କ'ଣ ଏହି Deepseek , ଯିଏ AI ଜଗତରେ ସୃଷ୍ଟି କଲା ଝଡ ,ଆପ୍ ଷ୍ଟୋରରେ ନମ୍ବର ୧ ହେଲା, ଚିନ୍ତାରେ ବଡ ଟେକ୍ କମ୍ପାନୀ

ଚାଇନାର ଷ୍ଟାର୍ଟଅପ୍ ଡୀପସିକ୍ ତାହାର ଅତ୍ୟାଧୁନିକ ଏଆଇ ମଡେଲ ସହିତ ଟେକ୍ନୋଲୋଜି ଜଗତରେ ଏକ ଝଡ଼ ସୃଷ୍ଟି କରିଛି । ବହୁତ କମ୍ ମୂଲ୍ୟରେ ନିର୍ମିତ ହୋଇଥିଲେ ମଧ୍ୟ ଆମେରିକାର ଯେକୌଣସି ଶିଳ୍ପ-ଅଗ୍ରଣୀ ଏଆଇ ମଡେଲ୍ ତୁଳନାରେ ଏହା ସମାନ କିମ୍ବା ଉନ୍ନତ ବୋଲି କମ୍ପାନୀ କହିଛି। କମ୍ପାନୀ ଗତ ମାସରେ ଗ୍ଲୋବାଲ୍ ଆଇ ସର୍କଲରେ ଧ୍ୟାନ ଆକର୍ଷଣ କରି କହିଥିଲା ଯେ ଡିପସିକ୍‌-ଭି୩ କୁ ପ୍ରଶିକ୍ଷଣ ଦେବା ପାଇଁ ଏନ୍‌ଭିଡ଼ିଆ ଏଚ୍‌୮୦୦ ଚିପ୍ସରୁ ୬ ମିଲିୟନ୍ ଡଲାରରୁ କମ୍ କମ୍ପ୍ୟୁଟିଙ୍ଗ୍ ପାୱାରର ଆବଶ୍ୟକତା ପଡ଼ିଛି ।

ଗତ ସପ୍ତାହରେ ଲଞ୍ଚ ହୋଇଥିବା ଡ଼ିପସିକ୍ ଆପ୍ ଆମେରିକାର ସବୁଠାରୁ ଡାଉନଲୋଡ୍ ହୋଇଥିବା ମାଗଣା ଆପ୍ ହେବା ପାଇଁ ଚାଟ୍ ଜିପିଟି ସମେତ ପ୍ରତିଦ୍ୱନ୍ଦୀଙ୍କୁ ଅତିକ୍ରମ କରିଛି। ଆମେରିକାର ସେୟାର ବଜାର ଖୋଲିବା ପୂର୍ବରୁ ଏନଭିଡିଆ, ମାଇକ୍ରୋସଫ୍ଟ ଏବଂ ମେଟା ପରି ଆମେରିକାର ଆଧାରିତ ତଥା ଏଆଇ -ସମ୍ବନ୍ଧୀୟ ବୈଷୟିକ ସଂସ୍ଥାଗୁଡ଼ିକର ସେୟାର ସୋମବାର ହ୍ରାସ ପାଇଛି।

ଏହି ଡିପସିପ୍ କଣ?

ଏହା ହେଉଛି ଚାଇନାର ଏଆଇ ଷ୍ଟାର୍ଟଅପ୍ । ଏହି ଷ୍ଟାର୍ଟଅପ୍ ଏହାର ଅନନ୍ୟ ଉଦ୍ଭାବନ ପାଇଁ ଜଣାଶୁଣା । ଏହାର ପ୍ରତିଷ୍ଠାତା ହେଉଛନ୍ତି ଲିଆଙ୍ଗ ୱେନଫେଙ୍ଗ । ଏହି ଷ୍ଟାର୍ଟଅପ୍ ନିକଟରେ ଏହାର ଏଆଇ ଚାଟବୋଟ୍ ଡିପସିକ୍‌- ଆର୧ ରିଲିଜ୍ କରିଛି । ରିଲିଜ୍ ହେବାର ଅଳ୍ପ ସମୟ ମଧ୍ୟରେ ଏହା ସାରା ବିଶ୍ୱ ବଜାରରେ ଲୋକପ୍ରିୟ ହୋଇଛି । ଏହା ଆମେରିକାର ଆପଲ୍ ଆପ୍ ଷ୍ଟୋରରେ ସବୁଠୁ ଅଧିକ ରେଟିଙ୍ଗ୍ ପାଇଥିବା ଫ୍ରି ଆପ୍ ହୋଇଯାଇଛି ।

କେବଳ ୬ ନିୟୁତ ଡଲାର ଖର୍ଚ୍ଚ ହୋଇଛି

ଅନେକ ଲୋକ ଏହି ଏଆଇ ସହାୟକ ମଡେଲକୁ ପସନ୍ଦ କରନ୍ତି । ରଏଟର୍ସରୁ ମିଳିଥିବା ଖବର ଅନୁଯାୟୀ, ଏହି ଡିପସିକ୍‌- ଆର୧ ଚାଳିତ ଏଆଇ ଚାଟ ବୋଟକୁ ଏନଭିଡ଼ିଆ ଏଚ୍‌୮୦୦ ଚିପ୍ସ ବ୍ୟବହାର କରି ପ୍ରସ୍ତୁତ କରାଯାଇଛି । ଏଭଳି ପରିସ୍ଥିତିରେ ଏହାର ମୂଲ୍ୟ ୬୦ ଲକ୍ଷ ଡଲାରରୁ କମ୍ ଥିଲା (ପ୍ରାୟ ୫୨ କୋଟି ଟଙ୍କା)। ଅନ୍ୟପଟେ ଚାଟ୍ ଜିପିଟି ତିଆରି କରିବାରେ ପ୍ରାୟ ୧୦ ଗୁଣ ଅଧିକ ଟଙ୍କା ଖର୍ଚ୍ଚ ହୋଇଛି ।