ଛତ୍ରପତି ଶିବାଜୀ ଜୟନ୍ତୀ: ମୋଗଲଙ୍କୁ ହରାଇ ଜିତିଥିଲେ ଅନେକ ଗଡ, ଜାଣନ୍ତୁ ତାଙ୍କ ଜୀବନ କାହାଣୀ
ଆଜି ମହାନ ସମ୍ରାଟ୍ ଛତ୍ରପତି ଶିବାଜୀ ରାଜ ଭୋଁସଲେଙ୍କ ଜୟନ୍ତୀ । ଛତ୍ରପତି ଶିବାଜୀ ମହାରାଜ ଜୟନ୍ତୀ ୧୯ ଫେବୃଆରୀରେ ପାଳିତ ହୋଇଥାଏ । ବିଶେଷ କରି ମହାରାଷ୍ଟ୍ରରେ ଶିବାଜି ଜୟନ୍ତୀ ଉତ୍ସବ ବେଶ ଉତ୍ସାହର ସହିତ ପାଳନ କରାଯାଇଥାଏ । ଛତ୍ରପତି ଶିବାଜୀ ମହାରାଜ ଜୟନ୍ତୀ ମହାନ ମରାଠା ସମ୍ରାଟ ଛତ୍ରପତି ଶିବାଜୀ ମହାରାଜଙ୍କ ଜନ୍ମ ବାର୍ଷିକୀ ଭାବେ ପାଳନ କରାଯାଇଥାଏ ।
ଛତ୍ରପତି ଶିବାଜୀ ୧୬୩୦ ମସିହା ଫେବୃଆରୀ ୧୯ ତାରିଖରେ ଶିବନେରୀ ଦୁର୍ଗରେ ଜନ୍ମ ହୋଇଥିଲେ । ଏଥର ଦେଶରେ ତାଙ୍କର ୩୯୪ ତମ ଜୟନ୍ତୀ ପାଳନ ହେଉଛି । ଶିବାଜୀଙ୍କ ପିତା ଶାହଜୀ ଭୋସଲେ ସେନାରେ ସେନାପତି ଥିଲେ। ତାଙ୍କ ମାତା ଜିଜାବାଇ ଧାର୍ମିକ ସ୍ୱଭାବର ଥିଲେ । ପିଲାଦିନୁ ଶିବାଜୀ ଧାର୍ମିକ ଗ୍ରନ୍ଥ ଶୁଣି ଆସୁଥିଲେ। ସେଥିପାଇଁ ପିଲାଦିନୁ ହିଁ ତାଙ୍କ ମନରେ ଶାସକ ବର୍ଗଙ୍କ କ୍ରୁର ନୀତି ବିରୋଧରେ ଲଢ଼ିବାକୁ ନିଆଁ ଜାଗି ଉଠିଥିଲା ।
ନିଜ ଜନ୍ମଭୂମିକୁ ବିଦେଶୀମାନଙ୍କ କବଳରୁ ମୁକ୍ତକରିବା ଓ ହିନ୍ଦୁ ଜାତି ଓ ହିନ୍ଦୁ ଧର୍ମକୁ ରକ୍ଷା କରିବା ପାଇଁ ସେ ସଂକଳ୍ପ କରିଥିଲେ । ଛତ୍ରପତି ଶିବାଜୀ ମହାରାଜ ଜୟନ୍ତୀ, ଯାହା ଶିବ ଜୟନ୍ତୀ ଭାବରେ ମଧ୍ୟ ଜଣାଯାଏ । ମୋଗଲ ସମ୍ରାଟ ଔରଙ୍ଗଜେବଙ୍କ ବିରୋଧରେ ସ୍ବର ଉତ୍ତୋଳନ କରି ଭାରତର ଜଣେ ସାହାସୀ ଶାସକ ତଥା ମରାଠା ରାଜ୍ୟର ପ୍ରତିଷ୍ଠାତା ଭାବରେ ବେଶ ଜଣାଶୁଣା ଥିଲେ ଶିବାଜୀ ।
୧୬୭୦ ରେ ମୁଗଲ ସେନା ସହ ସେ ଯୁଦ୍ଧ କରିଥିଲେ। ମୁଗଲଙ୍କୁ ପରାଜିତ କରି ସିଂହଗଡ ଦୁର୍ଗରେ ବିଜୟ ପତାକା ଉଡ଼ାଇଥିଲେ। ଏହାପରେ ୧୬୭୪ ମସିହାରେ ପଶ୍ଚିମ ଭାରତରେ ମରାଠା ସାମ୍ରାଜ୍ୟର ଭିତ୍ତିପ୍ରସ୍ତର ସ୍ଥାପନ କରିଥିଲେ ।
ପ୍ରଥମେ ୧୬୫୬-୫୭ ରେ ଶିବାଜୀ ଓ ମୋଗଲଙ୍କ ମଧ୍ୟରେ ଯୁଦ୍ଧ ହୋଇଥିଲା। ସେ ମୁଗଲଙ୍କ ଅନେକ ସମ୍ପତ୍ତି ଓ ଶହ ଶହ ଘୋଡା କବଜା କରିନେଇଥିଲେ। ୧୬୮୦ ମସିହାରେ କୌଣସି ରୋଗ ଯୋଗୁଁ ନିଜ ରାଜଧାନୀ ରାଜଗଡ଼ରେ ଶିବାଜୀଙ୍କ ମୃତ୍ୟୁ ହୋଇଥିଲା ବୋଲି କୁହାଯାଏ। ଏହାପରେ ଶିବାଜୀଙ୍କ ପୁତ୍ର ସଂଭାଜୀ ରାଜ୍ୟଭାର ସମ୍ଭାଳି ଥିଲେ।
Click it and Unblock the Notifications
Sign in with Google