ସାଉଥ୍ ଇଷ୍ଟ୍‌ର ରାଣୀ, କରମଣ୍ଡଳର କାହାଣୀ

Updated: Tuesday, June 6, 2023, 13:59 [IST]

ଭୟଙ୍କର ରେଳ ଦୁର୍ଘଟଣାରେ ଓଡ଼ିଶା ମାଟିକୁ ସିକ୍ତ କରିଥିବା କରମଣ୍ଡଳ ଏକ୍ସପ୍ରେସ୍ ଏକ ସାଧାରଣ ଟ୍ରେନ୍ ନୁହଁ । ବିଗତ ଚାରି ଦଶନ୍ଧି ଧରି କୋଲ୍‌କାତା ଠାରୁ ଚେନ୍ନାଇ ଯାଏଁ ଲକ୍ଷ ଲକ୍ଷ ଲୋକଙ୍କ ଗନ୍ତବ୍ୟର ଜୀବନ ରେଖା ପାଲଟିଥିବା କରମଣ୍ଡଳ ଏକ୍ସପ୍ରେସ୍ ଏକଦା ଥିଲା ଭାରତର ବହୁ ଇପ୍‌ସିତ ରେଳଗାଡି ମଧ୍ୟରୁ ଅନ୍ୟତମ ।

୧୯୭୭ ମସିହା ମାର୍ଚ୍ଚ ୬ ତାରିଖରୁ ସେବା ଆରମ୍ଭ କରିଥିବା କରମଣ୍ଡଳ ଏକ୍ସପ୍ରେସ୍ ପ୍ରସିଦ୍ଧ ଥିଲା ତା'ର ସମୟାନୁବର୍ତ୍ତିତା ଏବଂ ସ୍ପିଡ୍ ପାଇଁ । ଦକ୍ଷିଣ ପୂର୍ବ ରେଳପଥର ଏକମାତ୍ର ଗାଡି ଯାହାର ଷ୍ଟପେଜ୍ ଖଡଗପୁର କିମ୍ବା ଖୋର୍ଦ୍ଧା ରୋଡ୍ ଭଳି ଗୁରୁତ୍ୱପୂର୍ଣ୍ଣ ଜଙ୍କ୍‌ସନ୍‌ରେ ନଥିଲା । ୨୦୧୫ ମସିହା ପର୍ଯ୍ୟନ୍ତ ଓଡିଶାର କେବଳ ଭୁବନେଶ୍ୱରରେ ଥିଲା କରମଣ୍ଡଳର ରହଣୀ ।

କୋଲକାତା ଠାରୁ ମାଡ୍ରାସ୍ ପର୍ଯ୍ୟନ୍ତ ଯାତ୍ରା ପ୍ରାୟ ୨୨ ଘଣ୍ଟାରେ ଅତିକ୍ରମ କରୁଥିଲା କରମଣ୍ଡଳ ଏକ୍ସପ୍ରେସ୍ । ଏଥିପାଇଁ ଏହି ଗାଡିରେ ଟିକେଟ୍ ପାଇବା କୌଣସି ଇପ୍‌ସିତ ବସ୍ତୁ ଠାରୁ କମ୍ ନଥିଲା ପୁରୁଣା ସମୟରେ ।

ପଶ୍ଚିମବଙ୍ଗ, ଆନ୍ଧ୍ରପ୍ରଦେଶ ଓ ତାମିଲନାଡୁ ସମେତ ୫ଟି ରାଜ୍ୟର ଜୀବନରେଖା ପାଲଟିଥିବା କରମଣ୍ଡଳ ଏକ୍ସପ୍ରେସ୍ ଶତାବ୍ଦୀ, ରାଜଧାନୀ ତଥା ଆଜିର ଗ୍ଲାମର୍ କିଙ୍ଗ୍ ବନ୍ଦେ ଭାରତ ଏକ୍ସପ୍ରେସ୍ ଠାରୁ ମଧ୍ୟ ଅଧିକ ଗୁରୁତ୍ୱପୂର୍ଣ୍ଣ ଗାଡି ଥିଲା ଏହିସବୁ ରାଜ୍ୟର ଯାତ୍ରୀମାନଙ୍କ ପାଇଁ ।

ପ୍ରାରମ୍ଭିକ ବର୍ଷ ଗୁଡିକରେ ଯେତେବେଳେ ହାଇସ୍ପିଡ୍ ରେଳଗାଡି କମ୍ ଚଳାଚଳ କରୁଥିଲା, ସେତେବେଳେ ହାୱଡା ଷ୍ଟେସନ୍‌ରୁ କଟକ ପର୍ଯ୍ୟନ୍ତ ସମ୍ପୂର୍ଣ୍ଣ ରେଳ ଟ୍ରାକ୍‌କୁ ଖାଲି କରାଯାଉଥିଲା କରମଣ୍ଡଳକୁ କ୍ଲିଅରାନ୍ସ ଦେବା ପାଇଁ । ଷ୍ଟେସନ୍ ଦେଇ ଯାଉଥିବା ଦ୍ରୁତଗାମୀ କରମଣ୍ଡଳ ଭାରତୀୟ ରେଳର ସୁନେଲି ଭବିଷ୍ୟତର ସ୍ୱପ୍ନକୁ ବଖାଣୁ ଥିଲା ।

ଆଗରୁ ଅନେକ ଥର ବଦ୍‌ନାମ ମୁଣ୍ଡାଇଛି କରମଣ୍ଡଳ:

1997 ମସିହା ଅଗଷ୍ଟ 15 ରେ କରମଣ୍ଡଳ ଡାଉନ୍ ଟ୍ରେନ୍ କରମଣ୍ଡଳ ଅପ୍ ସହ ମୁହାଁମୁହିଁ ଧକ୍କା ହୁଏ । ଏହି ଦୁର୍ଘଟଣା ଘଟେ ବିଶାଖାପାଟଣା ଏବଂ ବ୍ରହ୍ଣପୁର ମଧ୍ୟରେ । ଏଥିରେ ପ୍ରାଣ ହରାନ୍ତି 75 ଯାତ୍ରୀ ।
ସେହିପରି 1999 ନଗାବାଳୀ ନଦୀ ପାର୍ ହେବା ପରେ ଲାଇନଚ୍ୟୁତ ହୋଇ 50 ଜଣଙ୍କ ପ୍ରାଣ ନେବା ସହ 500 ରୁ ଅଧିକ ହୁଅନ୍ତି ଆହତ ।
ଓଡ଼ିଶାର ଯାଜପୁର-କେନ୍ଦୁଝର ରୋଡ଼ରେ ବି ରହିଛି କରମଣ୍ଡଳର କରୁଣ କାହାଣୀ । ସେଦିନ ଥିଲା 2009 ମସିହା 13 ଫେବୃଆରୀ । ଗାଡ଼ି ଲାଇନଚ୍ୟୁତ ହେବା ଯୋଗୁଁ ଦୁର୍ଘଟଣା ଘଟି ପ୍ରାଣ ହରାଇଥିଲେ 15 ଯାତ୍ରୀ ।
2012 ଡିସେମ୍ବର 30 ରେ 6 ହାତୀଙ୍କ ମୃତ୍ୟୁର ଦୋଷ ମୁଣ୍ଡାଇ ଥିଲା କରମଣ୍ଡଳ ।
ଏହା ପରେ ଏବେ 2023 ଜୁନ୍ 2 ର କାହାଣୀ ସମସ୍ତଙ୍କୁ ସ୍ତବ୍ଧ କରିଦେଇଛି । ଲାଇନଚ୍ୟୁତ ହେବା ପରେ ଅନ୍ୟ ଦୁଇ ଗାଡ଼ି ସହ ମାଡ଼ ହୋଇ ଘଟାଇଥିଲା ଭୟାନକ ଦୁର୍ଘଟଣା । ବର୍ତ୍ତମାନ ସୁଦ୍ଧା ସରକାରୀ ତଥ୍ୟ ଅନୁସାରେ ପ୍ରାଣ ହରାଇଲେଣି 275 ଯାତ୍ରୀ । ଆହତ ହୋଇଛନ୍ତି ହଜାରରୁ ଅଧିକ ଲୋକ ।