ଜୁନା ଆଖଡାରୁ ବାସନ୍ଦ ଆଇଆଇଟି ବାବା,ଜାଣନ୍ତୁ କାରଣ.....

ପ୍ରୟାଗରାଜ ମହାକୁମ୍ଭ ମେଳାର ଭାଇରାଲ ଆଇଆଇଟି ବାବା ଏବେ ବାସନ୍ଦ ହୋଇଛନ୍ତି । ସେ ରହୁଥିବା ଜୁନା ଆଖଡ଼ାରୁ ବାବା ଅଭୟ ସିଂହଙ୍କୁ ବହୃଷ୍କୃତ କରାଯାଇଛି । ତାଙ୍କ ଗୁରୁ ମହନ୍ତ ସୋମେଶ୍ୱରୀ ପୁରୀ ଗାଳିଗୁଲଜ କରିଥିବା ଅଭିଯୋଗରେ ଏଭଳି କାର୍ଯ୍ୟାନୁଷ୍ଠାନ ନିଆଯାଇଛି । ଏହାସହିତ ବାବା ଅଭୟଙ୍କ ଆଖଡ଼ାରେ ପ୍ରବେଶ ଉପରେ କଟକଣା ଲଗାଯାଇଛି ।

ଜୁନା ଆଖଡାର ମୁଖ୍ୟ ମହନ୍ତ ହରି ଗିରି କହିଛନ୍ତି, ଏହି ଆଖଡା ସନ୍ନ୍ୟାସ ନିୟମ କାନୁନ ଅନୁସାରେ ଚାଲେ, ଏଥିରେ ଯେଉଁମାନେ ଅବହେଳା କରନ୍ତି ସେମାନଙ୍କୁ ସନ୍ନ୍ୟାସୀ ଭାବେ ଗଣାଯାଏନାହିଁ । ବାବା ଅଭୟ ସିଂ ତାଙ୍କୁ ଗୁରୁଙ୍କୁ ଅସମ୍ମାନ କରିଛନ୍ତି । ଯାହା ସନାତନ ଧର୍ମ ଏବଂ ଜୁନା ଆଖାଡା ନିୟମ ବିରୋଧୀ । ସେ ହୁଅନ୍ତ ଅବା ଅନ୍ୟ କେହି ନିୟମ ଉପରେ ନୁହେଁ । ବାବା ଅଭୟ ତାଙ୍କ ଗୁରୁଙ୍କ ବିରୋଧରେ ଅପଶବ୍ଦ ବ୍ୟବହାର କରିଥିବାରୁ ତାଙ୍କୁ ଆଖଡାର ଶୃଙ୍ଖଳା କମିଟି ତାଙ୍କୁ ଆଖଡାରୁ ବହିଷ୍କୃତ କରିଛି ।

ଆଇଆଇଟି ବମ୍ବେରୁ ଏରୋସ୍ପେଶ ଇଞ୍ଜିନିୟରିଙ୍ଗରେ ଗ୍ରାଜୁଏସନ ପରେ ନିଜ କ୍ୟାରିୟର ଛାଡି ସନ୍ୟାସୀ ହୋଇଯାଇଥିଲେ । ମହାକୁମ୍ଭ ମେଳାରେ ରାତାରାତି ଭାଇରାଲ ହୋଇଥିଲେ ଅଭୟ ସିଂ । ଆଇଆଟି ବାବାଙ୍କ ନାମରେ ସାରା ଭାରତରେ ଏବେ ସେ ପରିଚିତ । ତାଙ୍କର ଇନଷ୍ଟାଗ୍ରାମରେ ଲକ୍ଷ ଲକ୍ଷ ଅନୁସରଣକାରୀ ଅଛନ୍ତି । ବାବା ଅଭୟ ତାଙ୍କ ବାପାଙ୍କୁ ହିରଣ୍ୟକସ୍ୟପ ଏବଂ ତାଙ୍କ ଗୁରୁଙ୍କୁ ପାଗଳ ବୋଲି ସମ୍ବୋଧନ କରିଥିଲେ । ଗୁରୁଙ୍କ ସହ ବିବାଦ ପରେ ବାବା ଅଭୟ ଏଭଳି ମନ୍ତବ୍ୟ ଦେଇଥିଲେ । ଯାହା ଇଣ୍ଟରନେଟରେ ଭାଇରାଲ ହେବା ପରେ ବାବା ଅଭୟଙ୍କ ଉପରେ କାର୍ୟ୍ୟାନୁଷ୍ଠାନ ନିଆଯାଇଛି ।