Tirupati laddu: ପଶୁଚର୍ବି ପରେ ଏବେ ପ୍ରସାଦରୁ ମିଳିଲା ତମାଖୁ ପ୍ୟାକେଟ୍‌!

ହାଇଦ୍ରାବାଦ : ତିରୁପତି ଲଡୁକୁ ନେଇ ବିବାଦ ଥମିବାର ନାଁ ଧରୁନାହିଁ । ଲଡୁରେ ପଶୁ ଚର୍ବି ମିଶା ଘଟଣା ଦିନକୁ ଦିନ ତେଜିବାର ଲାଗିଛି । ଅଭିଯୋଗ ଆସିବା ପରେ ସାରା ଦେଶରେ ଜାରି ରହିଛି ତୀବ୍ର ପ୍ରତିବାଦ । ଏହାରି ଭିତରେ ସାମ୍ନାକୁ ଆସିଛି ଆଉ ଏକ ସାଙ୍ଘାତିକ ଅଭିଯୋଗ। ପ୍ରସାଦ ରୂପେ ଦିଆଯାଉଥିବା ଲଡ଼ୁରେ ମିଶୁଛି ତମାଖୁ । ଯାହାପରେ ସାରା ଦେଶରେ ଚହଳ ପଡିଛି।

ତେଲେଙ୍ଗାନାର ଖମ୍ମାମ ଜିଲାର ଜଣେ ମହିଳା ଭକ୍ତ ଆନ୍ଧ୍ରପ୍ରଦେଶର ତିରୁପତି ମନ୍ଦିରର ପ୍ରସାଦକୁ ନେଇ ଉଦବେଗ ପ୍ରକାଶ କରିଛନ୍ତି । ସେ ଦାବି କରିଛନ୍ତି ଯେ, ତିରୁପତି ମନ୍ଦିରର ପବିତ୍ର ଲଡୁରୁ ତମାଖୁ ମିଳିଛି । ତାଙ୍କ କହିବାନୁସାରେ, ଯେତେବେଳେ ସେ ତିରୁପତି ମନ୍ଦିରର ପ୍ରସାଦ ତାଙ୍କ ଘରକୁ ଆଣିଥିଲେ, ସେତେବେଳେ ସେ ପ୍ରସାଦରେ ଏକ କାଗଜରେ ତମାଖୁ ଗୁଡା ହୋଇଥିବାର ଦେଖିବାକୁ ପାଇଥିଲେ ।ଏଠାରେ ପ୍ରସାଦ ରୂପେ ଦିଆଯାଉଥିବା ପବିତ୍ର ଲଡୁକୁ ସେ ନିଜ ପରିବାର ଓ ପଡୋଶୀ ସହ ବାଣ୍ଟିବା ପାଇଁ ଆଣିଥିଲେ। ତେବେ ଘରକୁ ଆଣି ବାଣ୍ଟିବା ପାଇଁ ଲଡ଼ୁ ଖୋଲିବା ପରେ ଏଥିରେ କାଗଜରେ ଗୁଡା ହୋଇଥିବା ତମାଖୁ ଖଣ୍ଡ ଥିବା ଦେଖିବାକୁ ପାଇଥିଲେ । ଏହାକୁ ନେଇ ସେ ଅସନ୍ତୋଷ ବ୍ୟକ୍ତ କରିଛନ୍ତି।

ସେପଟେ ଟ୍ରଷ୍ଟ କହିଛି, ତିରୁମାଲାରେ ବୈଷ୍ଣବ ବ୍ରାହ୍ମଣ ସମାଜ ଲଡୁ ପ୍ରସାଦ ତିଆରି କରନ୍ତି । ଏଠାରେ ଭକ୍ତିର ସହ ପ୍ରତ୍ୟେକ ଦିନ ଲକ୍ଷାଧିକ ଲଡୁ କଡ଼ାକଡ଼ି ଭାବରେ ତିଆରି କରାଯାଇଥାଏ । ଲଡୁ ତିଆରି ହେଉଥିବା ସ୍ଥାନରେ ସିସିଟିଭି କ୍ୟାମେରା ଲାଗିଛି । ଏହାର ଅର୍ଥ, ଏହା ଉପରେ କଡ଼ା ନଜର ମଧ୍ୟ ରଖାଯାଇଥାଏ । ଟ୍ରଷ୍ଟ ଆହୁରି କହିଛି ଯେ ଲଡୁ ତିଆରିରେ ବହୁତ ସାବଧାନତା ଅବଲମ୍ବନ କରାଯିବା ସତ୍ତ୍ୱେ ତମାଖୁ ମିଳିବା କଥା କହିବା ଅତ୍ୟନ୍ତ ନିନ୍ଦନୀୟ । ଭକ୍ତମାନେ ନିଜେ ଏହାକୁ ଦେଖିପାରିବେ ।