ଅଯୋଧ୍ୟାରେ ପରାଜୟକୁ ନେଇ ଏମିତି କିଛି କହିଦେଲେ ସିଏମ ଯୋଗୀ

ନୂଆଦିଲ୍ଲୀ: ଲୋକସଭା ନିର୍ବାଚନରେ ଅଯୋଧ୍ୟା ଆସନରେ ବିଜେପି ପରାଜିତ ହୋଇଛି । ଚଳିତ ବର୍ଷ ଜାନୁଆରୀରେ ଅଯୋଧ୍ୟାରେ ଶ୍ରୀ ରାମ ମନ୍ଦିର ପ୍ରାଣ ପ୍ରତିଷ୍ଠା କାର୍ଯ୍ୟକ୍ରମ ହେବା ଏବଂ ଏହି ସମାରୋହକୁ ବିଶ୍ବର ବିଭିନ୍ନ ସ୍ଥାନରୁ ଲୋକଙ୍କ ଆଗମନ ହେତୁ ଏହି ଆସନ ବିଜେପିର ସମ୍ମାନ ସହ ଜଡିତ ଥିଲା । ସମାଜବାଦୀ ପାର୍ଟିର ଦଳିତ ନେତା ଅବଧେଶ ପ୍ରସାଦ ଏଠାରୁ ଜିତିଥିଲେ । ଅଯୋଧ୍ୟା ଆସନରୁ ଅବଧେଶ ସଂସଦରେ ପହଞ୍ଚିବା ପରେ ଖାଲି ପଡିଥିବା ସ୍ଥାନରେ ବର୍ତ୍ତମାନ ନଭେମ୍ବର ୨୦ ରେ ଉପ-ନିର୍ବାଚନ ଅନୁଷ୍ଠିତ ହେବାକୁ ଯାଉଛି ।

ଏହି କ୍ରମରେ ଝାଡଖଣ୍ଡରେ ପ୍ରଚାର କରିବାକୁ ଆସିଥିବା ସିଏମ୍ ଯୋଗୀ ଆଦିତ୍ୟନାଥ ଏକ ରାଲିରେ କହିଛନ୍ତି ଯେ, ଯଦି ଅଯୋଧ୍ୟାରେ ହିନ୍ଦୁମାନଙ୍କୁ ବିଭାଜିତ କରାଯାଇ ନଥାନ୍ତା ତେବେ ସେମାନଙ୍କୁ ଅପମାନର ସମ୍ମୁଖୀନ ହେବାକୁ ପଡ଼ି ନଥାନ୍ତା। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସୋମବାର ଝାଡଖଣ୍ଡର ରାଜମହଲ ବିଧାନସଭା ଆସନରେ ନିର୍ବାଚନ ସମାବେଶକୁ ସମ୍ବୋଧିତ କରି କହିଛନ୍ତି ଯେ ଆମେ ବିଭାଜିତ ହେବାକୁ ଚାହୁଁ ନାହୁଁ, କାରଣ ଯଦି ଆମେ ଭାଗ ଭାଗ ହୋଇଯିବା, ତେବେ ଆମକୁ କାଟି ଦିଆଯିବ।

ଯଦି ଆମେ ଏକାଠି ରହିବା ତେବେ ଆମେ ସୁରକ୍ଷିତ ରହିବା । ମୁଁ ଏହି ଆହ୍ବାନ କରିବାକୁ ତୁମ ପାଖକୁ ଆସିଛି । ଜାତି ନାମରେ ବିଭାଜନ କରୁଥିବା ନେତାମାନେ ସମାଜର ଶତ୍ରୁ, ଦେଶର ଶତ୍ରୁ । ଆମକୁ ବିକଶିତ ଭାରତର ଦର୍ଶନକୁ ଆଗକୁ ନେବାକୁ ପଡିବ ।