ସ୍କୁଲରେ ପଡ଼ିଲା ତାଲା , ଏହି ଜିଲ୍ଲାରେ ଚାଲିବ ଅନଲାଇନରେ ପାଠପଢ଼ା, ଜାଣନ୍ତୁ କାରଣ....

ପ୍ରୟାଗରାଜ ମହାକୁମ୍ଭରୁ ଫେରୁଥିବା ଲକ୍ଷାଧିକ ଶ୍ରଦ୍ଧାଳୁଙ୍କ ଭିଡ଼ ହେତୁ ବାରାଣସୀରେ ସମସ୍ତ ସ୍କୁଲ ବନ୍ଦ କରି ଦେଇଛି ଜିଲ୍ଲା ପ୍ରଶାସନ । ଏ ସମ୍ବନ୍ଧରେ ଗତକାଲି ଏକ ଅଫିସିଆଲ୍ ଆଦେଶ ଜାରି କରାଯାଇଛି । ଜିଲ୍ଲା ଅଧିକାରୀ ସମସ୍ତ ସ୍କୁଲକୁ ବନ୍ଦ ରଖିବାକୁ ଏବଂ ପ୍ରଥମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଅନଲାଇନ୍ କ୍ଲାସେସ୍ ଜାରି ରଖିବାକୁ ନିର୍ଦ୍ଦେଶ ଦେଇଛନ୍ତି ।

ନିର୍ଦ୍ଦେଶ ଅନୁସାରେ, ସ୍କୁଲଗୁଡ଼ିକରେ ପ୍ରଥମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଫେବୃୟାରୀ ୫ ଯାଏ ଅଫଲାଇନ୍ କ୍ଲାସେସ୍ ସ୍ଥଗିତ ରହିବ । ପାଠ୍ୟକ୍ରମ ସାରିବା ପାଇଁ ସମ୍ପୃକ୍ତ ସ୍କୁଲ ସମୟ ଅନୁସାରେ ଅନଲାଇନ୍ କ୍ଲାସେସ୍ ସଞ୍ଚାଳନ କରିବ । ଏହି ଆଦେଶ ଅଞ୍ଚଳର ସମସ୍ତ ସିବିଏସଇ, ଆଇସିଏସଇ ଏବଂ ରାଜ୍ୟ ବୋର୍ଡର ସ୍କୁଲଗୁଡ଼ିକ ଉପରେ ଲାଗୁ କରାଯାଇଛି ।

ଏହି ଅବଧି ମଧ୍ୟରେ ସ୍କୁଲଗୁଡ଼ିକୁ ନିଜର ସୁବିଧା ଅନୁସାରେ ପ୍ରାକ୍ଟିକାଲ୍ କ୍ଲାସ୍ ଆୟୋଜନ କରିବାକୁ ଅନୁମତି ଦିଆଯାଇଛି । ପ୍ରାକ୍ଟିକାଲ୍ କ୍ଲାସ୍ ପାଇଁ ଡକା ହେଲେ, ଛାତ୍ରଛାତ୍ରୀମାନେ ସ୍କୁଲ ଆସିବେ । କିନ୍ତୁ ନିୟମିତ ଅଧ୍ୟୟନ ପାଇଁ ଅନଲାଇନ୍ କ୍ଲାସ୍ ଜାରି ରହିବ । ରାସ୍ତାରେ ଲୋକ ଗହଳିକୁ ନିୟନ୍ତ୍ରଣ କରିବା ତଥା ଟ୍ରାଫିକ୍ ବ୍ୟବସ୍ଥା ବଜାୟ ରଖିବା ପାଇଁ ଜିଲ୍ଲା ପ୍ରଶାସନ ଏପରି ନିଷ୍ପତ୍ତି ନେଇଛି ।