ଇନଫୋସିଟି ନାବାଳିକା ଗଣଦୁଷ୍କର୍ମ ମାମଲା : ବ୍ୟକ୍ତିଗତ ହାଜର ପାଇଁ ପୁଣି ଜଗି ପଣ୍ଡାଙ୍କୁ ହେବ ନୋଟିସ

ଇନଫୋସିଟି ଥାନା ନାବାଳିକା ଗଣଦୁଷ୍କର୍ମ ଘଟଣାରେ ବ୍ୟକ୍ତିଗତ ଭାବରେ ହାଜର ହେବାକୁ ଓଟିଭିର ଏମଡି ଜଗିମଙ୍ଗତ ପଣ୍ଡାଙ୍କୁ ନୋଟିସ୍ ହେବ

Updated: Friday, November 6, 2020, 17:09 [IST]

ଭୁବନେଶ୍ୱର : ଇନଫୋସିଟି ଥାନା ନାବାଳିକା ଗଣଦୁଷ୍କର୍ମ ଘଟଣାରେ ବ୍ୟକ୍ତିଗତ ଭାବରେ ହାଜର ହେବାକୁ ଓଟିଭିର ଏମଡି ଜଗିମଙ୍ଗତ ପଣ୍ଡାଙ୍କୁ ନୋଟିସ୍ ହେବ । ଆସନ୍ତା ସପ୍ତାହରେ କମିଶନଙ୍କ ପାଖରେ ବ୍ୟକ୍ତିଗତ ଭାବରେ ହାଜର ହେବାକୁ ଏନେଇ ନୋଟିସ କରିବେ ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗ । ଗଣମାଧ୍ୟମକୁ ସୂଚନା ଦେଇ ନୋଟିସ ସମ୍ପର୍କରେ କହିଛନ୍ତି ଆୟୋଗର ଅଧକ୍ଷ୍ୟା ସଂଧ୍ୟାବତୀ ପ୍ରଧାନ ।

ଇନଫୋସିଟି ଥାନା ନାବାଳିକା ଗଣଦୁଷ୍କର୍ମ ମାମଲାକୁ ପ୍ରଥମେ ଗ୍ରହଣ କରିଥିଲେ କମିଶନ । ଗଣଦୁଷ୍କର୍ମ ନେଇ ଓଟିଭି ଏମଡି ଜଗିମଙ୍ଗତ ପଣ୍ଡାଙ୍କ ନାଁରେ ଅଭିଯୋଗ ହୋଇଥିବାରୁ ତାଙ୍କୁ ହାଜର ହୋଇ ନିଜ ପକ୍ଷ ରଖିବା ପାଇଁ କମିଶନ ନୋଟିସ୍ କରିଥିଲେ । ହେଲେ ଜଗି ପଣ୍ଡା ନିଜେ ହାଜର ନ ହୋଇ ପ୍ରତିନିଧିଙ୍କ ଜରିଆରେ ନିଜ ଉତ୍ତର ରଖିଥିଲେ । ଯେଉଁଥିରେ କମିଶନ ସନ୍ତୁଷ୍ଟ ହୋଇନଥିଲେ । ଏହିକାରଣରୁ ଜଗିଙ୍କୁ ନିଜେ ଆସି କମିଶନରେ ହାଜର ହେବାକୁ ନୋଟିସ୍ କରାଯିବ ବୋଲି ସଂଧ୍ୟାବତୀ କହିଛନ୍ତି । ସେହିପରି ଏହି ମାମଲାକୁ ରଦ୍ଦ କରିବାକୁ ଜଗି ମଙ୍ଗତ ପଣ୍ଡା ଆବେଦନ କରିଥିଲେ । ହେଲେ ଏହାକୁ ରଦ୍ଦ ହେବାର କୌଣସି ପ୍ରଶ୍ନ ଉଠୁ ନାହିଁ ବୋଲି କହିଛନ୍ତି କମିଶନ । ସୂଚନାଥାଉକି, ଦୀର୍ଘଦିନ ଧରି ଏକ ବନ୍ଦ ଘର ଭତରେ ଜଣେ ନାବାଳିକାକୁ ଭୟ ଦେଖାଇ ଦୁଷ୍କର୍ମ କରାଯିବା ନେଇ ଅଭିଯୋଗ ହୋଇଥିଲା । ଏଥିରେ ଓଟିଭିର କର୍ମଚାରୀଙ୍କ ସଂପୃକ୍ତି ରହିଥିବା ନେଇ ଅଭିଯୋଗରେ ଦର୍ଶାଯାଇଥିଲା । ଏହାକୁ ନେଇ ମହିଳା କମିଶନ ଓ ଶିଶୁ ଅଧିକାର ଆୟୋଗ ଜଗି ପଣ୍ଡାଙ୍କୁ ହାଜର ହୋଇ ନିଜ ପକ୍ଷ ରଖିବାକୁ ନୋଟିସ୍ କରିଥିଲେ ।