଲେ । ସମ୍ପାଦକ ଭାବରେ କାର୍ଯ୍ୟ କରୁଥିବାବେଳେ ବାଜପେୟୀ ରାଜନୀତିରେ ପ୍ରବେଶ କରି ଭାରତୀୟ ଜନସଂଘର ସଦସ୍ୟ ହୋଇଥିଲେ । ସେ ପ୍ରଥମେ 1957 ମସିହାରେ ଲୋକସଭାକୁ ନିର୍ବାଚିତ ହୋଇଥିଲେ ଏବଂ 47 ବର୍ଷ ଧରି ସଂସଦରେ ରହିଥିଲେ । 10 ଥର ଲୋକସଭାକୁ ଏବଂ ଦୁଇଥର ରାଜ୍ୟସଭାକୁ ନିର୍ବାଚିତ ହୋଇଥିଲେ । ଏପରିକି ସେ ଭାରତର ଜଣେ ଲୋକପ୍ରିୟ ପ୍ରଧାନମନ୍ତ୍ରୀ ବୋଲି ବେଶ୍ ଜଣାଶୁଣା ।

ଏମଜେ ଆକବର

1971 ମସିହାରେ ଏମଜେ ଆକବର ଟ୍ରେନି ଭାବରେ 'ଟାଇମ୍ସ ଅଫ୍ ଇଣ୍ଡିଆ'ରେ ଯୋଗ ଦେଇଥିଲେ । ଏହା ପରେ ଆକବର ଦେଶର ଅନେକ ପ୍ରମୁଖ ଗଣମାଧ୍ୟମ ଦି ଫ୍ରି ପ୍ରେସ ଜର୍ଣ୍ଣାଲ, ଏବିପି ଗ୍ରୁପ, ଦି ଟେଲିଗ୍ରାଫ, ଡେକାନ କ୍ରୋନିକଲ, ଦି ସଣ୍ଡେ ଜାର୍ଜିଆନ୍, ଇଣ୍ଡିଆ ଟୁଡେ, ହେଡଲାଇନ ଟୁଡେ ଇତ୍ୟାଦିରେ କାର୍ଯ୍ୟ କରିଥିଲେ । 1991 ରେ ଆକବର ରାଜନୀତିରେ ନିଜର ପାଦ ରଖିଥିଲେ । ବିହାରର କିଶାନଗଞ୍ଜରୁ ଲୋକସଭା ନିର୍ବାଚନରେ କଂଗ୍ରେସ ଟିକେଟରେ ପ୍ରତିଦ୍ୱନ୍ଦ୍ୱିତା କରିଥିଲେ ମଧ୍ୟ ଜିତିବାରେ ବିଫଳ ହୋଇଥିଲେ ।

ଏହା ପରେ ଆକବର ପୁଣି ସାମ୍ବାଦିକତାକୁ ଫେରିଥିଲେ । କିନ୍ତୁ 2014 ରେ ବିଜେପିରେ ଯୋଗ ଦେଇଥିଲେ । ସେ 2015 ରେ ବିଜେପି ଦ୍ୱାରା ରାଜ୍ୟସଭାକୁ ନିର୍ବାଚିତ ହୋଇଥିଲେ ଏବଂ ଜୁଲାଇ 2016 ରେ ବୈଦେଶିକ ବ୍ୟାପାର ମନ୍ତ୍ରୀ ହୋଇଥିଲେ । ତାଙ୍କ ବିରୋଧରେ ଯୌନ ଉତ୍ପୀଡ଼ନ ଅଭିଯୋଗ ବୃଦ୍ଧି ହେତୁ 2018 ରେ ସେ କ୍ୟାବିନେଟରୁ ଇସ୍ତଫା ଦେଇଥିଲେ ।

ଅରୁଣ ସୌରୀ

ଅରୁଣ ସୌରୀ ନିଜର କ୍ୟାରିଅର ଜଣେ ଅର୍ଥନୀତିଜ୍ଞ ଭାବରେ ଆରମ୍ଭ କରିଥିଲେ । 1967 ରୁ 1978 ପର୍ଯ୍ୟନ୍ତ ବିଶ୍ୱ ବ୍ୟାଙ୍କରେ କାର୍ଯ୍ୟ କରିଥିଲେ ଏବଂ 1972 ରୁ 1974 ପର୍ଯ୍ୟନ୍ତ ଭାରତୀୟ ଯୋଜନା ଆୟୋଗର ପରାମର୍ଶଦାତା ଭାବରେ କାର୍ଯ୍ୟ କରିଥିଲେ । ଏହା ପରେ ସେ 1975 ରେ ଜରୁରୀକାଳୀନ ପରିସ୍ଥିତିରେ ଇଣ୍ଡିଆନ୍ ଏକ୍ସପ୍ରେସ ଖବରକାଗଜରେ ଯୋଗ ଦେଇ ସାମ୍ବାଦିକତା କ୍ଷେତ୍ରରେ ପାଦ ରଖିଥିଲେ । ସେ 1979 ରେ ଇଣ୍ଡିଆନ୍ ଏକ୍ସପ୍ରେସର କାର୍ଯ୍ୟନିର୍ବାହୀ ସମ୍ପାଦକ ଭାବରେ ନିଯୁକ୍ତ ହୋଇଥିଲେ । 90 ଦଶକରେ ସୌରୀ ରାଜନୀତିରେ ପ୍ରବେଶ କରିଥିଲେ । 1998 ରୁ 2010 ପର୍ଯ୍ୟନ୍ତ ଲଗାତାର ଦୁଇ ଥର ସେ ବିଜେପି ସମର୍ଥନରେ ରାଜ୍ୟସଭା ସାଂସଦ ଭାବରେ ନିର୍ବାଚିତ ହୋଇଥିଲେ । ଏହି ସମୟ ମଧ୍ୟରେ ସେ ବାଜପେୟୀ ସରକାରରେ କ୍ୟାବିନେଟ ମନ୍ତ୍ରୀ ଭାବରେ ମଧ୍ୟ କାର୍ଯ୍ୟ କରିଥିଲେ ।

ଆଶୁତୋଷ

ଆଶୁତୋଷ ଜଣେ ସାମ୍ବାଦିକ ଯିଏ ନ୍ୟୁଜ୍ ଆଙ୍କର୍ ଏବଂ ନ୍ୟୁଜ୍ ଚ୍ୟାନେଲ୍ ଆଇବିଏନ୍ 7 ରେ ପରିଚାଳନା ସମ୍ପାଦକ ଭାବରେ କାର୍ଯ୍ୟ କରିଥିଲେ । ଜାନୁଆରୀ 2014 ରେ ଲୋକସଭା ନିର୍ବାଚନ ପୂର୍ବରୁ ଆଶୁତୋଷ ଆମ୍ ଆଦମୀ ପାର୍ଟିରେ ଯୋଗ ଦେଇଥିଲେ । ଆଶୁତୋଷ 2014 ଲୋକସଭା ନିର୍ବାଚନରେ ଦିଲ୍ଲୀର ଚାନ୍ଦନୀ ଚୌକ୍ ଆସନରୁ AAP ଟିକେଟ୍ ରେ ପ୍ରତିଦ୍ୱନ୍ଦ୍ୱିତା କରିଥିଲେ ମଧ୍ୟ ବିଜେପିର ବର୍ଷବର୍ଦ୍ଧନଙ୍କ ଠାରୁ ହାରିଥିଲେ । 2018 ପର୍ଯ୍ୟନ୍ତ AAP ର ନେତା ରହିଥିଲେ । ଏହା ପରେ ଆଶୁତୋଷ ପୁଣି ସାମ୍ବାଦିକତାକୁ ଫେରିଥିଲେ ଏବଂ ବର୍ତ୍ତମାନ ସେ 'ସତ୍ୟ ହିନ୍ଦୀ' ନାମକ ଏକ ୟୁଟ୍ୟୁବ୍ ଚ୍ୟାନେଲର ସହ-ପ୍ରତିଷ୍ଠାତା ଅଟନ୍ତି ।

ରାଜୀବ ଶୁକ୍ଳା

ରାଜୀବ ଶୁକ୍ଲା ଜଣେ ସାମ୍ବାଦିକ ଯିଏକି ରାଜନୀତିରେ ମଧ୍ୟ ସକ୍ରିୟ ଭାବରେ ଜଡିତ ଥିଲେ । ରାଜୀବ ଶୁକ୍ଲା ପ୍ରଥମେ ଉତ୍ତରପ୍ରଦେଶର ଏକ ଅଗ୍ରଣୀ ପ୍ରକାଶନ ସହିତ ସାମ୍ବାଦିକ ଭାବରେ ଆରମ୍ଭ କରିଥିଲେ ଏବଂ ପରେ ଜନସତ୍ତା, ଦୈନିକ ଜାଗରଣ ଭଳି ବିଭିନ୍ନ ପ୍ରକାଶନରେ କାର୍ଯ୍ୟ କରିଥିଲେ । ଜଣେ ସାମ୍ବାଦିକ ଭାବରେ ଶୁକ୍ଲା ଜଣେ ସମ୍ପାଦକ, ସ୍ତମ୍ଭକାର, ସମ୍ବାଦଦାତା ଏବଂ ବରିଷ୍ଠ ସମ୍ପାଦକ ଥିଲେ । 2000 ମସିହାରେ କଂଗ୍ରେସ ତାଙ୍କୁ ରାଜ୍ୟସଭାକୁ ନିର୍ବାଚିତ କରିବା ସହ ଶୁକ୍ଲାଙ୍କ ରାଜନୈତିକ କ୍ୟାରିୟର ଆରମ୍ଭ ହୋଇଥିଲା । ତାଙ୍କ ରାଜ୍ୟସଭା ସମୟରେ ସେ ସଂସଦୀୟ ବ୍ୟାପାର ଏବଂ ଯୋଜନା ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ଭାବରେ କାର୍ଯ୍ୟ କରିଥିଲେ ।

ମନୀଷ ସିସୋଦିଆ

ଦିଲ୍ଲୀର ଉପ ମୁଖ୍ୟମନ୍ତ୍ରୀ ରହିଥିବା ତଥା ଆମ୍ ଆଦମୀ ପାର୍ଟିର ବରିଷ୍ଠ ନେତା ମନୀଷ ସିସୋଦଜିଆ ମଧ୍ୟ ଜଣେ ସାମ୍ବାଦିକ । ସେ ଜି ନ୍ୟୁଜ୍ ଏବଂ ଅଲ୍ ଇଣ୍ଡିଆ ରେଡିଓ ସହିତ କାମ କରି ସାମ୍ବାଦିକ ଭାବରେ ନିଜର କ୍ୟାରିଅର୍ ଆରମ୍ଭ କରିଥିଲେ । ତାଙ୍କର ସାମ୍ବାଦିକତା କାର୍ଯ୍ୟ ପରେ ସେ ଅରବିନ୍ଦ କେଜ୍ରିୱାଲଙ୍କ ଅଣ-ଲାଭ ସଂଗଠନ 'ପାରିବର୍ତ୍ତନ' ଏବଂ 'କବୀର'ର ସଦସ୍ୟ ହୋଇଥିଲେ । ଏହା ପରେ ସିସୋଦିଆ ସାମ୍ବାଦିକତା ଛାଡିଥିଲେ । 'ସୂଚନା ଅଧିକାର ଆଇନ' ଏବଂ 2011 ମସିହାରେ ଆନ୍ନା ହଜାରେଙ୍କ 'ଦୁର୍ନୀତି ବିରୋଧରେ ଭାରତ' ରେ ସିସୋଦିଆ ପ୍ରମୁଖ ଭୂମିକା ଗ୍ରହଣ କରିଥିଲେ । ଏହା ପରେ ସିସୋଦିଆ କେଜ୍ରିୱାଲଙ୍କ ନିକଟତର ହେଲେ ଏବଂ କେଜ୍ରିୱାଲଙ୍କ ଦ୍ୱାରା ପ୍ରତିଷ୍ଠିତ ଆମ୍ ଆଦମୀ ପାର୍ଟିର ସଦସ୍ୟ ହେଲେ । 2013 ଦିଲ୍ଲୀ ବିଧାନସଭା ନିର୍ବାଚନରେ ସିସୋଡିଆ 11,000 ଭୋଟ୍ ବ୍ୟବଧାନରେ ଜିତିଥିଲେ । ଏପରିକି ଦଳ ତାଙ୍କୁ ଦିଲ୍ଲୀର ଉପ ମୁଖ୍ୟମନ୍ତ୍ରୀ ମଧ୍ୟ କରିଥିଲା ।

ସପନ ଦାସଗୁପ୍ତା

ଦାସଗୁପ୍ତ ଜଣେ ସ୍ତମ୍ଭକାର ତଥା ସାମ୍ବାଦିକ ଯିଏ ବିଗତ 30 ବର୍ଷ ମଧ୍ୟରେ ଟାଇମ୍ସ ଅଫ୍ ଇଣ୍ଡିଆ, ଇଣ୍ଡିଆନ୍ ଏକ୍ସପ୍ରେସ ଏବଂ ଦି ପାୟୋନିଅର୍ ଭଳି ଭାରତୀୟ ଖବରକାଗଜରେ କାର୍ଯ୍ୟ କରିଛନ୍ତି । 2015 ରେ ଦାସଗୁପ୍ତାଙ୍କୁ ପଦ୍ମ ଭୂଷଣ ପ୍ରଦାନ କରାଯାଇଥିଲା ଏବଂ ତାଙ୍କୁ ରାଜ୍ୟସଭାକୁ ମନୋନୀତ କରାଯାଇଥିଲା । ତେବେ 2021 ମସିହାରେ ସେ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ବିଜେପି ପ୍ରାର୍ଥୀ ଭାବରେ ପ୍ରତିଦ୍ୱନ୍ଦ୍ୱିତା କରିବାକୁ ରାଜ୍ୟସଭାରୁ ଇସ୍ତଫା ଦେଇଥିଲେ ।

Published On May 17, 2024