ସେପ୍ଟେମ୍ବର ୯ରେ ଉପରାଷ୍ଟ୍ରପତି ନିର୍ବାଚନ; ଆସନ୍ତା ୭ ତାରିଖରେ ପ୍ରକାଶ ପାଇବ ବିଜ୍ଞପ୍ତି

ସେପ୍ଟେମ୍ବର ୯ ତାରିଖରେ ଉପରାଷ୍ଟ୍ରପତି ନିର୍ବାଚନ । ଆସନ୍ତା ୭ ତାରିଖରେ ପ୍ରକାଶ ପାଇବ ବିଜ୍ଞପ୍ତି । ଅଗଷ୍ଟ ୨୧ ନାମାଙ୍କନର ଶେଷ ତାରିଖ । ଅଗଷ୍ଟ ୨୫ ତାରିଖ ନାମାଙ୍କନ ପ୍ରତ୍ୟାହାରର ଶେଷଦିନ ।

ଆବଶ୍ୟକ ହେଲେ ସେପ୍ଟେମ୍ବର ୯ରେ ନିର୍ବାଚନ।ସେପ୍ଟେମ୍ବର ୯ରେ ସକାଳ ୧୦ରୁ ସଂଧ୍ୟା ୫ ଯାଏଁ ଭୋଟ୍‌ ଗ୍ରହଣ । ଜଗଦୀପ ଧନଖଡ଼ଙ୍କ ଇସ୍ତଫା ପରେ ଖାଲି ପଡ଼ିଛି ପଦବୀ।

ଭାରତର ସମ୍ବିଧାନ ଅନୁଯାୟୀ, ଉପରାଷ୍ଟ୍ରପତି ନିର୍ବାଚନ ପାଇଁ ଲୋକସଭା ଓ ରାଜ୍ୟସଭାର ନିର୍ବାଚିତ ଏବଂ ମନୋନୀତ ସାଂସଦମାନେ ମିଳିତ ଭାବେ ଭୋଟ ଦିଅନ୍ତି । ଏହି ନିର୍ବାଚନରେ ସଂଖ୍ୟାଗରିଷ୍ଠତା ପାଇବା ପ୍ରାର୍ଥୀ ଉପରାଷ୍ଟ୍ରପତି ଭାବେ ନିର୍ବାଚିତ ହେବେ । ସେପ୍ଟେମ୍ବର ୯ରେ ଅନୁଷ୍ଠିତ ହେବାକୁ ଥିବା ଏହି ନିର୍ବାଚନ ପାଇଁ ରାଜନୈତିକ ଦଳମାନେ ଜୋରଦାର ପ୍ରସ୍ତୁତି ଆରମ୍ଭ କରିଦେଇଛନ୍ତି ।

ସୂଚନା ଅନୁଯାୟୀ, କେନ୍ଦ୍ରରେ ଶାସନରତ ଜାତୀୟ ଗଣତାନ୍ତ୍ରିକ ମେଣ୍ଟ (ଏନଡିଏ) ଓ ବିରୋଧୀ ଦଳର ମେଣ୍ଟ (ଇଣ୍ଡିଆ) ନିଜ ନିଜର ପ୍ରାର୍ଥୀ ଚୟନ ପାଇଁ ଆଲୋଚନାରେ ବ୍ୟସ୍ତ ଅଛନ୍ତି । ଏନଡିଏ ସାଂସଦମାନଙ୍କ ସଂଖ୍ୟାଗରିଷ୍ଠତାକୁ ଦୃଷ୍ଟିରେ ରଖି ଏକ ଶକ୍ତିଶାଳୀ ପ୍ରାର୍ଥୀ ଆଗତ କରିବାକୁ ଯୋଜନା କରୁଥିବା ବେଳେ, ବିରୋଧୀ ଦଳମାନେ ମଧ୍ୟ ଏକ ମିଳିତ ପ୍ରାର୍ଥୀ ଆଗତ କରି ପ୍ରତିଦ୍ୱନ୍ଦ୍ୱିତା କରିବା ନେଇ ଆଲୋଚନା କରୁଛନ୍ତି ।

ଏହି ନିର୍ବାଚନ ଭାରତୀୟ ରାଜନୀତିରେ ଏକ ଗୁରୁତ୍ୱପୂର୍ଣ୍ଣ ଘଟଣା ହେବ ବୋଲି ଆଶା କରାଯାଉଛି । ନୂଆ ଉପରାଷ୍ଟ୍ରପତିଙ୍କ ନିର୍ବାଚନ ଦେଶର ରାଜନୈତିକ ସମୀକରଣ ଓ ରାଜ୍ୟସଭାର କାର୍ଯ୍ୟକାରୀତା ଉପରେ ଗଭୀର ପ୍ରଭାବ ପକାଇବ । ନିର୍ବାଚନ ପୂର୍ବରୁ ପ୍ରଚାର ଓ ରାଜନୈତିକ ଗତିବିଧି ଆହୁରି ଜୋରଦାର ହେବ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି ।

ଭାରତର ଉପରାଷ୍ଟ୍ରପତି ଜଗଦୀପ ଧନଖଡ଼ଙ୍କ ଅଚାନକ ଇସ୍ତଫା ଦେଶର ରାଜନୀତିକ ମହଲରେ ଚର୍ଚ୍ଚାର ବିଷୟ ହୋଇଛି। ତାଙ୍କ ଇସ୍ତଫା ପରେ ପରବର୍ତ୍ତୀ ଉପରାଷ୍ଟ୍ରପତି ଚୟନ ପାଇଁ ନିର୍ବାଚନ ଆଗାମୀ ସେପ୍ଟେମ୍ବର ୯ରେ ଅନୁଷ୍ଠିତ ହେବ ବୋଲି ଭାରତ ନିର୍ବାଚନ କମିଶନ ଘୋଷଣା କରିଛି।